Nakon Frieda
Kairake ni Ikawai a koroi reeta n reirei nakon te kairake n ataeinnaine are e titiraki bwa e kona n ni maeka ma raona ae te mwaane.
N te aonaaba ni bibitakin anua aika a kakawaki, n teimatoa ni kokoaua nakon ara kainibaire e bon rangi ni kakawaki ibukin kamaiuan te tamnei. Ngkana ti motikia bwa tina anga maiura ni karinei ara berita ao e kona ni kakorakoraira ni kaitarai taian karirii.
Unimwaane Neal A. Maxwell (1926–2004) man te Kooram n Tengaun ma Uoman n Abotoro e maroroakina te babaire are e kona ni buokira n tiku n te koaua: “E aki taekinna Iotua bwa kam na rinea te ririki ae e na roko bwa antai ae kam na toro irouna; e taetae ibukin te ‘bong aei,’ ngkai e tabe n oota te ngaina ao imwaain ae e a manga okira arona te roo. (tara Iotua 24:15.) … Mwakuri ngkai, n te aro bwa te ngaa te ririki mangkai, ngkana ko tanrikaaki n taraa te tai aei, ko kona ni kangai bon te tai ae riai—aio te bong n nanomatoa.”1
Frieda,* te ikawai ni kairake ae kaain te Ekaretia i Europe, e kaitarai taai ibukin karaoan ana babaire. E taekinna bwa e kan mare n te tembora n te bong teuana, ma e iangoia bwa e na maeka ma raona te mwaane. E baireia bwa e na raira nanona ao n oki nakon ana waaki ni kakukurei te Ekaretia imwiin tabeua te ririki ao ni mare ma temanna n te tembora, ma ibukin ngkai, e taku, bwa e ti tangiria n ira moa nanona.
Kairake n Ikawai i Scandinavia a kaoaki bwa ana kororeta nakon Frieda. Aki ataa raoi arana ke te tabo ae e maeka iai, ma a tibwaua aia kakoaua ao baika a tia n rinanona inanon maiuia ni buokia ni karaoa ana rinerine ae eeti. Baika a taekinaki imwiina bon mwakoro n reta aika a koreaki mairouia te koraki ake ana karinan Frieda ake aanga nanoia bwa ana tibwauai.
Baireia ni Mare n te Tembora
Imwaain ae e maeka raoraou ae Erika* ma raona temwaane, ae tiaki kaain te Ekaretia, e onimakinaki raoi irouia ana utu bwa e maeka ni kaan ma te euangkerio. Ma ngke e a rin Erika inanon te waaki aei, e kanganga irouna bwa e na otinako. E taku n ana iango bwa e rangin kammaraki ao ni kanganga aron okiran kawaina ae eti.
Te kananokawaki, bwa a mwaiti raoraou, n aron Erika, are e a tia n aki kakaonimaki ibukina ngkai a taku n aia iango bwa a kona n taui aroia i bon irouia e ngae naba ngke a maiuakin katei aika itinanikun ana kainibaaire te Ekaretia. Ni koauana, katinanikuakin taian kaetieti e na kona ni karokoa mwaakan Tatan iaom.
I reireiaki man bwaai ake e a tia n rinanona raoraou. Ngke 17 au ririki, I baireia bwa N na karekea au kakoaua ae aki kona ni bitaki bukina ngkai I ataia bwa N na kainnanoia ngkana I tangiria bwa N na kamaiuaki n te maiu n tamnei. Karekean te kakoaua ae matoatoa ao n ataakin Tamara are i Karawa ngkai iai ana babaire ibukiu a bon kamaiuai.
Iai te bwai teuana ae I koaua raoi iai: I baireia bwa n na mare n te tembora. Te tembora bon ti ngaia te kawai nakon te kimwareirei ae koaua ao bon ti te kawai ae ti kona ni maeka ma Tamara are i Karawa ao Iesu Kristo n te bong teuana. Ngkana I tangiria ni kan nako n te tembora, I kainnanoa irakin taian kaetieti man te euangkerio. I a tia ni baireia bwa n na maiuakina te euangkerio kiona ngkai I ataia bwa bon te bwai ae eeti karaoakina, e ngae ngke e na taraa ni kanganga.
Karekei taai tabeua ni iangoia mani kamatataako raoi bwa kona nakea, ao ni iangoia bwa am rinerine ngkai e na kairiko nakon ningaabong.
Amanda Bernskov, Denmark
Kakaea Bwa Tera ae Ko Rang Kainnanoia
Au iango bwa te bwai ae moamoa kakawakina n te aonaaba ti bane n tangiria bwa tina tangiraki. Ma te tangira ae koaua e moamoa riki arona nakon te anainano ae e uarereke. Bon te onimakinaki ao tangirakin te bwai ae tamaroa ibukin te aomata temanna. Bon tabeakinaia aomata ae karaunano ao n tabetai bon te anga karea, ae nanonaki bwa tina anga ma nanora ao n rootaki ibukina ngkana ti bon riai.
Frieda, maium ao maiuia aomata riki aika a mwaiti ana rootaki man am rinerine are kona karaoi ni boong aika a kan roko. E na bon kona ni kanganga rinean ae eeti ngkana ko tuai tauraoi ni baireia bwa antai ana itera ae kona iria. Uringnga bwa Tatan e mwakuri korakora n urui utu. Karekea te ninikoria n ira ae ko ataia bwa e eti. Tai kaai ni maeka ibukin te tai ae uarereke ma mare n te tembora ibukin te maiu ae akea tokina.
Ngkana ko tangira te tangira ae koaua, ukoukora te tia anga te tangira ae koaua: Te Atua. Te tangira ae koaua bon entaumente n te maiu n tamnei, tiaki bwaai ni kareke nano ae anai nano. Bon mairoun te Atua ae ko kona ni karekea te bwain tangira ae te kabanea n tamaroa aei mai ibuakon bwain tangira nako.
David Isaksen, Norway
Baireia bwa Kona Oki
Ngke e a kaan koro te 17 au ririki, I moanna n namakinna bwa I aki kona ni manga irekereke ma aomata n te taromauri. Bon inanon te tai anne, are a raure iai au karo ma tinau ao e a toki kakaean te taromauri. I teimatoa ni mwananga, ma ai akea au onimaki n te mare ae akea tokina. Ngke I kaitibo ma Kristian,* e aki kanganga katinanikuan te Ekaretia ao ni mwaawa nako mai iai. Ao I a bon karaoia.
Ti uaia ni maeka inanon ae e kaan koro aua te ririki imwaain ae ti maaenako. I tangiria ni manga waakina riki okiran te taromauri, ma I a maakuia aomata bwa a na kona n anganai aekakin titiraki aika a mwaiti. I nako ni kawara tariu. Inanon ana uoote ao akea ae e kinaai ke manra ngai ni kitana te Ekaretia, ao inanon tiku I a moanna ni manga okira te ekaretia. I a reitinako ni manga okira au uoote ngke I okira mweengau. Te moan Tabaati ao I bon rangi ni maaku, ma aomata a bon tii kukurei ngke I a mena ikekei.
I ataia bwa N na riai n rinea te iterana; I aki kona ni waaki n nakonako ni waeu ae ti teuana iaon ana itera te Uea ao n are teuana iaon te aonaaaba. I a waaki ni kaitibo ma au bitiobi. E a tia ni buokai ni kamatata te Mwakuri ni Kamaiu. Bon te kawai ae abwabwaki ibukin te rairannano—n taai aika a rang kanganga. I rinanon te waaki n tarataraaki ibukin te rikirake, ao a rang ni mwaiti bwaai aika n na reiakin, ma I a rangin kukurei ngkai. I ataia bwa I a tia n rinea te eti ngke I baireia bwa n na okira te Ekaretia. Bon te bwai ae I riai ni katiaa n au iango ibukin te bwai are I a tia n namakinna ao are I ataia bwa e eeti ao I a tii tabe ngkai ni kakoroa nanona.
Te Ara ae tauaki
Teei ni Matoatoa n am Babaaire aika a Raoiroi
Tabeua te tai n nako temanna raoraou e kaaitara ma te aekakin babaaire naba ma are koa tia n rinanona. Raoraou ae Sarah* n taai nako ao bon iai ana kakoaua ae matoatoa n te Ekaretia ma koauana. Ngke ti uarereke, Sarah ao Ngai boni iai nanora ae e korakora ni kan mare n te tembora.
Ngke e a kora ana ririki 17 ke 18, e a kaatibo ao ni moanna ni maroroo ma te kairake n ataeinimwaane. E rang tamaroa anuana ao e rang kai tangiraki. Bon tiaki te membwa, ma n te moan tai e taraa n ae kanga akea te kanganga.
Ma n tokina, e iangoia neiei bwa e na kanga aron maiuna ngkana e mare ma teuarei, e ngae ngke tiaki inanon te tembora. E iango: “Tao e na kona ni koro nanona; tao tina karaoa raoi te boraraoi. Tao e na bae ni ibitaki n te taina. Tao N na boni kona ni kairia nakon te euangkerio.”
E rang korakora ana iango ibukin te bwai aei, ao e tang ao e tataro. E ataia mai kabin nanona bwa n taai nako e tangiria ni kan mare n te tembora, ma ana namakin ibukin raona te mwaane e a kanganga aron baaireana irouna. N te kabanea ao e a maaenako ma ngaia. Bon teuana mai ibuakon bwaai aika a kanganga are e a tia ni karaoia, ma e katuka ana onimaki iroun te Uea.
N tain te tiburing n 2007 ao e a mare ma te mwaane ae rang tamaroa. Ao ngkai a tia ni mare man kabaeaki ibukin ngkai ao n te maiu ae akea tokina. E bon rootaki n te kukurei bwa e a bon tia n tataninga ni karokoa are e kunea temanna are e tangiria ao ni kona ni mare ma ngaia n te tembora.
Ngkana ko aki ataia bwa tera te babaaire ae kona karaoia, tataro ibukina ni karokoa ae koa ataia. Katuka am onimaki iroun te Uea. I ataia bwa man tarataraakin Sarah—ao mani bon oin maiu—anne ngkana ti kona ni karaoia, E na kakabwaiaira.
Anna Lindgren, Sweden
Tamnei ao kamatata iroun John Luke; te tabo n rawetamnei © Shambhala Publications
Tamnein Stockholm Sweden Tembora © Stefan Hallberg