O Le a Liu Aisa Fua o Lau Faatoaga!
Ben E. Fowler, Iuta, ISA
Ao sauni lo matou aiga e faamau i le Malumalu o Logan Iuta, sa matou toe tautino atu i matou lava i le ola ai i le talalelei a Iesu Keriso. Sa faapitoa lava, ona matou faia se tautinoga i le Alii o le a matou totogiina e le aunoa le sefuluai. E lei leva ona uma la matou faamauga, ae matou siitia atu loa i Wyoming, ISA, e faataitai ai i le faiga o faatoaga.
O le vaitaimi o le faaiuga o Aperila na amata ai ona tapena lo matou fanua e 300 eka (121 ha). Sa matou susunuina laau, faalaugatasia le laueleele, ma eli alavai. E oo ifo i le taimi e toto ai fatu laau, ua faai’ui’u le vaitau e toto ai. Sa tonu ia te au e toto le karite, aua e le umi se vaitau e ola ai.
Na uma ona ou totoina ni nai eka ae sau se fai lafumanu o le lotoifale ma fai mai, “Ua maimau lou taimi, malosi, ma tupe i lenei taumafaiga. Ua tuai tele. E oo atu i le aso 21 o Aokuso ua liu aisa fua o lau faatoaga!
Na ia asuina mai se luuga palapala ma fai mai, “Ua matutu le palapala i lou saluina, susunu, ma faalaugatasi. E le mafai ona oso tatupu o au fatu laau pe a le susu.”
Na ou iloa sa matua matutu lava le palapala, ae ua uma ona faaaoga le tele o a matou tupe i fatu laau, o lea sa ou filifili ai e faaauau pea le totoina. Sa ou faatuatua aua ua uma ona matou faia le mea sili matou te mafaia e saunia ai le fanua ma ona o i matou foi o ni tagata e totogi atoa le sefuluai, o le a fesoasoani mai le Tama Faalelagi ia i matou. Ina ua uma ona totoina mea uma, sa matou tootutuli ma lo’u aiga i le tatalo, ma ole atu mo Lana fesoasoani.
O le aso na sosoo ai na amata ai ona timu, o se timu e fetaui tonu lava aua e lemu e le tafefea ai a matou fatu laau po o le palapala vaivai i luga o le mauga. Sa le’i vale a matou tatalo faatauanau ma galuega i aso uumi ma faigata.
I le tautotogo ma le taumafanafana, sa matou galulue ai i le 12 e oo i le 14 itula i le aso, ono aso o le vaiaso, i le eliina, faatutu o pa, ma sauniuni mo le seleselega. Sa matou tausia foi a matou folafolaga i le Alii e ala i le totogiina o le sefuluai ma galulue ma le filiga i o matou tofiga i le uarota. Na ola lauusiusi ma sa tele ia sana; o laau o le karite na foliga mai ua feosofi mai i fafo o le palapala. Ae peitai, ina ua tulata i le faaiuga o le vaitau, sa matou popole nei malulu tele mo fua o la matou faatoaga e ola ai. Sa matou tatalo ina ia faasao e le Atua fua o la matou faatoaga, ma sa matou faatuatua o le a Ia faataunuu Lana folafolaga ia i latou o e totogi sefuluai: “Ou te aoai atu, ona o outou, le na te aina mea; na te le faaumatia le fua o lo outou laueleele” (Malaki 3:11).
Na oo mai le aso taufaafefe, le aso 21 o Aokuso, ma na faapea foi ma le aisa. Peitai ina ua ou alu atu i le faatoaga i le aso na sosoo ai, sa ou vaaia ua faasaoina fua o la matou faatoaga. I ni nai vaiaso mulimuli ane, na faatumulia le tele o uta o loli i seleselega o le karite, lea na mafai ona matou faatauina atu mo se tupe faasili tele.
O le taumafanafana na sosoo ai na lanu lauava ai le ola o la matou fia eka o pi ma karite i le ogatotonu o lena laufanua pefua ma le togavaoa. I se tasi aso i le faaiuga o Aokuso, ao ou eliina se alavai sa ou vaaia ai se afa matautia ma le pogisa o agai mai. “Auoi, leai,” sa ou mafaufau ai, “timu aisa!” Sa ou tootuli i le faatoaga ma tatalo, ma le iloaina o le a faaleagaina fua o la matou faatoaga. Na vave ona oo mai le afa. Sa ou vaaia le timu aisa o touluulu mai i lalo i le itu i matu ma saute o la’u faatoaga. Sa ou savali agai atu i la matou pa tuaoi i le itu i matu. Sa na o totonu o la matou pa tuaoi na toulu ai le timu aisa a e le mamao i totonu. Sa faatopetope atu la’u savali i le matou pa tuaoi i le itu i saute. O iina na toulu ai le timuaisa, i fafo atu o la matou pa tuaoi. E lei afaina fua o la matou faatoaga!
Sa faagaeetia o matou tuaoi i le faamanuiaina o i matou, ma sa ou toe manatua upu a Malaki “e faaamuia foi ia te outou o nuu uma lava” (Malaki 3:12). Sa faamanuiaina moni lava i matou. Ou te faafetai ona a o matou faia le mea sili matou te mafaia e usitai ai i poloaiga a le Atua, na te tausia Ana folafolaga.