Faaolaola mai Tala o le Tusi a Mamona i Vitio ua Toefaafouina

Ua toe faaolaola mai tala o le Tusi a Mamona i vitio ua toefaafouina o Tala o le Tusi a Mamona, ua maua nei gagana Kenitonisia, Peretania, Farani, Siamani, Italia, Iapani, Korea, Meniterini, Potukale, Rusia, ma le Sipaniolo i le vaega o tala o tusitusiga paia a le LDS.org.

Sa muamua maua i le initoneti i ni ata faasolosolo, ona tuuina lea i ata se vaaiga olaola e pei o se mea moni, e faaaoga ai se auala e ta’ua o ata komi e feminoia’i. E ‘oti ese faatagata ma faafeoai i le ata, ma faasolosolo malie, faanenefu, ma faamamao pe faalatalata e maua ai se vaaiga faaopoopo manaia.

O loo faaalia foi i vitio ni faaaliga o le leo ma se fatuga autu.

“O nei tala faatusi paia o le a fesoasoani e toto ai le fatu o le molimau i loto o le fanau ma isi o e maimoaina nei vitio e ala i le aoao atu o upumoni o le talalelei,” o le saunoaga lea a Brent Meisinger, o le pule o le galuega faatino i le Vaega e Faamaopoopoina Tusitusiga Paia o le Matagaluega o Mataupu Aoaoina a le Ekalesia. “E tuuina atu e vitio se aafiaga faaleaoaoga o le a uunaia ai fesootaiga masani ma tusitusiga paia ma aoao atu tomai o le a saunia ai e e maimoaina mo le suesueina atili o tusitusiga paia.”

O le toefaiga o le vitio ua aofia ai le silia i le tolu itula o anotusi ua faataape i le silia ma le 54 ni vaega eseese, mai le “Na Faapefea Ona Tatou Maua le Tusi a Mamona” (Mataupu 1) i le “O Le Folafolaga a le Tusi a Mamona” (Mataupu 54).

O ata o loo i le vitio o ata tusi na fatuina e Jerry Thompson ma Robert T. Barrett. O a laua faatufugaga na vali-limaina, sa lolomiina faasolosolo i le Friend ma le Liahona mo le toeitiiti lava sefulu tausaga, na amata mai i le 1989, ona lolomiina faatasi lea i le 1997 o Tala o le Tusi a Mamona.

E mafai foi e le au maimoa ona maimoa i vitio o ni faasalalauga pupuu i le iTunes ma o ni ata pupuu i le YouTube ma le Roku. E mafai foi e aiga ona fiafia i le polokalama o le Alaata Mamona “Scripture Stories [Tala o Tusitusiga Paia]”, lea e faitau ai tamaiti ma se taitai o le talanoaga mai i tala, ona talanoaina lea, usu ni pese, ma fefaasoaai molimau e uiga i lesona o loo i tusitusiga paia.

O vitio o Tala o le Feagaiga Fou sa faaata-komiina lata mai nei i gagana e 11. O loo maua foi i itulau o tusitusiga paia a le AAG, iTunes, ma le Alaata Mamona i le YouTube.