Sai Ange Ke ke ʻUluaki Lotu
Martins Enyiche, Naisīlia
Naʻá ku mei mavahe mei he Siasí tuʻunga ʻi haʻaku taʻefefiemālieʻaki mo ʻeku palesiteni fakasiteikí. Naʻá ku ongoʻi naʻá ne fai ha meʻa naʻeʻikai totonu. Naʻe ʻikai ke hāsino mei heʻene meʻa ne faí ʻa e founga naʻá ku pehē ʻoku totonu ke fakahokó, pea ʻikai leva ke u toe ʻalu ki he lotú.
Talamai ʻe hoku uaifí, “ʻOku ʻikai totonu ke ke fai ha faʻahinga fili pehē taʻetomuʻa fai ha lotu mo ha ʻaukai fakamātoato.”
Naʻe tonu ia. Pea hili haʻaku lotu ʻi ha vahaʻa taimi, ne hū mahino mo fakahangatonu mai ʻa e ngaahi lea ko ʻení kiate au: “ʻOku ui ʻe he ʻOtuá ʻa e tamaioʻeiki ʻa e ʻOtuá.”
Naʻá ku misi ʻi he pō ko iá. Naʻe valokiʻi au heʻeku kui tangatá ʻi heʻeku misí ʻi heʻeku fakafepakiʻi hoku takí. Naʻá ku ofo ai mei heʻeku misí ʻo ʻikai ke u toe lava ʻo mohe he toenga ʻo e poó. Naʻá ku ʻilo ʻa e meʻa naʻe fie maʻu ke u faí ʻi he hili e pō fuoloa ʻo e fakakaukau fakamātoató. Naʻá ku ʻalu leva ki heʻeku palesiteni fakasiteikí ʻo kole fakamolemole. Naʻá ne tali fiefia ʻeku kole fakamolemolé, peá ma lotu fakataha.
Naʻá ku foki leva ki he lotú. Hili mei ai ha uike ʻe ua kuo hiki au ʻe he kautahá ki ʻApusa (Abuja), ko e kolomuʻa ʻo Naisīliá. Naʻá ku moʻutāfuʻua, peá u fifili pe ko e hā naʻe toʻo ai au mei he siteikí ʻi he hili ʻeku feinga ke fakaleleiʻi aú.
Naʻe ʻikai fuoloa kuó u ʻilo ko hano teuteuʻi ia au ʻe he ʻEikí. ʻI hoku māhina hono ua ʻi ʻApusá, kuo ui au ko ha palesiteni fakakolo.
ʻOku ou tui pau ne finangalo e Tamai Hēvaní ke akoʻi au ʻi hono mahuʻinga ʻo e poupouʻi ʻo e kau taki faka-Siasí ki muʻa peá Ne toki ui au ko e takí. Naʻe fakamālohia ʻeku fakamoʻoní ʻe he meʻá ni. ʻOku ou feinga ʻeni ʻaki hoku mālohi tahá ke fakafanongo ki he faleʻi hoku kau takí koeʻuhí he ʻoku ou ʻilo naʻe ui kinautolu ʻe he ʻOtuá. Pea ka ʻi ai ha taha ʻokú Ne ui, ʻokú Ne fakafeʻungaʻi.1
Ko hotau kau takí ko e tangata pē. Neongo ʻoku ueʻi fakalaumālie kinautolu, ka ʻoku ʻikai ke nau haohaoa. Naʻá ku ʻilo kapau te tau taʻefelotoi mo kinautolu, ʻoku fie maʻu ke tau poupouʻi, fakalotolahiʻi, pea mo lotua kinautolu pea maʻatautolu foki koeʻuhí ke tau lava ʻo falala ki he ʻOtuá pea mo e kau tamaioʻeiki kuó Ne filí.