Tagata Ua Avea Ma Faataitaiga Lelei
O le tele lava o molimau e le tupu mai i se emo malosi o se uila. E faasolosolo ona e mauaina le malamalama o le talalelei, ma e te iloa faalagolago i lagona lelei e musuiaina e le Agaga Paia. Ao faagasolo pea, e toatele lava tagata e avea ma faataitaiga lelei: o i latou o e musuia i tatou e ola i olaga e tatau ona tatou ola ai. O le a e faamalosia lau molimau ma aoao ia e usiusitai e ala i lou mulimuli ia latou faataitaiga.
Faifeautalai
O faataitaiga lelei muamua na faailoaina mai le talalelei ia te au, o faifeautalai ia sa aoaoina lo’u aiga i Filipaina. Na tele se aafiaga o a laua faataitaiga i la matou filifiliga e auai i le Ekalesia. Sa onosai i laua ia i matou, ma sa laua aumaia i taimi uma se agaga matagofie.
Ao avea pea i matou ma tagata fou o le Ekalesia, sa matou feiloai ai ma se alii na aluese mai le Ekalesia. Sa ia tuuina mai ia i matou ni tusitusiga e tetee ai i Mamona, ma sa matua ou te’i ai lava. O lo’u taimi muamua lea na ou feagai ai ma se tetee i le Ekalesia, ma ao fou foi la’u molimau. Ao ia talanoa mai ia i matou ma osofaia mea uma lava na aoaoina mai e faifeautalai ia i matou, sa faatumuina a’u i le mata’u. Peitai i taimi matou te faatasi ai ma faifeautalai, sa laua aumaia le filemu. Ona o faifeautalai, sa aoao ai e lo matou aiga le eseesega i le va o le faatuatua ma le matau, ma sa matou filifilia le faatuatua.
Peresitene o Misiona
Sa lei umi ae tofia i maua ma lo’u tama e avea ma soa faiaoga o aiga. O se tasi o o ma tofiga muamua lava o le asia lea o le peresitene o le misiona ma lona faletua. Sa ese lo laua tamalii. Sa aumaia e lo’u tama le tele o aganuu mai le ekalesia sa matou i ai muamua. Ae sa agalelei i laua, e lei faitio, i le faamalamalamaina mai o le pogai na ese ai le faiga o mea i totonu o le Ekalesia moni. O i maua sa fai ma faiaoga o aiga, ae sa tele mea na ma aoaoaina mai i faataitaiga a le peresitene o le matou misiona.
Mulimuli ane, ina ua avea a’u ma se faifetautalai faamisiona, sa faaauau pea ona ou aoao mai i peresitene o misiona. O lo’u peresitene muamua lava, sa i ai i taimi uma lona talitonuga maumaututu e iu lava ina lelei mea uma, e tusa lava pe sa faigata ia taimi. O ia sa ou aoao mai ai ia i ai ni ou lagona mautinoa.
O lo’u peresitene lona lua o le misiona sa avea muamua ma se pailate o vaalele tau, ae i le avea ai o se taitai o le Ekalesia, sa loto alofa ma faaeteete i lagona o isi, sa tumu o ia i le alofa faaKeriso mo ona uso a auauna. Ao avea a’u ma fesoasoani ia te ia, sa ou lagonaina na soona faaaoga e nisi o faifeautalai ni avanoa faapitoa faapea ma lona agalelei. Sa ou fautuaina atu ia matou faia ni tulafono e sili atu ona mamafa ma ia matua faamalosia. Sa fai mai o ia o lona lagona e sili ai le tuu atu o le faatuatuaga i faifeautalai e filifili ai le mea sao nai lo le masalomia o o latou faamoemoega. Mai lenei faataitaiga lelei, ua ou aoao ai e mulimuli i fautuaga a Iosefa Samita, ia aoao atu mataupu faavae sao, ona tuu lea e pulea e tagata i latou lava.
Isi Taitai o le Ekalesia
Ou te manatua lo’u matauina o Elder Dallin H. Oaks, o se sui o le Korama a le Au Aposetolo e Toasefululua, sa auauna atu o se Peresitene o le Eria i Filipaina. Sa ou vaaia o ia o fautuaina isi tagata e uiga i luitau o loo feagai ma le Ekalesia i lo matou atunuu. Sa ou vaaia le maoae o lona alofa mo le fausiaina o le Ekalesia ma le fatuina o avanoa e faamanuiaina ai tagata o le Ekalesia. Mai lana faataitaiga na ou iloa ai o Aposetolo e le gata ina popole alofa i le Ekalesia atoa ae faapea foi i tagata taitoatasi.
Ua saunoa mai lo matou Peresitene o le Eria o loo i ai nei, o Elder Keith R. Edwards o le Au Fitugafulu, e ui lava o loo i ai se itu tau i le pulega o le galuega a le Ekalesia, ae o loo finagalo le Alii ia tatou taulai atu i le loto. Ua ia faamanatu mai ia i tatou e uiga i le aafiaga a le Tupu o Peniamina i lana lauga mai le olo ma le auala na tali atu ai tagata ma se liliu tele o o latou loto. Sa “le toe ai so [latou] manatu e fai amio leaga, ae fia fai pea lava le amio lelei” (Mosaea 5:2). Mai ia Elder Edwards, ua ou aoao ai ia ou vaai i lo’u lava loto, ia ou mautinoa e mama ou faamoemoega.
Taitai Au Moronae
Ua tumu tusitusiga paia i tagata ua avea ma faataitaiga lelei. O Taitai au Moronae o se tasi o au lava toa patino. Sa matua faamemelo Mamona ia Moronae o lea na ia faaigoaina ai lona atalii ia te ia. Sa tusia e Mamona e uiga ia Taitai au Moronae e faapea: “Ana tusa ma Moronae tagata uma sa ola mai atali, faauta, po ua luluina e faavavau le pule a seoli; ioe, po ua leai lava se pule i le tiapolo i loto o le fanauga a tagata” (Alema 48:17). Sa fai mai foi Mamona sa faamemelo foi o ia i atalii o Mosaea ma Alema ma ona atalii aua “o tagata o le Atua i latou uma” (Alema 48:18). Ia avea alii ma tamaitai o le Atua e fai ma au faataitaiga lelei!
Nifae
O le isi faataitaiga sili mai tusitusiga paia o Nifae. Mai ia te ia, ua ou aoao ai ia ou faatuatua i le Alii ae le o le muimui. Sei ou faamatala atu. Ina ua ou tuua Filipaina e saili lo’u faailoga o le faatufugaga i le Iunivesite o Polika Iaga, sa ou folafola atu o le a ou toe foi mai [i Filipaina]. Ina ua oo i le taimi matou te toe foi mai ai ma lo’u aiga, sa le faigofie le faaiuga aua sa ou manatu e le tele ni avanoa lelei i lo’u atunuu e pei o avanoa i le Iunaite Sitete. Ae talu ai ua uma ona fai lau upu tautino, sa tonu loa ia i maua ma lou toalua ia faaaoga le faatuatua e pei o Nifae ma faia le mea ua finagalo le Alii ma te faia.
E ui lava sa ou faigaluega muamua, ae sa ou toe amata mai lava i le amataga i mea tautupe. Sa utiuti le seleni, ma sa umi se taimi o faatalitali le fua mai o ni avanoa. Na sosoo ai ma le mamai uma o le ma fanau e toatolu, ma uma atu ai ma a matou tupe na teu. O se tasi lea o taimi sa sili ona faigata i o matou olaga.
Sa amata ona maua le ma atalii laitiiti i se ituaiga o mamapala. Sa tatau ona ia faaaogaina ni talavai taugata lava, ma na manaomia ona ia inuina mo le iva masina. Ou te manatua lo’u tago atu i la’u ato tupe, ua leai ma se tupe. Sa fesili mai lo’u toalua pe o le a faapefea ona fafaga le ma fanau.
I taimi faapena, e te tuu fesili ai. Ma afai e te le faaeteete, e mafai ona avea oe e faapei o Lamana ma Lemuelu ma amata ona e muimui ma tiga ou lagona. E te lagonaina e pei e le sa’o le olaga. Semanu e faigofie ia te a’u ona ou mafaufau: “O a’u o se faifeautalai ua maea se misiona. Sa ou auauna i le Alii. E totogi a matou sefuluai. O loo matou auauna i le Ekalesia. O fea la ia faamanuiaga?” Ae sa tumau pea lo matou malolosi [i le Ekalesia], sa matou auauna i o matou valaauga, ma na maua lava mea matou te manaomia. Sa fesoasoani mai lo’u uso ma lona toalua ia i matou i le itu tau tupe, ma mulimuli ane ona maua ai lea o sa’u galuega. Sa toetoe lava a le lava, ma sa laitiiti foi le totogi nai lo le totogi sa ou mauaina ae ou te lei alu i le aoga. Sa ou lagonaina na ou toilalo.
Ina ua mavae ni nai tausaga, na tonu ai ia i maua ma lo’u toalua, e le aoga le manatunatu ma le popole. Sa ma faapea ifo, “Tuu ia lo taua muimui, ae faatuatua i le Alii, ma fiafia ia i mea ua tatou maua.” Ma i le taimi lava lena, sa liua ai mea uma. Sa ou maua ni ofo mai i ni galuega eseese ma sa mafai ona ou filifilia le galuega sa sili ona lelei. Sa valaauina a’u e avea ma epikopo o le matou uarota. Na foliga mai sa na o le tafe mai lava o faamanuiaga.
I le avea ai ma epikopo na ou iloa ai o taimi faigata na ou oo i ai, na fesoasoani ia te a’u e fesoasoani atu ai i isi. Aemaise lava, ou te manatua lo’u faalogologo atu i se tagata o le uarota lea sa oo i ai ni taimi faigata i tulaga tautupe, ma sa ou lagonaina ai le alofa. Semanu ou te le lagonaina lena alofa pe ana faapea ou te lei oo i ni tulaga faapea. Ma sa ou manatua upu a Nifae: “O soifua le Atua, o ola foi i tatou, tatou te le o atu i lo tatou tama i le vao, seia uma ona faia e i tatou le mea ua poloaiina ai i tatou e le Atua” (1 Nifae 3:15).
Sa ou manatuaina ina ua latou malaga mai i le vaa e agai mai i le nuu o le folafolaga, e ui lava sa noanoatia o ia mo le tele o aso ma sa fulafula ona tapulima ma ona tapuvae, ae sa faapea mai Nifae, “Ae ui i lea, na ou tepa ae i lo’u Atua, ma ua ou vivii atu ia te ia i le aso atoa, ou te le muimui i le Atua ona o o’u puapuaga” (1 Nifae 18:16). Sa ou ta’u atu i le tagata o la’u uarota o le toatele lava o i tatou o loo mamao lava mai le avea e faapei o Nifae, ae o ia [Nifae] o se faataitaiga lelei. Sa mafai ona ou fesoasoani atu i lena tagata na te iloa o le tali e le o maua i le muimui ae o le faia o mea ua poloai mai ai le Alii, aua e mautinoa lava o le a Ia saunia se ala (tagai 1 Nifae 3:7).
Matua
E faapei o Nifae, sa matua faamanuiaina a’u ona sa fanauina a’u e ni matua lelei. O lo’u tina o se tamaitai ola mama ma malosi. Ua avea a’u ma ituaiga tagata ua ou i ai i le aso ona o le faavae mautu o le talalelei sa ia faatulagaina i lo matou aiga. E faapena foi i lo’u tama, e ui lava e le atoatoa, ae sa avea o ia ma faataitaiga maoae ia te a’u. Sa ia faamautinoa sa sa’o le ala sa matou uia, ae sa ia fesiligia i matou i taimi uma, “O le a so outou manatu?” Ona ia faalogo lea.
Sa amata ona fiafia o ia i le Ekalesia aua na ia vaai i se faaupuga e faapea “E leai se isi manuia e mafai ona sui ai le toilalo o le aiga.” Sa ia matua talitonu lava i lena mea. Sa alofa o ia i lona aiga ma sa galue malosi ia saunia mea uma matou te manaomia.
Sa i ai se taimi ao galue o ia i se kamupani fualaau ma vailaau faafomai sa tuuina mai ai pea lava pea ia te ia le tele o tiutetauave, ma o lona uiga o le tele foi lena o ana femalagaaiga. Na oo i se tulaga ua na o le tolu aso o le masina e i ai o ia i le fale. Ae na faafuasei lava ona matou iloa, ua faamavae o ia mai lana galuega ua leva ona galue ai ma tele ai avanoa lelei tau le galuega.
Ou te manatua i la matou fono faaleaiga na sosoo ai sa ia faapea mai ai, ua manaomia ona faaitiitia a matou tupe faaalu mo ni nai masina e sosoo ai ao sailia sana galuega fou. Sa matou fesiligia o ia pe aisea ua faamavae ai, ma o lana tali o le a tumau ia i matou e faavavau: “Ua outou matutua uma ma o lea ua outou talavou, ma o se taimi sili lena ona taua i o outou olaga. Ou te matua le manao lava e oo mai se taimi tou te faapea mai ai ia te a’u, ‘O fea sa e i ai ao matou manaomia oe?’” Sa ia faamuamua i lona aiga.
O Le Mulimuli i Faataitaiga a Lo’u Tama
Talu ai le faataitaiga lena mai lo’u tama, sa mafai ai ona ou faia se fuafuaga faapena i tausaga mulimuli ane. Sa faatoa uma lava ona faafaigaluegaina a’u e se kamupani faufautua, ma sa latou auina atu le toaono o i matou o tagata faigaluega mai Filipaina i Sini, Ausetalia, e faatasi ai ma pule e 400 mai le lalolagi atoa mo ni aoaoga. Sa matou malaga i le vaalele i le vaega o tagata e ave i ai le faamuamua. Sa piki i matou i se taavale limosini mai le vaalele ma avatu faavave loa i matou i se faletalimalo aupito matagofie, lea sa tofu le potu ma se ato lapoa e tumu i mea mananaia. Sa manao le kamupani e faaali mai ia i matou o se kamupani lelei lea e faigaluega ai, ma sa mananao ia tumau a latou tagata faigaluega fou.
Ina ua mavae le aso muamua o fonotaga, sa faia se taumafataga fiafia, o se tulaga aloaia. Sa taitoa12 tagata i le laulau, e tofu ma pule e toa 10 ma sui pule e taitoa 2 o e sa tatau ona avea ma o matou faataitaiga lelei i le kamupani. Sa latou faamatala mai tala e uiga i lo latou amataga mai i le kamupani ma lo latou faasolosolo i luga i a latou matata. Sa latou tau mai e uiga i konakarate e tai fia miliona le tetele na latou faamautuina, o tagata fai pisinisi taua na latou galulue faatasi, ma galuega tetele sa latou taitaia. Sa ou faalogo i igoa o Alii Ofisa Sili o le Fortune 500 o taua soo lava, ma sa ou maofa i nei alii ona o galuega sa latou faia.
Sa matua maoae o matou lagona e uiga i o matou avanoa seia oo ina fesili ae se tasi o tagata o le laulau, “E faapefea ona taulimaina e lou toalua au femalagaaiga uma? E te aluese lava oe i taimi uma.” Ma sa faapea mai se tasi o paaga, “Na faatoa uma atu le ma teteaga ma lo’u toalua i le lua tausaga talu ai.” Ma sa faapea mai le isi paaga o le matou laulau, “Ua lima tausaga talu ona ma tetea ma lo’u toalua.”
Ou te manatua o’u mafaufauga: “Ou te le fia faapei o nei alii. Ou te le manao ou te galue mo lenei kamupani aua ou te le popole tele i manuia faalelalolagi pe afai o loo taapeape lo’u aiga.” O le faataitaiga a lo’u tama sa faigofie ai ona ou filifili e faamuamua lo’u aiga, ma sa ou maua se isi galuega na mafai ai ona ou faia lena tulaga.
O Le Faaola
E moni lava, o le faataitaiga sili mo o tatou olaga faaletino, o le Alii o Iesu Keriso, le Alo o le Atua, o le sa atoatoa i mea uma lava ma tuuina mai o Ia lava o se taulaga mo a tatou agasala. O a tatou amioga ma faatinoga amiotonu uma lava, e fotu ae mai lo tatou faatuatua i lo tatou Faaola, ma o lena faatuatua e fotu ae mai la tatou molimau e uiga ia te Ia ma mea sa Ia faia mo i tatou. Ou te matua faafetai lava mo Lana taulaga. Ou te molimau atu o loo soifua o Ia ma e finagalo o Ia ia ola i tatou uma taitoatasi i se olaga agavaa ina ia mafai ona tatou toe foi atu ma mafuta faatasi ma lo tatou Tama Faalelagi. Afai tatou te mulimuli i le Faaola ma avea faapei o lo tatou Tama oi le Lagi, o le a mautinoa le faamanuiaina o i tatou.
Aisea e Taua ai Tagata ua Avea ma Faataitaiga?
O le mulimuli i tagata ua avea ma faataitaiga lelei o se ki lea i lou lumanai. O le a iu ina e faapei o tagata e te tulimataia, o le mea lea ia saili ai toa lelei, ma taumafai e ola e faapei foi ona latou soifua ai. Mafaufau i mea e faavavau e fai ma au fuafaatatau po o ai e tatau ona avea ma faataitaiga lelei ia te oe. Vaai i faataitaiga lelei i totonu o lou lava aiga, ma mamanu ai lou lava olaga e mulimuli ia i latou. Vaai atu i isi o loo mamanu o latou olaga i le Faaola, ma ia mamanu lou olaga ia i latou.
Ia filifili ma le poto tagata e avea ma faataitaiga ia te oe aua e avea i latou ma toa ia te oe. O le a e manatua mea latou te faia, ma o le a avea lena ma au mamanu, ma mafai ai ona e faia ni filifiliga poto. Ma e le umi lava, ae o le a amata foi ona vaavaai mai isi ia te oe ma mamanu o latou amioga lelei i se tagata ua avea ma faataitaiga latou te faamemelo i ai—o oe.
Ata na tusia e Craig Dimond; Lauga Atu le Tupu o Peniamina i Sa Nifae, saunia e Gary Kapp; ata faaopoopo: O Loo Lauga Atu le Tupu o Peniamina, saunia e Jerry Thompson
Taitai au Moronae ma le Tagavai o le Saolotoga, saunia e Arnold Friberg; O Nifae o loo Tutuli [Manu] ma le Liahona, saunia e Gary Smith
Tauagavale: O Taitai au Moronae o se taitai sili ona malosi na tusia e Mamona mulimuli ane, “Ana tusa ma Moronae tagata uma sa ola mai atali, faauta, po ua luluina e faavavau le pule a seoli, ioe, po ua leai lava se pule i le tiapolo i loto o le fanauga a tagata.” Lalo: Ua aoao mai e le faataitaiga a Nifae ia tatou faatuatua i le Alii nai lo le muimui.
Lo’u Tama e, saunia e Simon Dewey
Tauagavale: O faifeautalai e mafai ona avea ma faataitaiga maoae i e latou te aoaoina. Luga: Sa avea le Tupu o Peniamina ma se faataitaiga i lona nuu. Ina ua uma ona saunoa atu o ia ia i latou, sa oo i le nuu se liliu tele i o latou loto.
O le faataitaiga sili mo o tatou olaga faaletino o le Alii o Iesu Keriso, o le sa tuuina atu o Ia lava o se taulaga mo a tatou agasala. O a tatou amioga ma gaoioiga amiotonu uma lava, e totogo ae mai lo tatou faatuatua i lo tatou Faaola.