I Roko Ma Ia?

Betty Hollowell, Indiana, USA

Ngkai bon te tei ae i uarereke I aki toki n titiraki,, “I roko mai ia?” N au atatai ae nano I ataia ae I a tia ni maeka n te tabo teuana imwain ae I a riki bwa antai ngai ngkai, ma akea au iango bwa ma ia.

Inanon ririki aika mwaiti ao I maaku n tuanga temanna—riki au karo—ibukin te maaku a taku bwa iburababa. Ma n te taina ngke I a roko n au tebwi tabun n ririki, ao I ninikoria n titirakina te minita n te ekaretia, “Ti maeka ia imwain ae ti roko nakon te aonaaba?” E tuangai bwa n na aki iangoi aekakin bwaai aikanne. E taku bwa akea ae maeka n te tabo teuana imwain ae ti bungiaki, bon akea ngaira ngkekei.

I maaku bwa rimwi e koaua ao n na tara ni burabura, ma I bon aki kona ni kabuai iango aikai inanon au iango. I teimatoa n ukeuke, ma akea ae .iai ana kaeka.

Ngke 18 au ririki ni maiu, a mwaing ara utu. I taku n au iango bwa ara tia kabwarabwara n ara kaawa ae boou atatai riki nakon ara tia kabwarabwara are ma imwaina,ngaia ae I a tabeka au titiraki nakon temanna ma irouia. Ana kaeka bon ti tebo: e tuangai bwa e bon aki tau iangoan bwaai aikanne ao e tuangai bwa n na nako n noora te taokitan te iango.

E aki maan imwinn anne ao I katoka nakou nakon te taromauri. E reke au mwakuri, I kaitibo ma te ataeinimwaane, ao ni mare ma ngaia. Nimaua te ririki imwiina ao ti raure. Ngaia are I a boboti au bwai ni kabane, uoman ataei a mena n te kaawa ao temanna iaon kawaina, ao n okira mweengana.

Tabeua te tai inanon nimaua te ririki akanne, ao e a tia tinau ni kaina Ana Ekaretia Iesu Kristo Ibukiia Aika Itiaki Ni Boong Aika Kaitira. E a tia n taekina te Ekaretia ngke I kawaria ao e tuangai bwa n na reitaki ma mitinare. N tokina I kariaia, ma imwain ara bootaki, I katia mai inanou bwa n na ongora nakon aia reirei mitinare ti ngkana a kona n tuangai mitinare bwa I maeka ia ma imwaina imwain ae I riki bwa antai ngai ngkai.

I rangi ni miimi, bwa aki ti kaekaa au titiraki ma anganai naba kaeka man te Baibara (tara Iobi 38:4–7; Ieremia 1:5; Iuta 1:6). Imwiin anne, a karika nanou ae bwanin raoi! Aia kaeka e buokai n ataia bwa bukin tera inanon maiu I a tia n namakinna bwa I a tia ni maeka n te tabo teuana ma imwaina. Ngkai I ataia bwa I a tia ni maeka n te maiu imwain te maiu ae mamate ma Tamau are i Karawa.

E aki maan imwain ae I riki bwa kaain te Ekaretia. N te moan tai ni maiu, ao I namakinna bwa kanga aiaron temanna ao n ataia bwa iai te tia ae n na kekeiaki n nako iai—n oki nakon mweengan Tamau are i Karawa.

I rangin ni kakaitau bwa a tia mitinare ni kona ni kaeka te titiraki ae akea temanna ae kona ni kaeka.