Po o Oe Ea na aumai ai le Tusi Lenei?
Cynthia Ann Lee, Nevada, ISA
Na faatoa atoa lava lo’u 21 tausaga, ma sa ou faigaluega i se faleaiga i le lotoifale o le nofoaga e faasee ai tagata i le aisa. I se tasi aoauli ina ua uma ona tapena le potu ai, sa tuu mai ai e se isi tagata faigaluega ia te au se tusi ma fai mai e manao e ave ma a’u. Sa ou faafetai atu ia te ia ma taliaina.
Sa ou tilotilo i le faavaa: o le Tusi a Mamona. Sa feemoai lo’u fia iloa, o lea sa ou manatu ai loa ou te alu i le umukuka sei siaki ai. I totonu o le faavaa sa ou maua ai se faamatalaga puupuu na tusia e lea tagata faigaluega mo au. Sa ia tusia ai e faapea, o le Tusi a Mamona o se tusi moni o le talalelei a Iesu Keriso ma sa ia iloa o le a faagaeetia ai lo’u loto. Sa tonu ia te a’u o le a faitau loa i le taimi lava lena.
Ao ou faitauina, sa siomia au e se lagona uiga ese ma le filemu. Ou te lei lagonaina lava lena lagona pe a ou faitau i se isi lava tusi e ese mai le Tusi Paia. O lo’u faamoemoega sa i ai muamua e faitau ni nai itulau na vave ona liua i ni nai mataupu. Sa le mafai ona ou tuuina i lalo le tusi. Ona ou oo atu lea i le 1 Nifae 15:11: “Tou te le manatua ea mea na fetalai mai ai le Alii?—Afai tou te le faamaaa o outou loto, ma ole mai ia te a’u i le faatuatua, ma le talitonu o le a outou maua, faatasi ma le filiga i le tausiga o a’u poloaiga, e moni o le a faailoa mai nei mea ia te outou.”
E tatau ona ou iloa pe moni lenei tusi. Ou te lei iloa pe faapefea ona ou talanoa atu i le Atua i le tatalo, o lea sa na ona ou tilotilo atu ai i luga o le faalo o le umukuka ma fesili atu, “Po o Oe ea na aumai ai lenei tusi?” O le taimi lava lena na ou lagonaina ai se tali mautu: “Ioe.” Ou te manatua lo’u mafaufau faapea, “Auoi. E sili ai la lo’u faitauina uma o le tusi!”
O le tolu masina mulimuli ane, i le uma ai o lo’u faitauina o le Tusi a Mamona, sa ou tietie atu ai e asi lou tamā i Kalefonia. E le mamao ese lava mai lona fale sa ou pasia ai se fale e i ai se ata i luma sa ou matauina. Sa vave ona ou afe i le lotoa e paka ai taavale ma sa ou tau atu i fafo i se tamaloa.
“O le a le mea a le ata o le miti a Liae i le laau o le ola o loo fai i luga o le tou fale?” o la’u fesili lea. Ona ia faailoa mai lea o lana lotu ia te au, O Le Ekalesia a Iesu Keriso o le Au Paia o Aso e Gata Ai. Sa ou aumaia la’u Tusi a Mamona mai le taavale ma amata ona ou fesiligia o ia e uiga i fasifuaitau uma ia sa ou faailogaina ao ou faitau. Sa ia faato’ato’aina au ma faamatala mai e i ai faifeautalai a le Ekalesia o e ua tuuto atu tausaga e lua o o latou olaga e taliina fesili e pei o a’u fesili.
Sa ou tuuina atu ia te ia le tuatusi o lo’u tama, ma na o mai mulimuli ane ni alii faifeautalai se toalua e asiasi mai ia te au. Sa faagaeetia au i lo la naunautai e tali uma au fesili. Sa atili foi lo’u faagaeetia ona o mataupu fou sa la aoao mai ia te au na foliga mai o ni mea masani lea ua ou toe manatuaina. O le lima vaiaso mulimuli ane na ou papatiso ai ma avea ma se tasi o le Ekalesia.
Ua tolusefululua tausaga ua mavae talu mai lena taimi, ma o loo ou faitauina pea le Tusi a Mamona i aso uma. O loo avea pea ma puna o le malamalama ma taiala mo lo’u aiga faapea ma a’u. Ou te faafetai mo perofeta anamua o e na tusitusia afioga a le Atua i papatusi auro, ia Iosefa Samita mo le onosaia o sauaga ma tofotofoga ina ia mafai ona faaliliuina ma lolomiina ia upumoni, ma i le tagata faigaluega lea na ia maua le lototoa e tuu mai ia te au se Tusi a Mamona i lena aso.