Ngkana Babaire aika a Tamaroa Aki Nakoraoi
Te babaire ibukin boong aika a na roko e boni kakawaki ai moararariki ibukiia kairake n ikawai. Ma terana ae e na riki ngkana te babaire ae tamaroa ae e a tia ni baireaki raoi e aki mwakuri?
Te aine ae Jung Sung Eun mai Korea e aki bwaati te ukeuke are e a tia ni katauaki ibukin te nakoa n tia reirei. Tina Roper mai Utah, USA, e bua a na mwakuri are e a tia ni kantaningaia bwa e nang riki raoi bwa ana mwakuri. Todd Schlensker mai Ohio, USA, e karekea te kamatoaaki ae aanaki n te maiu n tamnei ibukin ana mare ma e noora ana boraraoi n te kabae bwa e a roko n tokina. Alessia Mazzolari (e bitaki te ara) mai Italy e aki koro nanon karekean ana reitaki ae kororaoi.
Akea ae tangiria n nakon te “baibaire ae boou.” Ma e ngae ngke a aki koro nanon ara babaire, Tamara are i Karawa e aki kamaunaiia natina. Iai kawai aika a rangin tamaroa aika a mwaiti inanon te maiu ae ti riai ni mwakurii. Inanon te tai, ti na bae ni kunea bwa bwaai aika a tutuki are e bitii ara babaire e anganiira te rabakau ao te taneiai (taraa D&C 122:7) ao ni kairaki nakon te bwai ae tamaroa.
Katamaroan te Katei, Tiaki Kinaakin te Konabwai
Sung Eun e a tia ni beku korakora ni kakoroan bukin miina ni kan riki bwa te tia reirei. E kamatata, “Bukina bwa n taainako I a tia ni karaoa au kabanea n tamaroa ni bwaai aika I karaoi, I a kuri ni karekea te bwai are I kantaningaia ao n tataroakinna.” Ma e aki korobukina ngke e a ira te ukeuke ibukin te kabwaati n te nakoa n tia reirei.“Ngkai I aki bwaati,” e taekinna, “I namakinna bwa I a tia ni kabuai baike I a tia ni miiakin n teuana te bong.”
Tina e aki bati n raoraoma n te moan tai ngke te kambwana teuana e kainnanoa temanna are e na mwakuri ibukina. Te kambwana ae boou e berita nakoina ni kamwakuria n te tai ae maan, ngaia are e a mwaing ni kania ana tabo ni mwakuri ma te kantaninga ae korakora ni kakukurein te mwakuri ae boou. Ngke e a kamotirawaki iroun te kambwana tabeua te namwakaina imwiina, e namakina te “bua, te aki oota, nanokawaki, ao te maaku.”
Nakon kabaneakin aia tai iaon katamaroan kinaakin aia konabwai, Sung Eun ao Tina a nooria bwa a kona naba ni kabanea raoi aia tai iaon katamaroan kateia. Aine a kunea te karaunano rinanon kamatebwaian te euangkerio ao te tataro.
“Te Abotoro ae Bauro bon te rao ae kamimii are e buokai n nanorinano ao n teimatoa ni kaitarai kakaewenako,” e taku Sung Eun. “Iai iroun teuanne kateina ae tamaroa ao n ingainga n nano n te bwai are e a tia ni baireia te Atua ibukina, nakon ae kantaningaan bwaai n oin ana tai.
“I reiakinaki te bwai teuana man ana katotoo: te tai n tataninga bon tiaki raoi te waaki are ti na riai n rinanona ni karekea te bwai ae ti tangiria. Ni kaitarakina, bon te waaki are ti riai n riki iai are e tangiria Tamara are i Karawa bwa ti na rinanon bitaki ake ti karaoi.”
Tina e kunea bwa te bitaki are e rangin kainnnanoia bon te bitaki n te taratara. “I mimii ni kunea bwa I a tia n ataa kakawakiu n iangoan te aonnaba ni baika a kakawaki,” e ururing. I namakina kakawakiu ibukin au mwakuri ao nakoau, ike a anaaki mairou. I a kunea ngkai kakawakiu inanon koaua aika akea tokiia ae Ngai natin Tamara are i Karawa te aine ao iai katauau ae tabu. Koaua aikai a aki kona ni manga anaaki.”
Tina ao Sung Eun a kariaia bwa katamaroan te katei e aki kakukurei n taainako, uaan te rikirake ae onoti e boni kakukurei. E taku Sung Eun, “Te ririki are I aki bwaati iai n te ukeuke ibukin te nakoa n tia reirei tiaki tii te tai ni kammaraki ao ni karawawata, ma bon te bwai ae kakawaki. I a konaa riki n ota n aia kanganga tabeman aomata ao n iai te kantaninga ni buokiia ma te nano ae koaua ao te tararua.”
Aia katotoo Amon ao tarina n ana Boki Moomon e kaotia nakon Tina bwa e kanga te Uea ni kakorakora ana onimaki ni buokia ni karokoa ni konabwaina ae bwanin. “Ana babaire te Uea ibukiia Nibwaite bwa a na kamaiuia tariia aika Reimwanaite n oneamwiin ae a na kabongana te kabaang ni katoka te kanganga,” e kamatata. “Natin Motiaea mwaane a anganaki katabeaia are a kainnanoa te onimaki ae korakora, ma a bon anganaki naba te berita bwa ngkana a kona n uoti karawawatakiia ma te taotaonakinnano, a na karekea te tokanikai (taraa Aramwa 26:27). Te taotaonakinnano bon teuana mai buakon kakatai nakoiu bukina ngkai I kan matata raoi n au babaire ae bwanin—ma I nooria bwa ana babaire Tamara are i Karawa ao ana tai ibukira e tamaroa n taainako.”
Kawakinan Tuua n aki Ongeia bwa Terana
Todd e kaitara ma te kakantaninga ibukin boong aika a na roko ngke e aoki man ana mwakuri ni mitinare. Inanon nanakona n reirei, e kaitibo ma te kairake n ataeinaine ae koro kamimiina. Imwiin tabeua namwakaina n te reitaki n iraorao ao te kamaatoaaki ae aanaki n te maiu n tamnei, e a kabutiman Todd ao e kariaia neienne. A bairea aia mare nakon banen te tiamwa, ao a kaai n okira mweengaia man te reirei bwa a na katauraoi.
“Teniua te wiiki imwiina ti a uaia ni kaboo n te reirei, e a katoka ara kabae,” e kauringnga Todd. “Te Uruakinnano e aki kona ni kamatata au namakin ae korakora. A rangin mwaiti titiraki aika a tuai ni kaekaaki aika a mena inanon au iango; e aki bo ma aongina. I a tia ni karekea te kamatoaaki n ana auti te Uea ao ngkai ara reitaki e a bon toki. Au koaua e bon tuai ni kataaki n ae korakora n aron aio.
“N akean te tekeraoi, inanon ririki imwiin au raure, I aki kona n totokoia. I aki ataia bwa N na kanga ni namakina manga kakoauan te kamatoaaki. I aki toki n onimakina te Uea n taainako ao ni kataa au kabanea n tamaroa ni kawakinan tuua,” e reitia nako. “E taraa n ae akea nanona.”
E taku naba Alessia bwa ana reitaki ma temanna te kairake n ataeinimwaane e na koronanona. “E kakaongora ara rongorongora bwa, e ngae ngke ti karekei kanganga aika a bon ririki are a ririnanona tenaan taanga, ti taku bwa e na aki uruaki ara reitaki,” e uringnga.
Ngke e nako raon Alessia te mwaane nakon ana mition, e kanganga te raurenako ma iai bukina ae kaokoro nakon are e a tia ni kantaningaia Alessia. “Ngke e a nako. I a moanna ni kinaai riki. I a nooria bwa a mwaiti bwaai inanon maiu aika a aki eti ao bwa n taai aika a bati I a tia ni karabai iango aika a nanobaba nakon ae n na kanorinanoai ao ni kaitara te bwai ae koaua,” e a manga karaki. “I a tia ni maeka inanon ae kanga ai aroia anti n aomata ma baia ni kiba, n aron ae kanga koa tangira n ae tau ni karaoi bwaai ni kabane bwa a na eti, ao angin te tai e karaoai bwa N na tarariaoi bwaai aika kabanea ni kakawaki.”
N ae teimatoa, Alessia e kantaninga te kaitibo ae kakukurei ao te reitaki ae teimatoa imwiin ana mition raona te mwaane. Ma e ngae n anne, inanon okina, taanga aikai a maroro inanon te tai ae kimototo imwaain ae a raurenako. “Bon teuana mai buakon taai aika a kakamaraki are I kona n uring,” e taku Alessia.
Inanon oin taneiai ake a rinanona, Todd ao Alessia a uaia ni kinaa bwa e ngae ngke te kiing n aia reitaki inanon maiuia e bitaki, a aki kona ni kakeaa aia ongeaba ao aia kakaonimaki nakon te Uea. E riki bwa te tia boutoka ngkana a bane ni bitaki bwaai ni kabane ao ni kararaoma.
“Akea au kaeka bwa e aera ngkai I karekea te kamatoaaki bwa N na mare ma temanna, ao e aki korobukina,” e kauringnga Todd. “Ma I nooria bwa e aki kakawaki anne. Tera riki ae kakawaki bon kateimatoan ae iai au onimaki iroun Kristo, ao N na kabongana te onimaki anne n onimakin bwaai are e a tia ni katauraoi te Uea ibukiu.”
E ataia Alessia bwa ana onnon nakon te Uea e na anganna te korakora are e kainnanoia. “I matata bwa e a roko te tai are N na baireia bwa te aekakin aomata ra ngai ae N na riki iai,” e taetae. “N na teimatoa ma te nano ae aki bwanin, ke N na moanna kawaiu n riki bwa te tia ririmwin Kristo ae koaua? I kan kinaa raoi, n tangiria raoi, ao ni kataia n riki bwa te aomata ae tamaroa man kawakinan Ana tua ni kabane―tiaki tii mai itinaniku ma mai nanou ni koaua.”
Karikirakean te Kantaninga ni boong aika a na Roko ao Onimakinan Kristo
Imwiin te kaitara ma aki kantaningan baika a bitaki, ni kabane aman kairake n ikawai aikai a korakai n ukoukora te ninikoria ni maiu inanon boong aika ngkai ao ni manga babaire riki ibukin boong aika a na roko. Ma aki ataia bwa aia onimaki iroun te Uea e rikirake.
Te aine ae Sung Eun e uringnga bwa imwiin aki bwaatina n te ukeuke, kataakin bwaai aika a boou a riki ni matoatoa. Ma imwiina e kaoti te kukune ae kabanea ni kakawaki: “I nooria bwa te kabwaka bon te tiku iaon taai aika a tia n nako ao ni karekea te konabwai ni mwakurii bwaai ni kabane. I baireia bwa nakon kateimatoaan te nanokawaki, N na riai ni bita te tai ae matotoa aei nakon te tai n reiakinaki. Au konabwai ni matatau n te maiu e karababaki ao ni kananoaki, ao I reiakinna bwa n tokin te bwai teuana e aki toki n uota moanakin te bwai teuana.” E a manga moan ira riki te ukeuke ao e a bwaati ao ngkai bon “te tia reirei ae kukurei are e kimwareirei ni kabanea ana tai ma ataein te reirei ni katoabong.”
Tina e rineia ma te onimakinna bwa iai te bwai teuana ae tataninga ibukina, e ngae ngke e boni kanganga kaitaran boong aika a na roko ae e aki koaua iai. “I baireia bwa n na manga rin n te reirei, ao ikanne I a kamatebwai iaon korotamnei ao itera ni karekean te konabwai ao te rabakau, te tabo are I a kaman baireia bwa n na ira buakona ma I aki karekea te konabwai are e kainnanoaki,” e kamatata. “I a tauraoi ni moana te mwananga teuana, ae e a tamaroa riki, te kakaitau nakon wanawanan Tamara are i Karawa.”
E teimatoa Todd ni kataia ni maroro ni kareke tangira inanon onoua te ririki ao ni mwakuri ni karikirakea ana onimaki iroun te Uea. E ngae ngke e kaitibo ma aine are e nano irouia, e na bae ni korakai ni kawakinan raraomana man taai aika a tia n nako man uruakan ana kantaninga ibukin boong aika ana roko. “Karekean te konabwai n aki kona n totokoa te raraoma inanon onoua te ririki e bon aki bebete,” e taekinna. “Ma I boni matoatoa ni kataakin kakoauana nakoiu bwa I bon onimakina te Uea ao Ana kairi, e ngae ngke I a tia n un irouna mai mwaaina.” Te reitaki ae boou ni koauana e a kairiri nakon te mare n te tembora.
“I mimii n angin te tai bwa bukin tera te Uea e kakabwaiai ma temanna ae kakannato n aron kainnabau te aine ngke I a korakai n te tai ae maan ni kabwanina onimakinan te Tamnei,” e kauringnga Todd. “Bon te kakoaua nakoiu bwa te Uea e kakantaninga ae e na kakabwaiaira, ma e bon nakon Ana tai.”
Alessia, man manga katabuan ngaia nakon te Uea, e karikirakea te kakoaua ae onoti ao ae rangin nano. “Te babaire ni Kamaiu e bon koaua raoi ibukiu, ao au berita aika a tabu a moanna riki ni kabaeaki ao n nano. Ana mwakuri ni kamaiu Kristo ai tiaki te iango ke te bwai teuana are I a tia ni wareka taekana, tao ae karina n riki. Te bitaki n nano e bon riki man te nano, ao e matoatoa au koaua.” N te bong aio, e namakinna bwa ai aron te aomata ae e boou.
N aki ongea bibitakin te mwananga n te maiu are e na riki, tokin te kawai ibukin te maiu are akea tokina bon ngaia are e a tia ni baireia Tamara are i Karawa ibukiia natina (taraa Moses 1:39). Tabemwaang a kunea bwa “te babaire ae B” bon te kawai ni karaoan “oin ana babaire” bwa e koaua.
Kamatata iroun Neil Webb