Savali a le Au Peresitene Sili
I Le Saunia Ai Faaleagaga
Fautuaga mai lo Tatou Perofeta
O Se Faavae o le Faatuatua
“Afai e leai so tatou faavae loloto o le faatuatua ma se molimau maumaututu o le upu moni, atonu o le a faafaigata ai ona tatou tatalia afa ma matagi matautia o puapuaga ia e mautinoa lava e oo mai ia i tatou uma.
“O le ola faaletino o se taimi o tofotofoga, o se taimi e faamaonia ai lo tatou lava agavaa e toe foi atu i le afioaga o lo tatou Tama Faalelagi. Ina ia tofotofoina i tatou, e tatau ona tatou feagai ma lu’i ma faigata. E mafai ona gauia i tatou e ia mea, ma ono ta’eta’ei ai o tatou agaga ma masofasofa—o lona uiga, pe afai e le o mausali ona totoina i totonu ia i tatou lo tatou faavae o le faatuatua ma la tatou molimau o le upumoni.”1
Aoao Lesona mai le Taimi Ua Alu
“I le sailiga mo le ituaiga tagata aupito sili ia avea ai i tatou, e i ai ni nai fesili o le a taitaia ai o tatou mafaufau: Ua avea ea a’u ma tagata ou te manao e avea ai? Ua faateleina atu ea lo’u latalata i le Faaola i le asō nai lo ananafi? Pe o le a ou latalata atili ea i ai a taeao? Pe ua ia te a’u ea le lototoa e suia ai mo le lelei sili atu? …
“Ua oo mai ma mavae atu tausaga, ae o loo tumau pea le matua taua o le manaomia o se molimau o le talalelei. A o tatou agai atu i le lumanai, e le tatau lava ona tatou faagaloina lesona mai le taimi ua alu.”2
O Lau Liahona Patino
“O lou faamanuiaga faapeteriaka e a oe lea ma ua na o oe lava. Atonu e puupuu pe umi, faigofie pe loloto foi. E le taua i se faamanuiaga faapeteriaka le umi po o le gagana. O le Agaga e faailoa maia le uiga moni. E tatau ona gaugau faalelei lou faamanuiaga ma teuina. E le tatau ona faavaa pe faalauaiteleina. Ae, e tatau ona faitauina. E tatau ona e fiafia i ai. E tatau ona mulimulitaia. O lou faamanuiaga faapeteriaka o le a tauaveina oe i taimi sili ona pogisa. O le a faatautaia oe i taimi matautia o le olaga. … O lou faamanuiaga faapeteriaka o se Liahona mo oe lava e faatautaia lau malaga ma taialaina lou ala. …
“E ono manaomia le onosai a o tatou vaavaai, faatalitali, ma galulue mo le faataunuuina o se faamanuiaga folafolaina.”3
O Mai Ia Te Ia
“Manatua e te le savali toatasi. … A o e savalia le olaga, ia savali lava agai i le malamalama, ma o le a pauu i ou tua ane ata lafoia o le olaga. …
“A o ou tapa atu i tusitusiga paia mo musumusuga, sa tu mai pea lava pea se upu faapitoa. O le upu [o le] ‘o mai.Ua fetalai mai le Alii, ‘O mai ia te a’u.’ Ua ia fetalai, ‘O mai e aoao ia te a’u.’ Sa Ia fetalai mai foi, ‘O mai, mulimuli maia ia te a’u.’ Ou te fiafia i lena upu, o mai. O la’u tatalo lea ia tatou o mai i le Alii.”4
Auala i Emau, saunia e Jon McNaughton
Ata na saunia e Craig Dimond; ata na tusia e Steve Kropp