Pe Na Ou Faoa Ea Mea A Le Atua?
Hildo Rosillo Flores, Piura, Peru
I ni nai vaiaso talu ona uma lo’u papatisoga i le 30 o o’u tausaga, sa talosaga mai le peresitene o la matou paranesi i Piura, Peru, e fia faatalanoa au e iloa ai lo’u agavaa e maua le Perisitua Arona. Ina ua ou nofo i lalo, sa faia e Peresitene Jorge García se tatalo. Ona ia fesili mai lea ia te au, “E te talitonu i le Atua?”
“Ioe,” o la’u tali atu lea.
“O e tausia le Upu o le Poto?”
“Ioe,” o la’u toe tali atu lea.
“O e ola mama?”
“Ioe.”
E oo mai i le taimi lea ua ou matuā lototele i a’u tali, ae na sosoo mai ma le isi fesili: “O e totogia atoa se sefuluai?”
Sa ou le magagana. Sa ou manatua le ata na faaali mai e faifeautalai ia te au ina ua la aoaoina au i le lesona e uiga i le sefuluai. Sa la faapea mai, o le tasi-vae sefulu o a tatou tupe maua e a le Alii ia. Ona ou faalogo atu lea i le isi fesili: “E lei aoaoina oe e faifeautalai i le tulafono o le sefuluai?”
“Sa la aoaoina au,” o la’u tali atu lea, “ae ou te le o totogia.”
“E faamalie atu,” o le tala lea a Peresitene García ina ua mavae sina taimi, “ae e tatau ona totogi lau sefuluai ona faatoa mafai lea ona e maua le perisitua. Amata nei loa, ona totogi lau sefuluai i le Alii.”
Sa ou tuua lona ofisa ma se lagona manatunatu loloto. Ina ua uma ona ou toe iloiloina le tulafono o le sefuluai i lena aso, sa ou alu atu i lo’u potu, tootuli i luga o le fola, ma amata loa ona ou tatalo. “Le Tama e Faalelagi, afai ua ou gaoi i Lau Afio i le le totogiina o la’u sefuluai, ou te talosaga atu i Lau Afio e faamagalo mai au. Ou te folafola atu o le a ou le toe faaletonu lava i le totogiina o la’u sefuluai.”
I le Aso Sa na sosoo ai i le lotu sa ou talosaga ai i le peresitene o le paranesi mo se isi faatalanoaga. Sa ou ta’u atu ia te ia ua ou lagona ua faamagalo a’u e le Alii ma ua Ia taliaina la’u tautinoga e totogi la’u sefuluai, lea na amata ona ou faia i le Aso Sa lava lena. “Pe ua ou agavaa ea e maua le perisitua?” o lau fesili lea.
“Ioe,” o lana tali lea. “O le asō o le a ou faaeeina atu ai le Perisitua Arona i ou luga ma faauuina oe i le tofi o le tiakono.”
O le asō ua i ai sa’u molimau malosi i le sefuluai ma le tele o faamanuiaga e maua mai i le totogiina. I le tele o faatalanoaga talu mai lena Aso Sa ua silia ma le 35 tausaga talu ai, soo se taimi lava e fesili mai ai o’u taitai pe o totogi atoa la’u sefuluai, ou te fiafia lava ou te tali atu ioe!