Na Ia Aumaia ia te Au le Filemu
Carson Howell, Iuta, ISA
Sa avea lou uso o Brady o se peresitene pule faataitai e galue i totonu o le neivi i le US Pentagon ina ua tulai mai osofaiga o le aso 11 o Setema, 2001. Sa ou galue i Idaho, ISA, i le taimi lea, ma ina ua ou vaai i tala fou i lena taeao e uiga i le mea ua tupu, na ou valaau i lou pule e faailoa atu ia te ia o le a ou le sau e faigaluega mo ni nai aso.
Sa potopoto nai tagata o lou aiga i Uosigitone, T.C., i se potu tele faafiafia i se faletalimalo na saunia e taitai o le malo e avea o se potu fono, e mafai ai ona latou faaauauina le tuuina mai o taumafaiga laveai. Sa matou faatalitali mai lea aso i lea aso i le fia iloa pe na i ai Brady i e na aafia fua. O le lagona na i ai i lena siosiomaga o se lagona o le faanoanoa le mafuatia ma le leai o se faamoemoe. Ae ui i lea na fusia faatasi lo matou aiga ma tatalo po o le a lava le mea e tupu, o le a le mavae lava lo matou faatuatua.
Toeitiiti lava atoa le vaiaso talu ona mavae osofaiga, i le aso 17 o Setema, ae matou maua loa le faamaoniga ua maliu Brady.
Ou te lei iloa lava pe na ou fesili faapea, “Aisea ua tupu ai ia te au?” Ae na mautinoa lava lou fesili, “Aisea [ua tupu ai ia te] ia?” Mai lava i lou laitiiti, na ou alofa, faamemelo, ma manao ia avea au faapei lava o Brady. Sa ou taumanatunatu foi, “Aisea ua tupu ai i le taimi nei?” Sa fuafua Brady mo ni nai vaiaso, e malaga i Idaho e mafuta ma lona aiga. Na fuafua o ia e sau i le Aso Tofi, aso 13 o Setema, e lua aso ae maliu.
O le afiafi muamua na ou toe foi ai i le galuega ina ua ou foi mai i Idaho, na ou tatalaina ai lau i-meli o le galuega, lea ou te le’i tatalaina lava talu mai le Aso 10 o Setema. Na i ai i lau lisi o meli se feau mai ia Brady. Na ia auina mai i le taeao o le Aso Lua, a o lei tupu le osofaiga. Na ia talanoa mai e uiga i la matou faatasiga ma mea malie uma na matou fuafuaina. Ina ua faauma lana i-meli, na ia tusia le upu, “Filemu.”
E le masani ona faauma faapena ia i-meli a Brady, ae ou te manatu i lena mea o le alofa mutimutivale o le Alii na ia tusia ai. Ou te le manatu na iloa e Brady le mea o le a tupu, ae ou te fiafia i ana upu mulimuli—o lana upu mulimuli—ia te au o le filemu.
E oo mai lava i le taimi nei, ua sili atu ma le sefulu tausaga talu ai, ou te toe faitauina ai lava mai lea taimi i lea taimi lena i-meli. O taimi uma lava ou te faitau ai, e faamanatu mai ai ia te au e ala mai i le talalelei e mafai ai ona tatou maua le filemu lea na folafola mai e le Faaola: “Ou te tuu atu ia te outou le [filemu], o lo’u [filemu] ou te avatu ai ia te outou: ou te le avatu ia te outou faapei ona avatu e le lalolagi. “Aua le atuatuvale o outou loto, aua foi tou te matatau” (Ioane 14:27).
E moni lava o loo ou misia lava Brady, ae ona o le talalelei, e le mafai ona mavae lou faatuatua i lenei tofotofoga. E ala mai i le fesoasoani a le Faaola, ua mafai ai ona ou agai i luma ma le faamoemoe ma le filemu.