O Le Ofu Fou o Maria
“Tapuai atu i le Atua i le agaga ma le faamaoni i mea uma tou te i ai” (Alema 34:38).
Sa faataamilo Maria i lona ofu fou manaia o le Aso Sa na su’i e lona tinamatua. E lanu piniki ma i ai ni lipine papae. O le ofu sili lea ona manaia ua maua e Maria, ma sa matua aulelei ai lava o ia. Sa ataata o ia ia te ia lava i le faata ma toe faataamilo e faafelea ai lona sakete. Sa fiafia Maria e alu i le lotu i le Aso Sa e faaali atu i ana uo lona ofu fou.
I le lotu, sa fiafia Maria e faalogo atu i ana uo uma o fai mai tala manaia e uiga i lona ofu. I le Peraimeri sa taaloalo ai o ia i lipine o lona ofu nai lo le faalogo i le lesona a Uso Sanchéz.
Sa lei faalogo foi Maria i molimau a tagata sa faia i le sauniga faamanatuga. Sa pisi o ia e nonoa ma talai ma toe nonoa ma talai lipine taitasi o lona ofu.
Ina ua uma le sauniga, sa ia matauina na fetagisi nisi o tagata a o latou tuua le falelotu.
“Aisea ua fetagisi ai tagata la, Mama?” O le fesili lea a Maria.
“Sa latou lagonaina le Agaga ananei,” o le tala lea a Mama ma soloi ese ona loimata. “Ma o nisi taimi o le mea lena tatou te fetagisi ai. “Sa matua mananaia molimau, a ea?”
Sa lei tali Maria. “Na te lei manatua se mea na fai mai ai se isi.
I lena po a o faamoe e Mama ia Maria, sa fesili Maria, “Mama, aisea na ou le lagonaina ai le Agaga i le lotu ananei?”
“E tautala mai le Agaga i se leo malu ma le itiiti,” o le tala lea a Mama. “E tatau ona tatou matua faalogo lelei e iloa ai. A tatou o i le lotu, e tatau ona tatou taula’i atu i le Tama Faalelagi ma Iesu Keriso—ona tatou lagona ai lea o le Agaga.”
Sa mafaufau Maria i le mea sa ia taula’i i ai i le lotu i lena aso. Sa mafaufau o ia i lona ofu fou, ae le o le Tama Faalelagi ma Iesu Keriso.
I le vaiaso na sosoo ai sa toe ofu foi e Maria lona ofu piniki manaia i le lotu. Ae sa faalogo o ia ia Uso Sanchéz i le Peraimeri. I le sauniga faamanatuga sa taumafai o ia e mafaufau i le Tama Faalelagi ma Iesu Keriso. Sa tuua e Maria le lotu ua lagonaina le Agaga i lona loto. Sa fiafia o ia ona sa lei alu i le lotu e tau ina faaali atu lona ofu fou.
Ata na tusia e Natalie Malan