Te nakon te Tembora

Chhom Koemly, Cambodia

Man te tai are ti moan bwabetitoaki iai inanon 2001, ngai ma kaain abau e bati taekinan te nakon te tembora ma ara utu bwa ti na uaia ni kabaeaki ibukin te maiu are akea tokina. Ma e aki koro bukin ara iango ngke e a taonaki naba n aorakin te maama man ni mate iai imwain ae ti nako.

I rootaki n te rawawata, ma nanou ibukiia au utu bwa ti na kabaeaki ibukin te maiu are akea tokina e rikirake imwiin maten kainabau. Ngai tinaia ataei aika aman ae akea aia karo, I ataia bwa e na bon kangaanga karekean te mwane ae tangiraki ibukin kairakiia au utu mai Cambodia nakon te Hong Kong China Temple—e katautauaki bwa 1,000 te maire (1,600 kiromiita) raroana.

Ibukin uarereken ara karekemwane, natiu ao ngai ti ataia ae ti kainnanoia n nakon te tembora n te aro bwa ti na kabaeaki bwa te utu ae akea tokina. I teimatoa ni mwakuri korakora ni uaati n te outero ao natiu a mwakuri ni mwakuri n aki akaka. Ti moanna ni kaikoa te mwane teutana ibukin mwanangara, ma ti namakinna bwa ti na bon aki kona ni kaikoa te mwane ae tau.

Ibukina bwa ti ataia ae e rangin ni kakawaki riki karekean te utu are akea tokina nakon bwaai ni kabane aika ti kona ni karekei n te aonaaba, ti iangoia bwa ti na kabooa nako ara bwai ae ti teuana ae rangin ni kakawaki—ana rebwerebwe kaain abau are e a tibwa mate. Imwiin ae ti kaboa nako n te mwaiti ni mwane ae mwaiti, a kukurei nanora bwa ti nang kabeaki n te tai ae waekoa nakon tamara ao kaain abara aika ti tangiriia.

Ma kukureira e aki teimaan. Teuana te wiiki imwiin kabonakoan te rebwerebwe, ti oki man te taromauri ao e a tia n uruakaki ara auti. Ngke ti kunea bwa e a tia ni kimoaki te mwane ibukin boon te rebwerebwe, ao e bon rotira te rawawata. Inanon te namwakaina imwiin te urubwai, ti teimatoa n tataro bwa e na karekea te kawai are ti na kona n nakon te tembora iai.

Imwiin tabeua namwakaina e kaekaaki ara tataro ngke ti tuangaki bwa ti kona ni karekea te buoka man te Church’s General Temple Patron Assistance Fund.* Au ataei ao ngai ti bane ni kukurei n te rongorongo ao n te tai ae waekoa ti karekea te kantaninga ibukin te mwananga nakon te tembora.

E rabwa aia mwamwannano Aika Itiaki Ni Boong Aika Kaitira ake tabeman, ti a riki ngkai bwa te utu ae akea tokina.

*E kateaki te General Temple Patron Assistance Fund bwa e na karekei ibuobuoki n te mwane nakoia kaain te Ekaretia ake aki kona ni kabwakaa kantokaia nakon te tembora.

Ti moanna ni kawakina te mwane ae tau ibukin mwanangara nakon te tembora, ma imwiin uruakakin ara auti, ti a ataia ae ti na bon aki kona ni karekea ae tau.