Pagdala sa Primary ngadto sa Panimalay
Ang Kabubut-on Mao ang Gasa sa Pagpili alang sa atong mga Kaugalingon
Inyong magamit kini nga leksyon ug kalihokan sa pagkat-on og dugang mahitungod sa tema sa Primary karong bulana.
“Happy birthday, Juliana!” Miingon si Papa. Iyang gihatagan si Juliana og usa ka kahon nga giputos sa sinawon nga papel ug gihigtan og laso.
Si Juliana mipahiyum. Naghinam-hinam siya nga makadawat og regalo gikan sa iyang amahan ug dili na makahulat aron ablihan ang kahon.
Maghinam-hinam ba kamo sama ni Juliana kon makadawat kamo og regalo? Ang Langitnong Amahan mihatag sa matag usa kanato og bililhon nga regalo. Gitawag kini og kabubut-on. Ang kabubut-on mao ang abilidad sa paghimo og atong kaugalingong mga pagpili.
Sa wala pa kita moanhi sa yuta, si Satanas dili gusto ni bisan kinsa nga adunay kapilian. Gusto niya nga pugson kita nga moanhi sa yuta ug mobuhat sa unsay gusto niya nga atong buhaton. Apan ang Langitnong Amahan nasayud nga importante alang kanato nga mohimo sa atong kaugalingong mga pagpili. Sa matag husto nga pagpili nga atong mahimo, mas mahiduol kita sa Langitnong Amahan ug ni Jesukristo. Gusto nila nga mohimo kita og maayo nga mga pagpili aron makabalik kita pag-usab sa pagpuyo uban Kanila.
Karong tuiga sa Primary magkat-on kita kalabut kon unsaon nga kita makagamit sa atong kabubut-on sa PAM—pilia ang matarung!
Mga paghulagway pinaagi ni Maryn Roos