Pagdiskubre Pag-usab sa usa ka Katingalahan sa Kalibutan… ug Paglikay sa mga Kakuyaw sa Kakulang sa Espirituhanong Pagbati
Si Ciro Villavicencio mibana-bana nga atol sa iyang unang tulo ka tuig isip usa ka tour guide didto sa rehiyon sa Cusco sa Peru, nakagiya siya og dul-an sa 400 ka mga tour ngadto sa Machu Picchu, ang sikat nga “nawalang siyudad” sa mga Inca. Apan, bisan human sa iyang daghan nga mga pagbisita, kining dapita—nga nalakip sa nagkalain-laing mga listahan sa mga katingalahan sa kalibutan—wala mawad-i sa kaanindot alang kaniya.
“Sa kanunay adunay bag-ong butang nga makat-unan,” siya miingon. Ang paggahin og pipila ka oras sa pagdala sa usa ka grupo sa mga bisita ngadto sa Machu Picchu dili na bag-o alang ni Ciro. Bisan pa niana, iyang nakita kon unsa kasayon nga mawala kana nga katingalahan. Pipila sa iyang mga kauban ang mohimo sa tibuok nga tour sulod sa 45 ka minutos. “Mawad-an na sila og kadasig,” siya miingon.
Si Ciro, usa ka miyembro sa Chasqui Ward ug high councilor sa Cusco Peru Inti Raymi Stake, nagtuo nga ang pagsabut sa pagkawalay kadasig sa iyang mga kauban makatabang sa mga miyembro sa Simbahan nga molambo ang kadasig sa lain nga katingalahan sa kalibutan—ang labing mahinungdanon—ang “kahibulongan nga buhat ug usa ka katingalahan” sa gipahiuli nga ebanghelyo ni Jesukristo (2 Nephi 25:17).
Ang mga Kakuyaw sa Katingalahan nga Nawala
Gibiyaan sa mga Inca sa kaulahiang bahin sa mga 1500 ug wala madiskubre sa mga tigbuntog, kining nalahi nga siyudad sa bukid sa Peruvian Andes nawala sa panan-aw sa tanan gawas sa pipila lamang nga nasayud niini. Pagsingabut sa ika-20 ka siglo, ang pagkadiskubre niini sa taga-laing dapit sa kalibutan nagdala og mga panon sa mga tigsiksik ug mga turista.
Human sa mga dekada nga pagtuon, “ang uban nga mga tawo naghunahuna nga nakita na nila ang tanan nga makit-an diha sa Machu Picchu,” miingon si Ciro. “Sa higayon nga ang mga tawo maghunahuna nga ang tanan nakit-an na o ang tanan nahuman na, sila mohunong o dili na mohatag og bili sa butang o sa paningkamot.”
Nabalaka si Ciro nga ang sama nga pagkompiyansa mahimong mahitabo diha sa Simbahan. Nakita niya kon sa unsang paagi nga ang panahon ug kapamilyar mahimong modala sa pipila ka mga miyembro “sa pagkaanam og ka kulang sa pagkahibulong sa usa ka timailhan o sa usa ka katingalahan nga gikan sa langit, nga sa ingon sila [magsugod] sa pagpatig-a sa ilang mga kasingkasing, ug buta sa ilang mga panghunahuna, ug [magsugod] sa dili pagtuo sa tanan diin sila nakadungog ug nakakita” (3 Nephi 2:1).
Kining pagkawala sa katingalahan mahimong mobutang sa mga miyembro sa kapeligro ngadto sa mga panlimbong ni Satanas, sama sa: Dili na ikaw kinahanglan nga maminaw niana nga mamumulong; nakahibalo na ka niining tanan. Dili na ka kinahanglan nga moadto pa sa Sunday School; nakadungog na ka niana nga leksyon sa una. Dili na ka kinahanglang magtuon sa imong mga kasulatan karon; walay bag-o diha.
“Ug sa ingon si Satanas mipanag-iya [gayud] sa mga kasingkasing sa mga katawhan” (3 Nephi 2:2).
Ang pagsinati og pagtaas ug pag-us-os sa kadasig sa pagkat-on sa ebanghelyo sagad nga mahitabo. Apan kadtong kinsa motugot sa pagkunhod diha sa espirituhanong pagkat-on nga sa kadugayan mahimong kinaiya anaa sa kakuyaw sa pagkawala “gani bisan kana nga anaa na kanila” sa espirituhanon nga pagsabut (2 Nephi 28:30; tan-awa usab sa Mateo 25:14–30).
Pagdasig og Balik sa Katingalahan
Ang pagsabut sa tulo ka mga kamatuoran nakatabang ni Ciro nga magpabiling matudloan bisan pa man sa pagpatigbabaw sa kakulang sa pagbati:
1. Adunay daghan pa nga kinahanglan nga akong masayran.
Atol sa mga panahon sa labihan nga pagtuon sa ebanghelyo didto sa iyang misyon ug isip usa ka magtutudlo sa institute, nadiskubrihan ni Ciro nga sa kanunay aduna pay angay nga makat-unan, bag-o man kini nga baruganan o bag-o nga paggamit sa usa nga nakat-unan na niya. Mas importante, kanang bag-o nga espirituhanong kahibalo mao ang sagad nga butang nga iyang kinahanglan nga masayran aron makasugakod sa bisan unsa nga mga hagit nga iyang giatubang—o atubangon.
“Kabahin sa pagkahimong matudloan,” miingon siya, “mao ang paghinumdom nga sa kanunay adunay butang nga wala nako masayri nga tingali kinahanglan nakong masayran.”
2. Nagkinahanglan ko sa tabang sa Espiritu Santo aron masayud kon unsay akong kinahanglan.
Kon kamo wala masayud sa unsay kinahanglan ninyong masayran, nagkinahanglan kamo og magtutudlo nga adunay kahibalo (tan-awa sa Juan 14:26). Samtang si Ciro nagtuon sa mga kasulatan nga siya ra o uban sa iyang asawa o sa iyang pag-apil sa mga klase ug mga miting, mapahinumduman siya kanunay nga dili kini igsapayan kon kapila siya nakabasa sa piho nga bersikulo o nakadungog sa piho nga konsepto.
“Ang Espiritu makatudlo kanako sa mga butang nga wala gayud nako mahunahunai,” miingon siya. “Ang Espiritu Santo mao ang magtutudlo.”
3. Ang pagkat-on nagkinahanglan og paningkamot sa akong bahin.
Ang pagkat-on usa ka padayon nga buluhaton dili lumalabay lamang.1 Nagkinahanglan kini og tinguha, paghatag og pagtagad, partisipasyon, ug paggamit sa mga baruganan nga nakat-unan (tan-awa sa Alma 32:27).
“Kinahanglang maningkamot ko nga makat-on,” miingon si Ciro. “Ang Langitnong Amahan dili mopugos kanako sa pagkat-on og bisan unsa.”
Ang Katingalahan Gigantihan
Alang ni Ciro, ang Machu Picchu nagpabilin nga usa ka katingalahan sa kalibutan tungod kay, hangtud nga ang mga tigsiksik nagtuon pa niini, sila nagantihan og bag-o nga mga nadiskubrihan ug dugang nga kahibalo.
Bisan human sa usa ka siglo nga pagtuon, ang mga archaeologist sa pipila lamang ka tuig ang milabay nakakita og usa ka lugar nga lubnganan, mga ceramic, ug gani dugang nga mga istruktura nga naghagdan-hagdan, ang tanan niini nadugang ngadto sa unsay nahibaloan mahitungod sa Machu Picchu ug sa mga Inca.
Ingon usab niana ang pagtuon sa ebanghelyo ni Jesukristo. “Sa kanunay adunay bag-ong butang nga madiskubrihan diha sa ebanghelyo alang niadtong kinsa naningkamot,” miingon si Ciro.
Ingon nga ang bag-ong mga nadiskubre sa Machu Picchu nakalig-on sa miaging kahibalo, nga naghatag sa mga tigsiksik og mas kompleto nga pagsabut, “siya nga dili mopatig-a sa iyang kasingkasing, ngadto kaniya ihatag ang dako nga bahin sa pulong, hangtud kini ihatag ngadto kaniya ang kasayuran sa mga misteryo sa Dios hangtud siya masayud kanila sa hingpit” (Alma 12:10; tan-awa usab sa D&P 50:24).
“Ang ebanghelyo mao ang walay hunong nga tinubdan sa buhi nga katubigan diin kita kinahanglan nga mobalik-balik sa kanunay,” miingon si Ciro.
Ang Kahibulongan nga Buhat sa Katingalahan
Samtang si Ciro nagtan-aw gikan sa usa ka gamayng patag sa may pang-pang sa tumoy sa Machu Picchu, dinosena sa nagkalain-laing mga grupo sa turista ang naglakaw taliwala sa karaan nga mga building. Alang kang Ciro ang trahedya sa pagkawala sa kadasig diha sa pipila sa iyang mga kauban mao nga kini nakapadaut dili lamang kanila apan niadtong kinsa makasinati unta sa katingalahan pinaagi kanila.
Ang pagpabiling madasigon sa katingalahan sa ebanghelyo mopanalangin dili lamang sa tawo apan niadtong iyang makauban. “Ang kausaban nga mahimo sa ebanghelyo diha sa kinabuhi sa mga tawo usa ka katingalahan,” miingon si Ciro. “Ug kadtong kinsa nakasinati niana nga kausaban sila mismo mahimong usa ka katingalahan diha sa kinabuhi sa uban.”
Mga litrato pinaagi ni Adam C. Olson, gawas kon gipahibalo
Litrato sa hayop © Getty Images; litrato sa mga kasulatan pinaagi ni Cody Bell