Tipi le Maea!
Gerald G. Hodson, Iuta, ISA
I se tasi taeao malulu o se Aso Toonai a o 12 o’u tausaga, sa fai mai ai Tama ia te a’u e faaola le palau e la’u ai ni vaovao mago mo ni solofanua fiaaai. Sa matua maatiati le malulu o lea sa na o le faalua lava ona tau ola mai [le palau] ae pe loa le maa. Ina ua ou ta’u atu i lo’u tamā, sa fai mai loa e tapena le solofanua o Blue ma nonoa le taavale faasee i le nofoa [o le solofanua], ina ia mafai ona toso ai ni fusi vaovao mago se lua e ave i solofanua e tau ina talitali ai le fiaaai seia lelei le palau.
O Blue, o le matou solofanua malosi fai lafu, sa i ai i le vaitaimi aupito malosi o lona olaga. O ia o se manu aulelei ma malosi tele. Ou te manatua lona osooso solo i lena taeao i lona fia alu i se tietiega manaia.
Sa ma tuuina ni fusi vaovao mago se lua e tai 90-pauna (41-kg) i luga o le taavale faasee, ona oso lea o Tamā i luga o Blue ma matou o loa. Na ou savali i tua o le taavale faasee e faapaleni ai. E lei umi ae matou taunuu i le auala e tau atu i le fanua kionā.
Sa lelei lava mea uma vagana ai ina ua matou oo atu i le tasi vae tolu o le ala. Na amata ona loloto le kiona, ma na ou vaai atu ua faaputuputu mai i luma o le taavale faasee. A o faasolo ina mau tele le maea i le fatafata o Blue, sa poloka lana manava. Na faafuasei ona oso o ia.
Na faalua pe faatolu ona tafiti solo Blue, i le taumafai e faamatagataga le fufusi o lona fatafata. Sa vave ona taumafai Tamā e oso i lalo, ae na fetātāa’i solo i autafa o le solofanua a o taumafai e oso ese mai. O le mea na atili ai le leaga, na see le vae o Blue i lalo o le kiona, ma palasi ai i lona itu, ma taomia ai lo’u tamā.
A o faasolo ina matapogia Tama, sa ‘e ē mai ou te tamoe i le fale o Uncle Carl e aumai se fesoasoani. O lona uiga e tatau ona ou totolo i lalo o ni pa se lua ma tamoe i le isi itu o se fanua tele ona faatoa oo lea i le fesoasoani.
A o ou liliu ou te alu, na ou faalogoina se leo o fai mai, “Aua e te alu. Tipi le maea!”
Sa vave ona ou usitai, ma se’i mai la’u taga la’u naifi faamoe a Tama Sikauti. Sa alu sina taimi o ou seseleina le maea ma, na faafuasei ona oso i luga Blue ma alu loa i le atoa. Sa motu le maea, ma sa taavalevale mai lo’u tamā nai lo le mea na semanu e toso tātā atu ai i lona oti. Sa ou tamoe atu i ona tafatafa.
Sa toe te’i mai Tamā, tu i luga, ma fai mai o loo manuia o ia. Ona ma o loa lea e sue Blue, aveese le kiona mai luma o le taavale faasee, toe nonoa le maea, ma toe o atu ai i le fanua o loo i ai solofanua. Sa ma fafagaina solofanua ma toe foi i le fale.
E masani lava ona ou usitai i lo’u tamā e aunoa ma se fesili, ma na ou sauni lava ou te tamoe i le 10 minute i le fale o le uso o lo’u tamā mo se fesoasoani. Ae na semanu e tuai tele mai lana fesoasoani. Ae peitai, o lena aso, na fetaui tonu lava ma le oo mai o le leo o le Agaga.