Apoapoai Atu ia te i Latou ia Tatalo

Saunia e Peresitene Henry B. Eyring

Fesoasoani Muamua i le Au Peresitene Sili

Ata

Peresitene Henry B. Eyring

Ao ou laitiiti, sa aoaoina a’u e ou matua e tatalo e ala i faataitaiga. Sa ou amata i lo’u vaai faalemafaufau e faapea o le Tama Faalelagi e mamao lava se mea o i ai. Ina ua ou matua, ua suia ou aafiaga e uiga i le tatalo. O le ata ua i lo’u mafaufau o se ata o le Tama Faalelagi o loo latalata mai lava, e siomia i se malamalama susulu, ma na te silafia lelei lava a’u.

Na oo mai lena suiga ina ua ou mauaina se molimau mautu e uiga i le moni o le faamatalaga a Iosefa Samita i lona aafiaga i le 1820 i Maniseta, Niu Ioka.

“Na ou vaaia ai se malamalama faaniutu i luga a’e tonu lava o lo’u ulu, ua sili atu le pupula i le la, ua alu ifo malie lava seia oo mai i o’u luga.

“Sa lei pine lava ona oo mai ae ou faalogoina ua laveaiina a’u mai le fili na taofia a’u. Ina ua oo mai le malamalama i o’u luga, sa ou vaaia ni Tagata e toalua, o lo laua pupula ma le mamalu e le mafaamatalaina, o tutu mai i o’u luga ae i le ea. Sa fetalai mai le tasi o i laua ia te a’u, ma fofoga mai ia te a’u i lo’u igoa ma fetalai mai, a’o tusi ane i le tasi—O Lo’u Atalii Pele lenei. Faalogo ia te Ia!” (Iosefa Samita—Talafaasolopito 1: 16–17).

Sa i ai le Tama Faalelagi i le vao i lena aso matagofie o le tautotogo. Sa Ia ta’u Iosefa i lona igoa. Ma sa Ia faailoa atu le Faaola toetu o le lalolagi o Lona “Atalii Pele.” Po o le a lava le taimi po o fea foi e te tatalo ai, o le a faamanuiaina oe i lau molimau e uiga i le moni o lena aafiaga mamalu.

O le Tama o loo tatou tatalo atu ai o le Atua mamalu lea na foafoaina lalolagi e ala mai i Lona Atalii Pele. Na te faafofogaina a tatou tatalo e pei ona Ia faafofogaina ma le manino le tatalo a Iosefa—e pei o loo tatalo atu i Ona luma. Ua lava Lona alofa ia i tatou ua Ia auina mai ai Lona Alo e avea ma o tatou Faaola. E ala mai i lena meaalofa ua Ia tuuina mai ai ia i tatou le avanoa ina ia maua le tino ola pea ma le ola e faavavau. Ma ua Ia ofoina mai ia i tatou, e ala i le tatalo atu i le suafa o Lona Alo, le avanoa e talanoa ai ma Ia i lenei olaga pe faafia lava ona tatou mananao ai.

Ua i ai i e umia le perisitua i Le Ekalesia a Iesu Keriso o le Au Paia o Aso e Gata Ai le tiute paia o le “asiasi atu i fale o tagata taitoatasi o le ekalesia, ma apoapoai atu ia te i latou ia tatalo atu ma le leo ma i le mea lilo” (MF&F 20:47; faaopoopo le faamamafa).

E anoanoai auala e apoapoai atu ai i se tasi e tatalo. Mo se faataitaiga, e mafai ona tatou molimau atu ua poloaiina i tatou e le Atua ina ia tatalo e le aunoa, e mafai foi ona tatou faamatalaina ni faataitaiga mai tusitusiga paia ma mai i o tatou lava aafiaga e uiga i ni faamanuiaga na oo mai ona o tatalo o le agaga faafetai, aioi, ma le sailiili. Mo se faataitaiga, e mafai ona ou molimau atu ua ou iloa e tali mai le Tama Faalelagi i tatalo. Sa ou maua se taitaiga ma le faamafanafanaga mai i upu na oo mai i lo’u mafaufau, ma sa ou iloa e ala mai i le Agaga o na upu na mai le Atua.

Na maua e le Perofeta o Iosefa Samita na aafiaga, ma e mafai foi e outou. Sa ia maua lenei tali i se tatalo faatauanau:

“Lo’u atalii e, ia filemu lou agaga; o lou tiga ma ou puapuaga o le a na o sina minute laitiiti;

“Ma ona oo lea, afai e te talitalia lelei, o le a faaeaina oe e le Atua i luga” (MF&F 121:7–8).

O se faaaliga lena mai se Tama alofa i se atalii faamaoni sa mafatia tele. E mafai e soo se atalii/afafine o le Atua ona talanoa atu ia te Ia i le tatalo. E leai se apoapoaiga e tatalo na sili atu ona tele sona aafiaga ia te au e pei o lagona o le alofa ma le malamalama lea e oo mai i tali o tatalo faamaualalo.

Tatou te mauaina se molimau e uiga i soo se poloaiga a le Atua e ala i le tausia o lena poloaiga (tagai i le Ioane 7:17). E moni lea tulaga e uiga i le poloaiga ia tatou tatalo atu ma le leo ma i le mea lilo. I le avea ai ma ou faiaoga ma au uo, ou te folafola atu o le a taliina e le Atua au tatalo ma e ala mai i le mana o le Agaga Paia, o le a e iloa ai mo oe lava ia o na tali e mai ia te Ia.

Aoao Atu mai Lenei Savali

“O ata o ni meafaigaluega taua ia mo le faamalosia o le manatu autu o se lesona” (O Le Aoao Atu, E Leai Se Isi Valaauga E Sili Ai [1999], 185). Faaali atu se ata o Iosefa Samita po o le Uluai Faaaliga. Talanoa i le aafiaga na oo ia Iosefa Samita e uiga i le tatalo. E faapefea ona anoa au tatalo pe a faapea e te vaai faalemafaufau i le “Tama Faalelagi … e latalata mai,” e pei ona faia e Peresitene Eyring?
E pei ona fautuaina mai e Peresitene Eyring, mafaufau e faasoa atu lau molimau e uiga i le tatalo, ma faamatala atu faamanuiaga na e maua ona o le tatalo, pe faasoa atu ni mau e uiga i le tatalo.

Ata na tusia e Matthew Reier