Basaha ang Imong Basahon ni Mormon
Jewelene Carter, Virginia, USA
Unta kami napuno sa kalipay, apan ang among kasingkasing nagmagul-anon pag-ayo ug ang among mga bukton nanghuyhoy. Si Debra Caelia Carter natawo niadtong, Abril 26, 2010, apan patay nang daan pagkahimugso.
Sa among pagsulod sa balay, akong gibitbit ang gamayng pink nga habol nga among gigamit sa pagkupot ug pagkugos ni Debra sa ospital. Samtang naglingkod ko sa sofa, napuno sa emosyon, ang among dos anyos nga anak nga lalaki miduol sa walay sulod nga habol ug mihunghong, “Hi, manghud nakong babaye. Gihigugma ko ikaw.”
Ang mga luha midagayday sa akong nawong, ug mipahawa ko. Sa akong pagbuhat niini, akong nakita ang mga pulong sa poster gikan sa magasin nga Friend nga gibitay sa bongbong: “Ang atong Langitnong Amahan usa lamang ka pag-ampo ang gilay-on, ug ang Espiritu Santo duol ra kaayo aron madungog sa usa ka tawo ang iyang paghunghong.”1
Gisugdan nako ang pagpangamuyo ngadto sa Dios sa hilum, matinguhaong nag-ampo. Samtang gibuhat ko kini, nabati nako ang Espiritu Santo nga naghunghong, “Basaha pag-usab ang imong Basahon ni Mormon.” Bag-ohay lang ko nakahuman og basa niini, apan ang pagbati lahi ug ang impresyon klaro.
Mibangon og sayo pagkabuntag, misugod ko sa pagbasa sa Basahon ni Mormon. Gigamit nako ang mga lapis ug mga igmamarka sa pag-highlight sa matag bersikulo kabahin sa hugot nga pagtuo, pag-ampo, paglaum, mga kinaiya ni Jesukristo, pagtudlo sa ebanghelyo, ug pagpatalinghug sa tingog sa Dios. Nasayud ko nga kinahanglan nakong buhaton ang gibuhat nila ni Nephi, Enos, Moroni, ug uban pang mga propeta sa Basahon ni Mormon sa dihang sila nag-antus. Ug buhaton ko gayud kini nga may samang gugma alang sa Manluluwas nga mipuno sa ilang kinabuhi sa malisud nga mga panahon.
Atol niining matag adlaw, personal nga pagtuon sa kasulatan, nabati nako ang bukton sa Ginoo nga migakos kanako uban sa Iyang gugma, ug nabati nako ang gahum sa sakripisyo sa Iyang pag-ula alang sa tanan. Ang Espiritu namulong ngari kanako, nasanapan ako sa kalinaw, ug ang mga tubag miabut sa akong matinguhaong pag-ampo. Ang pagpamalandong sa mga pulong nga akong gibasa nakapalig-on kanako samtang ako nagbangutan.
Usa ka adlaw ang Espiritu mipuno kanako sa kalipay samtang nagbasa ako niining mga pulong:
“Ako nahigugma sa gagmay nga mga bata uban sa usa ka hingpit nga gugma; ug silang tanan managsama ug tig-ambit sa kaluwasan. …
“Ang gagmay nga mga bata … silang tanan buhi diha [sa Dios] tungod sa iyang kalooy. …
“Kay tan-awa ang tanan nga gagmay nga mga bata buhi diha kang Kristo” (Moroni 8:17, 19, 22; empasis gidugang).
Mibati ko nga ingon og nakita nako ang akong anak nga babaye nga buhi diha ni Kristo—nagpahiyum ug nalipay ug Iyang gigakos. Sukad niadto nabati nako ang gahum sa paglahutay, ug nabati nako ang bag-ong paglaum nga midilaab diha sa akong kalag alang sa akong pamilya. Nasayud ko nga kon kita mosalig pag-ayo sa Pag-ula, sa mga kasulatan, sa mga pulong sa buhing mga propeta, ug sa usag usa pinaagi sa atong mga pakigsaad sa templo, kita mahiusa pag-usab isip usa ka pamilya sa kahangturan.
Ganahan kaayo ko sa Basahon ni Mormon, nga klarong nagpamatuod ni Jesukristo, unsa ang Iyang gibuhat ug buhaton alang kanato, ug unsa ang atong buhaton aron mahisama Kaniya. Ang Basahon ni Mormon nagdala og kahayag sa akong kinabuhi ug nagpuno sa akong kasingkasing uban sa paglaum diha kang Kristo.