“Tou Te Faia le Mea Nei e Fai ma Faamanatuga Ia Te A’u”
Ia faatumulia i tatou i le Agaga o le Alii a o tatou aai ma feinu ma le agavaa i le faamanatuga.
I le tele o tausaga ua mavae, a o avea a’u ma se faifeautalai talavou i Kanata, sa faagaeetia lava a’u i se mau sa vaneina ma le tomai e se tagata vane mamanu i le pito i luma o le laulau o le faamanatuga a le paranesi a Montreal: “Tou te faia le mea nei e fai ma faamanatuga ia te a’u” (Luka 22:19).
I lena paranesi to’agaogao, sa faamanatu atu ai e sui o le Perisitua Arona i le Au Paia, e ala i o latou laei ma foliga vaaia, aoaoga a lo tatou Faaola e faatatau i lenei sauniga sili ona anoa ma paia. E lofituina pea lo’u mafaufau i Aso Sa uma i ia upu vane pe a tufa mai le faamanatuga: “Tou te faia le mea nei e fai ma faamanatuga ia te a’u.”
I le avea ai ma nuu o le feagaiga a le Alii, tatou te vave taunuu ai i le lotu faamanatuga i ni nai minute [a o le i amataina] e faaalia ai le faaaloalo ma ia manatunatu loloto ai i lenei sauniga paia. I nai minute na, a o tatou o mai saunia i le lotu e aai ma feinu i le faamanatuga, tatou te mulimuli i le fautuaga a Paulo i le Au Paia i Korinito: “A ia suesue ifo le tagata ia te ia, i le ‘ai ai o ia i lenei areto, ma inu i lenei ipu” (1 Korinito 11:28).
Faatulagaina o le Faamanatuga
O le faamanatuga e faatatau i le taulaga togiola a Iesu Keriso. O se sauniga e paia ma mamalu e tatau ona taulimaina i se auala ua faatulagaina e i latou ua agavaa e umia le perisitua, ma taumamafa ai tagata agavaa o le Au Paia o Aso e Gata Ai. E faia ma le faaeteete i se auala mamalu le tapenaina, faamanuiaina, ma le tufatufaina o le faamanatuga.
Sa faamanatu atu e Paulo i le Au Paia o le faamanatuga sa faatulagaina i se taimi sili ona taua i le vaeluaga o taimi a o i ai Iesu i le Tausamaaga o le Paseka ma Ona Aposetolo e Toasefululua.
“O a’u foi, na ou maua mai le Alii le mea na ou tuuina atu ai ia te outou, O lea lava po na faalataina ai le Alii o Iesu, na ia tago ai le areto:
“Ua Ia faafetai, ona tofitofi ai lea, ma fai atu, Ina tago ia, ina aai: o lo’u tino lenei ua tofitofi ma sui o outou, ia outou faia lenei mea ma faamanatuga ia te a’u.
“Ua Ia faapea foi i le ipu ina ua uma ona aai, ua faapea atu, O le ipu lenei o le feagaiga fou lea i lo’u toto: ia outou faia lenei ma faamanatuga ia te a’u” (1 Korinto 11:23–25).
O i o le a faataunuuina ai le tulafono tuai, le tulafono a Mose, ae faatuina ai—le feagaiga fou—o se tulafono e maualuga atu. O le a faaauau pea le sauniga o le faamanatuga seia oo mai le Afio Mai Faalua o Iesu Keriso, pe a taumamafa lo tatou Faaola ma Lana Au Paia i le faamanatuga (tagai i le 1 Korinito 11:26; MFF 27:5–14).
O le tamai mamoe o le taulaga na saunia mo le Talisuaga Mulimuli, o se vaega taua o le tausamaaga o le Paseka. A o taumamafa le au Aposetolo e Toasefululua, na tago Iesu, o Ia lava o le Tamai Mamoe o le Paseka, i le areto, ua faafetai, ona tofitofi ai lea, ma avatu i Lona au soo (tagai i le Mataio 26:26).
I le Lalolagi Fou, ina ua uma ona faaali atu i tagata sa Nifae faailoga o fao i Ona aao, sa faatulagaina e le Alii toetu le faamanatuga, ma fetalai atu:
“Ia outou tausia pea lenei mea, ma faia e pei ona ou faia, e pei ona ou tofitofi le areto, ma faamanuiaina, ma avatu ai ia te outou.
“Ia outou faia lenei mea ma le faamanatua o lo’u tino ua ou faaalia atu ia te outou. E fai foi lenei mea ma mau i le Tama ua outou manatua pea a’u. Afai tou te manatua pea a’u, tou te mafuta ma lo’u Agaga” (3 Nifae 18:6–7).
Sa Ia fetalai e uiga i le ipu: “Tou te faia foi lenei mea i e ua salamo ma papatisoina i lo’u igoa; tou te faia foi ma le faamanatua o lo’u toto, ua ou faamaligiina mo outou, ina ia outou molimau atu i le Tama ua outou manatua pea a’u. Afai foi tou te manatua pea a’u tou te mafuta ma lo’u Agaga” (3 Nifae 18:11).
Sa fetalai atu foi le Faaola ia sa Nifae, “O lē ‘ai i lenei areto, ua ‘ai o ia i lo’u tino mo lona agaga; e le toe fia ai pe fia inu lona agaga, ae maona lava.” Ina ua aai ma feinu le motu o tagata i le faamanatuga, ua ta’u mai e faamaumauga ia i tatou, “ona tutumu ai lea o i latou i le Agaga” (3 Nifae 20:8–9).
Aai ma Feinu ma le Agavaa
Ua aoao mai Elder L. Tom Perry o le Korama a Aposetolo e Toasefululua:
“A o lei faatulagaina le lalolagi, na faataatia ai e le Atua se fuafuaga lea o le a Ia tuuina mai ai faamanuiaga i Ana fanau e fuafua i lo latou usitaia o Ana poloaiga. Ae peitai, sa Ia malamalama, o le a i ai taimi e faalavelaveina ai i tatou e mea o le lalolagi, ma o le a moomia ai ona faamanatu mai pea e le aunoa a tatou feagaiga ma Ana folafolaga. …
“O le mea moni, o le faamoemoega o le aai ma feinu i le faamanatuga, o le faafouina lea o feagaiga na tatou osia ma le Alii. …
“… O le aai ma feinu ma le agavaa i le faamanatuga e maua ai e i tatou se avanoa mo le tuputupu a’e faaleagaga. …
“… Afai tatou te faatalale i le aai ma feinu i le faamanatuga, o le a tatou le maua le avanoa mo le faatupulaia o le faaleagaga.”1
Na aoao atu Paulo i le Ekalesia fou i Korinito e faapea, o ona tagata atonu e “vaivai ma mamai” ma o le “toatele ua momoe” aua ua latou aai ma feinu “faaletatau, … ua le faautauta i le tino o le Alii” (1 Korinito 11:29, 30). Sa folafola mai e le Faaola, “Aua ai se ai ma inu i lo’u tino ma lo’u toto ma le faaletatau, ua ai ma inu i le faasala i lona agaga” (3 Nifae 18:29)
“Faauta, o A’u o le Alefa ma le Omeka, o Iesu Keriso lava.
“O lea, ia faaeteete ai tagata uma i le ala latou te faaaogaina ai lo’u igoa i o latou laugutu” (MFF 63:61).
Pe tatou te aai ma feinu ea i le faaolataga o o tatou agaga? Pe tatou te o ese mai ea mai lenei “taimi paia i se nofoaga paia”2 ua faatumulia?
Aai ma Feinu e Le Aunoa [i le Faamanatuga]
Ua fetalai mai le Alii, “E tatau ona potopoto soo le ekalesia e fetagofi” i le faamanatuga (MFF 20:75). Afai e aoga i le Alii, ua matua taua tele lava ia i tatou!
O le faamamaina o o tatou tagata i totonu, o le a le tuua ai e lo tatou Faaola i tatou ia aunoa, vaivai, pe mama’i, ae o le a Ia faatumuina i tatou i Lona alofa ma le mana e tetee ai i faaosoosoga. O i latou o e o mai ia Keriso e avea faapei o Keriso pe a latou faatino lo latou faatuatua ia te Ia ma aai ma feinu i le “areto o le ola” ma le “vai ola” (Ioane 4:10; 6:35).
I le aso 6 o Aperila, 1830, a o faapotopoto le uluai Au Paia o lenei tisipenisione e faavae le Ekalesia, sa latou faaaofia i la latou uluai sauniga aloaia le sauniga o le faamanatuga, e pei ona faatulagaina mai e le Alii (tagai i le MFF 20:75–79).
O le avea ai ma tagata o le Ekalesia, ua tatou malamalama o lo tatou lava faaolataga patino e oo mai e ala i lo tatou Faaola, o Iesu Keriso. Tatou te tautino ma molimau atu i le lalolagi sa togiola o Ia mo a tatou agasala e ala i le usiusitai atoatoa i le finagalo o le Tama. E mafai ona tatou maua le meaalofa silisili a le Atua, o le ola faavavau, e ala i le usiusitai i tulafono ma sauniga o le talalelei toefuataiina.
Ua tatou malamalama foi i aoaoga a Tama Liae i lona atalii o Iakopo ina ua ia faapea mai, “O lea e sili ai le aoga o le faailoa atu o ia mea i tagata o le lalolagi, ina ia iloa e i latou e le mafai ona nonofo tagata faatasi ma le Atua, sei iloga ona o le taui ma le alofa mutimutivale ma le alofa tunoa o le Mesia Paia” (2 Nifae 2:8).
Ia tatou aai ma feinu ina ia tatou le toe fiaai ma fia feinu ai faaleagaga. Ma ia faatumuina i tatou i le Agaga o le Alii i aso Sapati taitasi ao tatou aai ma feinu i le faamanatuina o Ia, ina ia tatou atoatoa ma tasi ai ma Ia.
O Le Talisuaga Mulimuli, saunia e Simon Dewey
O Keriso o loo Faaali atu i sa Nifae, saunia e Simon Dewey, © 2003 IRI
Faamatalaga mai le O Le Afio Mai Faalua, saunia e Grant Romney Clawson; ata na tusia e Marina Lukach