Roronrikirake
Te Aomata ae e Boou
Bon iai au kaangaanga n namakinna n aiaron ae I butimaeaki iai. Au utu e a tibwa tia ni kitana buuki n te tai ae e aki rangi ni maan. Te uoote are ti mwaing nako iai e bubura ana kurubu n roronrikirake, ma aio te moantai are N riki bwa te “aomata ae boou.” Arona ae te kabanea ni buakaka bon anne bwa N na nako nakon te reirei ae boou, ao te iango are e waekoa n roko n au iango, “Antai ae N na tekateka ma ngaia n tain te katawanou?” Tao N na noora temanna man au ekaretia, bwa I aki tangiria ni kairoroai bwa N na tekateka n ana taibora temanna n tain te katawanou, ai moarariki ngkai I aki ataia bwa ana tangirai n tekateka ikekei!
Te moan bong n te reirei e taraa n ae e a bon waaki n akea tokina. N tokina ao e tang beeron te katawanou. Ngke I karaurau n rinnako inanon te ruu ni katawanou, I tataro nakon Tamau are Ikarawa bwa e na buokai ni kakaea ae I kinaa. I tarataranako ngkana iai ae I kona ni kinaa. Bon akea. Aingaia are I a karaoa kawaiu nakon te taibora ae mena n iteran te ruu ni katawanou ae raroa ao ni kana au katawanou iai.
Rimwii riki n te bong anne n tain te kiraati n te warebwai, I a kinaa te ubu ae I taneiai iai. I a tia n noora David n te tieminari n te ingabong anne. E tuangai bwa e na noora au tai n reirei ao e kunea bwa titebo ara tai ni katawanou. “E i, ko mena iaara n te katawanou n te bong aei?” e taku.
“I amwarake n iteran te ruu are e raroa,” I kaeka.
“E koaua, ningaabong roko ao tekateka ma ngai n tain te katawanou,” e taku.
I rangi ni kakaitau ibukin ana tangira Tamau are i karawa, are e atai kainanora n tatabemaniira ao e kaekai ara tataro n tatabemaniira. I kakaitau naba ibukin temanna ae e tauraoi n anga baina n iraorao. Te bwai ae e rangi ni bebete n aron te kakao ae uarereke e kona ni ibitii bwaai ni kabane.