Mga Santos sa United Kingdom, sa Brazil Miapil sa mga Adlaw sa Pagserbisyo
Sukad midapit ang Unang Kapangulohan sa tanang miyembro sa Simbahan niadtong miaging Abril sa pag-apil sa usa ka adlaw nga pagserbisyo alang sa umaabut nga tuig, ang mga Santos sa tibuok kalibutan misanong. Sa pinakaminos duha ka nasud—ang mga unit sa United Kingdom ug Brazil—miapil sa hiniusa nga paningkamot uban sa ubang mga miyembro ngadto kaugalingon nilang mga nasud.
United Kingdom
Pagka-Lunes, Septyembre 5, 2011, ang mga miyembro sa 11 ka stake libut sa England, kauban sa Area President nga si Erich W. Kopischke sa Seventy, nag-abut alang sa proyekto sa Helping Hands sa Tottenham Marshes.
Ang panghitabo nagtimaan dili lang sa ika-75 nga anibersaryo sa programa sa welfare sa Simbahan apan usab sa opisyal nga pag-abli og usab sa 2011 nga Capital Clean-Up Campaign sa London. Sulod sa lima ka oras, ang mga miyembro—inuyunan sa opisina sa mayor—nangibut sa mga sagbut, namugha og kahoy, namutol sa tag-as nang mga tanom, ug namunit sa mga sagbut gikan sa Lee Valley Park.
Sa mao gihapon nga adlaw ang mga miyembro sa laing mga dapit sa London miapil sa proyekto sa Helping Hands sa Haven House Children’s Hospice ug sa Richard House Children’s Hospice.
Didto sa Richard House, 18 ka miyembro sa Stratford Ward mipintal sa wanang sa opisina, nangibut og sagbut, namung-ol sa mga tanom, nanilhig sa mga nataran, ug miayo sa mga kagamitan. Kini ang unang higayon nga ang hospice nakontak sa Simbahan, miingon si Charlotte Illera, project manager alang sa proyekto sa pagserbisyo sa Richard House.
“Natandog ako kon giunsa sa mga volunteer sa paghimo ang buluhaton uban sa kahinam ug kamaya,” miingon siya. “Bisan ang yano nga trabaho sama sa pagpanilhig sa agianan gihimo sa pinakamaayo.”
Kapin sa pipila ka bulan ang milabay, ang mga miyembro sa Great Britain ug Northern Ireland nag-organisar ug miapil sa daghang mga proyekto sa pagserbisyo sa tibuok nasud.
Brazil
Niadtong Hulyo 30, 2011, ang yellow nga mga saliko midominar sa talan-awon sa gatusan ka mga proyekto sa pagserbisyo sa tibuok Brazil agig pagsaulog sa ika-12 nga anibersaryo sa Mormon Helping Hands, usa ka programa sa Ang Simbahan ni Jesukristo sa mga Santos sa Ulahing mga Adlaw nga nagtinguha sa paghatag og serbisyo sa komunidad ug kahupayan sa kalamidad ngadto sa nanginahanglan.
Ang Mormon Helping Hands (Mãos que Ajudam) sa tinuoray nagsugod sa Brazil isip usa ka paagi sa pakig-ila-ila og mga higala ug mga silingan uban sa tawhanong mga paningkamot sa Simbahan. Karon nahimo na kining usa ka dako nga tinuig nga kalihokan.
Ang adlaw sa pagserbisyo karong tuiga puno sa mga pagpanganta, pagpangatawa, ug hugyaw samtang ang 120,000 ka mga lalaki, babaye, ug mga bata nanilhig sa kadalanan, milimpyo sa mga eskwelahan, miayo sa mga building, mipanindot sa mga parke, ug miapil sa ubang mga proyekto sa pagserbisyo sa pinakalapad, pinakadaghan og tawo nga nasud sa Latin America. Ang mga miyembro sa Simbahan nakig-alayon sa mga sakop sa komunidad sa pagserbisyo nga makaayo sa tanan.
Didto sa Belo Horizonte, Recife, ug Bahia, kapin sa 6,000 ka mga volunteer ang milihok aron sa pagpakigbatok sa sakit nga dengue. Didto sa Rio de Janeiro, ang mga volunteer milimpyo sa pangpublikong mga eskwelahan ug sa mga day care center. Didto sa Porto Alegre, 1,500 ka mga volunteer milimpyo sa mga eskwelahan, ug ang uban miapil og mga klase kabahin sa paglikay sa paggamit og drugas.
Kapin sa duha ka bulan sa wala pa ang adlaw sa pagserbisyo, kapin sa 500 ka mga volunteer mitrabaho sa pagpangolekta sa gidonar nga mga pagkaon nga ipanghatag ngadto sa 175 ka nanginahanglan nga mga pamilya sa São Jose niadtong Hulyo 30.
Ang mga miyembro sa Blumenau midonar og gibana-bana nga 300 ka libras (136 kg) nga pagkaon ngadto sa Casa de Apoio às Crianças Portadoras de Mielomeningocele e Neoplasia (Balay nga Nagsuporta og mga Bata nga Dunay Sakit sa Bukog sa Buko-buko ug Tumor). Ang mga bolunter mitudlo usab sa nag-unang mga baruganan sa pagtipig og pagkaon ngadto sa institusyon.
“Ang mga teknik nga among nakat-unan makatabang sa among pagtipig sa pagkaon sa among tipiganan, tungod kay daghan sa among pagkaon madaot tungod sa umog sa palibut,” ang social worker nga si Adriane J. Backes Ruoff miingon.
Kapin sa 11 ka mga stake gikan sa England ang nanag-abut niadtong Septyembre 5, 2011, aron sa paghimo og proyekto sa pagserbisyo sa tulo ka managlahing dapit sa sulod ug sa palibut sa London.
Litrato sa maayong kabubut-on ni lindsey phillips