O Iesu Keriso o le Totonugalemu o le Fuafuaga a le Tama Faalelagi

Sa saunia e le Tama Faalelagi se fuafuaga e fesoasoani ia i tatou e avea ai faapei o Ia ma maua le atoatoaga o le olioli. Ua Ia fetalai mai, “Faauta, o la’u galuega ma lo’u mamalu lenei—ia faataunuu le faaofuina o le tagata i le tino ola pea ma le ola faavavau” (Mose 1:39).

I le avea ai o ni fanau agaga a lo tatou Tama i le Lagi, sa tatou ola i Lona afioaga i se olaga faaleagaga. Ua ta’ua lea o lo tatou uluai tofi. Sa tatou faapotopoto faatasi i se Aufono sili i le Lagi lea na faailoa mai ai e le Tama Faalelagi ia tatou Lana fuafuaga: O le a tatou o mai i le lalolagi, o lo tatou tofi lona lua, ma maua ai se tino faaletino. O le a tatou “faataitai” ai foi “[o le a] tatou faia mea uma e poloaiina ai i [tatou] e le … Atua” (Aperaamo 3:25). O le a togiola e se Faaola mo agasala a tagata uma, ma mafai ai e i tatou ona salamo ma toe faamamaina. (Tagai i le Alema 42:23–26.)

Sa tatou filifili e talia le fuafuaga a lo tatou Tama Faalelagi ma Iesu Keriso o lo tatou Faaola. Ona o le Togiola ma le Toetu o le Faaola, ua mafai ai ona tatou toe foi atu i le afioaga o lo tatou Tama Faalelagi ma ola ai i le soifuaga o loo soifua ai o Ia.

Sa tatou potopoto i se Aufono sili i le Lagi ma lo tatou Tama Faalelagi e faalogo i Lana fuafuaga.
Sa manaomia i le fuafuaga a le Atua se Faaola e togiola mo a tatou agasala faalelalolagi. Ona fetalai ane ai lea o le Alii, “O ai ea ou te auina atu?” (Aperaamo 3:27).
Sa silafia e Iesu Keriso, o le Ulumatua o le fanau a lo tatou Tama Faalelagi, e tatau ona tatou saoloto e filifili e usitai i le Atua. Na fetalai Iesu, “O au lenei, auina atu au” (Aperaamo 3:27). “Lou Tama e, ia faia lou finagalo, ma ia ia te oe pea le mamalu e faavavau” (Mose 4:2).
E le i talitonu Lusifelo, o le isi o le fanau a le Atua, e tatau ona tatou saoloto e filifili e usitai i le Atua. Sa ia faapea mai, “O au lenei, auina atu au. … O le a ou togiolaina le fanauga uma a tagata ina ia le se ese se agaga e toatasi … ; o le mea lea, ia tuu mai ia te au lou mamalu” (Mose 4:1).
Ona fetalai ane lea o le Alii, “O le a ou auina atu Le na muamua”—Iesu Keriso (Aperaamo 3:27).
Sa tatou “alalaga fiafia” (Iopu 38:7).
Talu ai o Iesu Keriso o le a avea ma Faaola, o lea sa ita ma fouvale ai Lusifelo. Na mulimuli atu ia te ia le tasi vaetolu o ‘au o le lagi. (Tagai i le MFF 29:36–37.)
Sa tatou filifili e talia le fuafuaga a le Atua ma mulimuli ia Iesu Keriso. Sa tatou tausia lo tatou uluai tofi ma tatou agai ai i luma i lo tatou tofi lona lua, lea na tatou maua ai tino faaletino.
Tatou te maua faamanuiaga o le Togiola a Iesu Keriso e ala i lo tatou faatuatua ia te Ia, salamo ia tatou agasala, papatisoina i le pule o Lana perisitua, taliaina o le meaalofa o le Agaga Paia, ma le tausia o poloaiga a le Atua i o tatou olaga atoa (tagai 2 Nifae 31:16–20; Mataupu Faavae o le Faatuatua 1:3–4).

Agavale: Auiliiliga o Keriso i Emau, saunia e Carl Heinrich Bloch; ata tusia e Robert T. Barrett; ata o le papatisoga na saunia e Matthew Reier

O Iesu Keriso o le totonugalemu o le fuafuaga a le Atua mo lo tatou fiafia. “Faauta, o a’u o Le na saunia talu le faavaeina o le lalolagi e togiolaina lo’u nuu. Faauta, o a’u o Iesu Keriso. … O a’u e maua ai e tagata uma le malamalama, e faavavau foi lea, o i latou lava o e faatuatua i lo’u igoa, e avea foi i latou mo’u atalii ma o’u afafine” (Eteru 3:14).