Elder Ioane A. Widtsoe

Sa soifua mai Ioane Andreas Widtsoe i le aso 31 Ianuari, 1872, i le motu tuufua ma matagia o Frøya, i Nouei. Sa ono tausaga o Ioane ina ua maliu lona tama, ma sa ave o ia ma lona uso laitiiti e lona tina o Ana, e nonofo i Trondheim.

O iina na uluai faailoa atu ai le talalelei toefuataiina ia Ana, e se faiseevae sa tuuina ni tamai tusi a le Au Paia o Aso e Gata Ai, i totonu o seevae sa ia lipeaina mo le tina talavou ua oti lana tane. O se faiga lototele lea na faia e le faiseevae, o lē sa maualalo atu lona tulaga nai lo le faletua ua oti lana tane faiaoga. Ae sa matua faatupuina le fiailoa o Ana, ma sa tali atu i le savali o le talalelei.

I le 1883 sa malaga atu le aiga o Widtsoe i Logan, Iuta, lea na mulimuli ane lesitala ai Ioane talavou i le Kolisi o Polika Iaga. O ia o se tama a’oga galue malosi ma atamai, sa faauu o ia i le 1891, sa ave lana kemisi i le Iunivesite o Harvard, ma faauu ai i se faailoga e sili ona maualuga i le 1894. A o i ai o ia i Harvard, sa la feiloai ai ma Leah Eudora Dunford. Sa faaipoipo i laua i le Malumalu o Sate Leki i le 1898 ma avea ai ma matua o se fanau e toafitu, ae na o le toatolu o i latou sa soifua e avea ma ni tagata matutua.

Sa amata le galuega faapolofesa a Ioane o se polofesa o le kemisi ma se alii aloaia mo vailaau i le nofoaga e fai ai suesuega faasaienisi i le Kolisi Faa-Faatoaga o Iuta (lea ua avea nei ma Iunivesite o le Setete o Iuta) i Logan. Mulimuli ane sa suesue o ia i le saienisi o meaola [paiokemisi] i Göttingen, Siamani, ma maua ai lona Fomai o le Tofamanino [Ph.D.,] ma avea ai ma pule faavaomalo i kemisi faa-faatoaga i tau mata’utia. Sa lauiloa foi i lona tomai faapitoa i le faia o alavai mo faatoaga ma le faiga o faatoaga matutu.

Sa auauna Ioane A. Widtsoe o se peresitene o le Kolisi Faa-Faatoaga o Iuta mai le 1907 i le 1916, ina ua tofia e avea ma peresitene o le Iunivesite o Iuta. Sa auauna ai o ia i lena tulaga seia oo i le 1921, ina ua valaauina o ia i le Korama a Aposetolo e Toasefululua.

Sa avea Elder Widtsoe ma sui faatonu o le Improvement Era (o le mekasini na muamua mai i le mekasini o leEnsign) mai le 1935 i le 1952. Sa ia tusia foi ni tusi sa faaaogaina tele i le Ekalesia, e aofia ai Pulega Faale-Perisitua ma le Ekalesia. Sa peresitene o ia i le Misiona i Europa mai le 1926 i le 1932, o le taimi lea na ia faapaiaina ai Siekisolovakia mo le talaiga o le talalelei.

Na maliu Elder Widtsoe i le Aai o Sate Leki, Iuta, i le 80 o ona tausaga, i le aso 29 Novema, 1952.

Sa avea Elder Widtsoe o se sui o le Korama a Aposetolo e Toasefululua mai le 1921 seia oo ina maliu o ia i le 1952.

Sa avea Elder Widtsoe o le sui faatonu o le mekasini o leImprovement Era mai le 1935 seia oo i le 1952. Lalo: O loo suesue faatasi Elder Widtsoe ma tagata o lona aiga i tusitusiga paia.