Mainampingon nga Pagbantay ug Pangalagad pinaagi sa Visiting Teaching

Tun-i kini nga materyal ug, kon angay, hisguti kini uban sa mga sister nga inyong bisitahan. Gamita ang mga pangutana aron pagtabang kaninyo sa paglig-on sa inyong mga sister ug sa paghimo sa Relief Society isip aktibong bahin sa inyong kaugalingon nga kinabuhi.

Hugot nga Pagtuo, Pamilya, Kahupayan

“Ang gugmang putli [nagpasabut nga] mas labaw pa kay sa pagbati og kalooy,” mitudlo si Presidente Henry B. Eyring, Unang Magtatambag sa Unang Kapangulohan. “Ang gugmang putli nagagikan sa hugot nga pagtuo diha kang Ginoong Jesukristo ug mao ang usa ka epekto sa Iyang Pag-ula.”¹ Alang sa mga sister sa Relief Society, ang visiting teaching mahimo nga gugmang putli nga inubanan sa lihok, usa ka importante nga paagi sa pagpakita sa atong hugot nga pagtuo sa Manluluwas.

Pinaagi sa visiting teaching, makahatag kita og mainampingon nga pagbantay pinaagi sa pagkontak sa matag sister, pagpakigbahin og mensahe sa ebanghelyo, ug pagpaninguha nga mahibalo sa iyang mga panginahanglan ug sa mga panginahanglan sa iyang pamilya. “Ang visiting teaching mahimo nga buluhaton sa Ginoo kon ang atong gipunting [focus] mao ang mga tawo kay sa mga porsiyento,” pasabut ni Julie B. Beck, kinatibuk-ang presidente sa Relief Society. “Sa tinuod, ang visiting teaching dili gayud mahuman. Kini kabahin na sa kinabuhi kay sa buluhaton. Ang matinud-anon nga pag-alagad isip usa ka visiting teacher usa ka ebidensya sa atong pagkatinun-an.”²

Samtang maghatag kita og mapadayunon ug maampoon nga pagbantay, makakat-on kita kon unsaon pagpangalagad sa labing maayong paagi ug pagtubag sa mga panginahanglan sa matag sister ug sa iyang pamilya. Ang pagpangalagad mahimo sa daghang mga paagi—ang uban dako ug ang uban dili kaayo dako. “Sa kasagaran ang gagmay nga mga buhat sa pagserbisyo mao ra ang gikinahanglan sa pagbayaw ug pagpanalangin sa uban: usa ka pangutana mahitungod sa pamilya sa tawo, mubo nga mga pulong sa pag-awhag, usa ka sinsero nga pagdayeg, usa ka gamay nga sulat sa pasalamat, mubo nga tawag sa telepono,” mitudlo si Presidente Thomas S. Monson. “Kon kita mapaniiron ug nakaamgo, ug kon kita mobuhat sa mga pag-aghat nga moabut kanato, kita makahimo og daghang kaayohan. … Dili maihap ang mga buhat sa pagserbisyo nga ikahatag sa daghang mga miyembro sa mga visiting teacher sa Relief Society.”³

Gikan sa mga Kasulatan

Juan 13:15, 34–35; 21:15; Mosiah 2:17; Doktrina ug mga Pakigsaad 81:5; Moises 1:39

Gikan sa Atong Kasaysayan

Niadtong 1843, ang mga miyembro sa Simbahan sa Nauvoo, Illinois, gibahin sa upat ka mga ward. Pagka-Hulyo nianang tuiga, ang mga lider sa Relief Society mipili og visiting committee nga upat ka sister sa matag ward. Ang mga responsibilidad sa mga visiting committee naglakip sa pagbana-bana sa mga panginahanglan ug pagpangolekta og mga donasyon. Ang Relief Society migamit niini nga mga donasyon sa pagsangkap alang sa nanginahanglan.⁴

Bisan og ang mga visiting teacher dili na mangolekta og mga donasyon, nagpabilin kanila ang responsibilidad sa pagbana-bana sa mga panginahanglan—espirituhanon ug temporal—ug sa pagtrabaho aron matubag kadto nga mga panginahanglan. Si Eliza R. Snow (1804–87), ikaduha nga kinatibuk-ang presidente sa Relief Society, mipasabut: “Ang visiting teacher … kinahanglan nga magbaton og hilabihan sa Espiritu sa Ginoo, kon siya mosulod sa balay aron mahibalo kon unsa nga espiritu ang iyang mahimamat didto. … Pangaliyupo sa Dios ug sa Espiritu Santo nga makabaton [sa Espiritu] aron mahimo ninyo ang paghimamat niana nga espiritu nga maoy nagpatigbabaw niana nga balay … ug basin bation ninyo nga mamulong sa kalinaw ug kahupayan, ug kon makita ninyo ang sister nga kulang na og kadasig, gaksa siya diha sa imong dughan sama sa imong buhaton sa pagpainit sa bata diha sa imong dughan.”⁵

Paghulagway sa litrato pinaagi ni Matthew Reier