Ang mga Visiting Teacher Migiya Kanako ngadto ni Jesukristo

Ni Jayne P. Bowers

“[Ang Ginoo] miingon kang [Pedro] sa ikatulo, Gihigugma mo ba ako? Ug [si Pedro] miingon kaniya, Ginoo, nasayud ikaw sa tanan; nasayud ka nga gihigugma ko ikaw. Si Jesus miingon kaniya, Pakan-a ang akong mga karnero” (Juan 21:17).

Sa kaulahiang bahin sa mga 1970, usa ka higala mihangyo kanako nga mouban kaniya ngadto sa Relief Society. “Unsa kana?” nangutana ko. Ang akong higala mitubag lamang og, “Adto ug tan-awa.” Kanindot! Nadani ko sa unang higayon.

Wala madugay niana nga summer si Leann miabut sa among panimalay ug miingon nga siya ang akong visiting teacher. Daw lahi kini ug talagsaon sa samang higayon, ilabi na nga dili pa ko miyembro sa Simbahan. Ania siya migahin og oras bisan sa iyang kadaghan og buhat aron sa pagpakigbahin og espirituhanon nga panghunahuna ngari kanako ug aron sa pagsusi kon aduna ba siyay ikatabang kanako. Nasayud ko nga siya sinsero. Wala gayud ako malimot ni Leann ug sa mga mensahe nga iyang gipakigbahin kanako.

Duha ka tuig ang milabay, si Frances mibalhin sa among ward. Sa pagkatinuod, dili gayud kadto “among” ward kay dili pa man ko miyembro, apan ingon niana ang akong paghunahuna. Niining higayuna aduna na koy duha ka gagmayng mga anak nga babaye, ug akong nakita kon giunsa sa mga auxiliary sa Simbahan pagpanalangin sa ilang kinabuhi. Mag-ulan man o mag-init, si Frances, ang akong bag-ong visiting teacher, mibisita kanako mohatag og leksyon, mopakatawa, moistorya, o motabang. Akong nahinumduman sa dihang si Frances miabut usa niana ka hapon nga daghan kaayo og buluhaton. Nakakita nga dili ko makalingkod ug makig-istorya, gisugkay ni Frances ang akong giluto diha sa stove samtang akong giatiman ang mga panginahanglan sa akong anak nga mga babaye.

Katuigan ang milabay ug mibalhin ko. Bisan og dili ko ganahan nga mobiya sa akong mga higala sa Simbahan, wala madugay nakakaplag ko og laing grupo sa mga sister nga may lig-on nga mga pagpamatuod ug maloloy-ong kasingkasing diha sa Relief Society sa “akong” bag-ong ward. Ang magtutudlo sa Relief Society mihatag kanamo og usa ka giadornohan nga lista sa angayng buhaton ug miawhag kanamo sa pagsulat sa “Pagmabination” diha sa kinaunhan sa among mga listahan matag adlaw. Ang mga sister nga naglingkod sa akong tupad ug ako naghunahuna nga nindot kaayo kadto nga ideya, ilabi na kay kini misuporta sa motto sa Relief Society nga “Ang gugmang putli dili mopakyas” (Moroni 7:46).

Dayon nagbasa ko og usa ka istorya mahitungod sa usa ka pioneer nga babaye. Sa dihang kana nga babaye bata pa, ang propeta mihangyo sa iyang pamilya sa pagtabang sa pagpahimutang sa usa ka komunidad sa mga Santos sa Ulahing mga Adlaw diha sa usa ka hilit nga dapit. Miabut ang trahedya sa dihang ang usa sa iyang mga igsoon namatay. Ang iyang inahan naguol og maayo, ug ang grabe nga kasubo misanap sa pamilya.

Usa ka adlaw kining batang babaye naglantaw gawas sa bintana. Kutob sa maabut sa iyang panan-aw, usa ka nagtipun-og nga snow ang nagpalibot sa ilang kabus nga panimalay. Samtang ang batang babaye mitutok sa unahan nga dapit, nakakita siya og duha ka tawo nga nagpaingon sa balay. Nagkaduol sila, hinay-hinay nga naglakaw, ug dayon ang bata nakaila kon kinsa sila—sila ang mga visiting teacher sa iyang inahan.

Kana nga istorya nakapadasig kanako. Nabunyagan ko pagka-Mayo 1983. Dako kini nga dungog nga ako mismo mahimong usa ka visiting teacher. Ganahan ko nga makig-uban sa daghang mga kababayen-an nga nagrepresentar sa “usa ka babaye nga takus” kansang “bili labaw pa kay sa mahal nga mga bato” (Mga Proverbio 31:10). Talagsaon nga makauban ang mga kababayen-an nga naningkamot sa pagkamabination, paghigugma sa usag usa, ug pagdala sa uban ngadto ni Kristo.

Ang mga Panalangin sa Visiting Teaching

Imahe

Barbara Thompson

“Daghang mga babaye ang mireport nga ang hinungdan sa ilang pagbalik ngadto sa pagkaaktibo sa Simbahan tungod kay ang usa ka matinud-anon nga visiting teacher miduaw matag bulan ug nangalagad ngadto kanila, miluwas kanila, naghigugma kanila, nagpanalangin kanila. …

“Usahay ang labing importante nga panalangin sa inyong pagbisita mao lamang ang pagpaminaw. Ang pagpaminaw makahatag og kahupayan, pagsabut, ug pag-ayo. Sa gihapon sa laing higayon tingali nagkinahanglan kamo nga molihok ug motrabaho sa panimalay o motabang sa pagpahilum sa naghilak nga bata.”

Barbara Thompson, ikaduhang magtatambag sa kinatibuk-ang kapangulohan sa Relief Society, “Ug sa Uban Pagbaton og Kalooy, Maghimo og Kalainan,” Liahona, Nob. 2010, 120.

Sa unsang paagi nga ang mga visiting teacher napanalanginan pinaagi sa ilang pagserbisyo?

Si Barbara Thompson mitabang nga matubag kini nga pangutana diha sa iyang pakigpulong sa miting sa kinatibuk-ang kapangulohan sa Relief Society “Ug sa Uban Pagbaton og Kalooy, Maghimo og Kalainan” (Liahona, Nob. 2010, 120):

“Kon ako mag-visiting teaching, kanunay gayud akong mobati og mas nindot. Ako gidasig, gihigugma, ug gipanalanginan, kasagaran mas labaw pa kay sa sister nga akong gibisitahan. Ang akong gugma milambo. Ang akong tinguha sa pagserbisyo milambo. Ug akong makita kon unsa kanindot ang paagi nga giplano sa Langitnong Amahan alang kanato sa pagbantay ug pag-amuma sa usag-usa.”

Ikonsiderar ang pagsulat sa inyong pagpamatuod kabahin sa visiting teaching o home teaching diha sa inyong journal.

Ang mga visiting teacher mopakigbahin og usa ka mensahe sa ebanghelyo ug usahay motabang. Ang mga sister nga ilang gibisitahan nalig-on pinaagi sa pakig-uban sa mga kababayen-an kinsa naningkamot sa pagkamabination, paghigugma sa usag usa, ug pagdala sa uban ngadto ni Kristo.