Ia Manuia le Valenitina!

Tine O. o Nairobi, Kenya

Saunia e Richard M. Romney

Mekasini a le Ekalesia

I le tele o atunuu o le lalolagi, o le Aso Valenitina—14 o Fepuari—e faamanatuina o se aso o le alofa. Ae e faapefea pe afai o lou igoa o Valenitina? Pe e avea la aso uma o se aso o le alofa?

O le lagona lena o le teineitiiti e iva tausaga o Tine O. o Nairobi, Kenya, e uiga i ai. E valaau o ia e tagata uma ia “Tini,” ae o lona igoa atoa o Valenitina.

“Sa faaigoa au ia Valenitina ona sa ou fanau i le aso 14 o Fepuari,” o lana tala lea. Ma o le faamaoni i lona igoa, e taumafai ai o ia e alofa i tagata uma. “Ina ua ou papatiso, sa ou tauaveina i o’u luga le suafa o Iesu Keriso,” o lana tala lea. “O lona uiga e tatau ona ou alofa i tagata uma lava, e pei foi ona Ia faia.”

E faapefea ona faia e Tine ia aso uma o se aso o le alofa? E tele lava auala.

“O le mea muamua ou te faia o le fai o au tatalo,” na ia fai mai ai. “Ou te faafetai i le Tama Faalelagi mo Lona Alo aua ou te alofa ia Iesu Keriso. Ou te faafetai i le Tama Faalelagi mo lo’u aiga ma mo le auala e faatasia ai e malumalu ia aiga ona ou te alofa i lo’u aiga. Ona ou ole atu lea i le Tama Faalelagi e faamanuia i e mama’i aua ou te iloa e alofa foi o Ia i tagata mama’i.”

O Le Aiga o Tine

O Tine o le uii o lona aiga, ma e toatolu ona tuagane ma ona uso e toalua e matutua atu ia te ia. “E fesoasoani mai o ia ia te au pe a ou manaomia se mea,” o le tala lea a Siaosi, le tuagane o Tine. “E pei [o le taimi] i le aoga, ina ua leiloa la’u peni, sa ia aumai ia te au le tasi o ana peni.” Fai mai lona uso o Brenda, e le ita Tine pe a faasa’o atu o ia e se tasi.

I le fale e tautatala le aiga o Tine i le gagana Suali ma le Igilisi. E fiafia e fai a latou afiafi faaleaiga. “Matou te suesue faatasi i tusitusiga paia,” na fai mai ai Tine. “Matou te aoao e uiga i le Faaola, ma matou te feauauai i le faiga o tatalo faale-aiga.”

Fai mai Tine, “Ou te taumafai ia faapei o Iesu e ala i le agalelei atu, alu i le lotu, ma usitai i o’u matua.”

Mea Moni Malie e uiga ia Tine

• Pese e sili ona fiafia i ai: “Matou Te Aumaia le Upu Moni i le Lalolagi” (Tusipese a Tamaiti, 92–3)

• Gaoioiga e sili ona fiafia i ai: Tafue ma le aoao e kuka

• Meaai e sili ona fiafia i ai: Fuamoa

• Meaola e sili ona fiafia i ai: O lana tamai maile e igoa ia Sandra. E fiafia foi Tine i meaola aivao. “O le tuaoi o Nairobi, o le laumua o le matou atunuu, o loo i ai se tasi o faasao aupito tele mo meaola aivao i Aferika,” o le tala lea a Tine. “E tele meaola o soo se ituaiga e i ai iina. Ou te iloa e alofa le Tama Faalelagi i meaola. O meaola sa avea o se vaega taua o le Foafoaga o le lalolagi. O Iesu Keriso o le Foafoa, ou te mautinoa lava, e alofa foi o Ia i meaola.”

E alofa Valenitina i lona aiga. E fiafia foi o ia e aoao e uiga ia Iesu Keriso.

Ata na pueina e Richard M. Romney