O La’u Luitau i Talafaasolopito o Aiga

Saunia e Cristina Alvear

Na amata ona faamatala mai e Epikopo Page, o le epikopo o le matou uarota a le autalavou matutua e faapea, o le galuega o talafaasolopito o aiga ma le malumalu e le mo na o matua po o matua matutua—ae o le tiutetauave o la matou augatupulaga ma o se vaega o le mafuaaga ua auina mai ai i matou i le lalolagi i lenei vaitaimi. Ona oo mai lea o le luitau: faatulaga i le faasologa sa’o ia igoa a le FamilySearch. O le mea moni, na ia fautua mai ia atoa le 100,000 o igoa e fai ai le faasinoupu e lo matou uarota.

O le a avea ma se faatinoga maoae. E manaomia e tagata taitoatasi ona faia le faasinoupu o ni igoa se 1,000. Ae peitai ina ua fesili mai Epikopo Page po o ai o le a tuuto atu i lea sini, sa sii uma i luga o matou lima.

Sa vave ona taua le luitau i lo’u olaga. Sa ou siiina mai le polokalama a le FamilySearch, o le faasinoupu o igoa, ma faitau aoaoga faamasani, ma amata loa.

I le taimi muamua, sa foliga mai e faigata. Sa le o taimi uma na faigofie ai ona faitau ia tusitusi. Peitai o taimi uma ou te faamaeaina ai se seti o igoa, ou te lagona atili ai le to’a.

Ona o lo’u aiga e tupuga mai i Chile, o lea sa ou filifili ai e faia le faasinoupu o igoa i le faa-Sipaniolo. Masalo ona o lena mafuaaga, sa [ou] lagonaina ai le matua patino o lena aafiaga. Ou te lei manatu e faapea, ua na o lo’u taina o ni igoa aua sa ou iloaina o igoa taitasi, o se tagata lea e mafai ona maua faamanuiaga o le malumalu.

Sa vave ona ou iloaina o le faia o faasinoupu o igoa o se gaoioiga lelei lea e fai i Aso Sa. Ona e mamao le mea ou te nofo ai mai i lo’u aiga, ou te lagona ai i nisi taimi e le tele ni mea e fai pe a tuua le lotu. Peitai o le faia o faasinoupu o igoa e fesoasoani lea e faaaoga tatau ai lo’u taimi, ma e mafai ona ou faalogologo i musika po o lauga ao o’u faia.

Na faamalosia au ina ua sii mai e le peresitene o le matou siteki se saunoaga a Peresitene Boyd K. Packer, Peresitene o le Korama a Aposetolo e Toasefululua: “E leai se isi galuega e sili atu ona avea ma puipuiga i lenei Ekalesia nai lo galuega o le malumalu, ma le sailiga o talafaasolopito o aiga lea e lagolagoina ai. E leai se isi galuega e sili atu ona faaleleia ai faaleagaga. E leai se isi galuega o loo tatou faia tatou te maua atili ai le malosi. … O a tatou galuega i le malumalu e ufitia ai i tatou i se ufifatafata ma se puipuiga, i le avea ai ma ni tagata taitoatasi faapea ma se nuu.”¹

E mafai ona foliga mai ua faapitoa ona osofaia le autalavou matutua i “ufanafana mu a le fili” (1 Nifae 15:24), ao lea ua folafola mai ia te au le puipuiga. Sa ou lagonaina se naunau malosi e fesoasoani i tagata o la’u uarota ina ia maua lena lava faamanuiaga, ma o lea sa ma faatulagaina ai ma se uo se vaega e faia faasinoupu o igoa. E toatele tagata na aumaia ni komepiuta feaveai. Na faasoa mai e tagata ua leva ona masani i le faiga o faasinoupu o igoa a latou komepiuta ma taliina ni fesili a i latou o e faatoa amata.

I le aluga o ni nai masina na sosoo ai, sa faia ai foi e taitai o le uarota ni gaoioiga e tuuto atu i la matou sini. Pe a lotovaivai se tagata, matou te fefaamalosiaua’i. Sa ou ofo i le lagona o le lotogatasi na matou atiina ae mai le auauna atu faatasi i le Alii ma isi.

I le faaiuga, e le’i ausia le matou sini o le 100,000 igoa, e ui o le toatele o tagata na faamaeaina igoa e tai 1,000. Ae peitai, o le sini a lo matou epikopo, e lei faatatau i ni fuainumera; ae na faatatau i lo matou mauaina o se molimau i talafaasolopito o aiga. Ma ona sa aofia ai le auauna atu, ositaulaga, ma le faaolaina o isi, o lea sa matou lagonaina ai lona aafiaga faamamaina.

Ou te faafetai mo le avanoa e auai ai i le faia o le galuega a le Alii. O le faatinoina o Lana galuega, na iu ina ou iloa lelei atili ai foi o Ia.