O le Puipuia mai Mea Matautia mai Totonu O Le Tala ia Mixco Viejo
Ao faia se malologa puupuu mai lana galuega uelo o loo faia, sa tuutuu i luga e Byron Iquic lona pulou taumata ae solo le afu mai lona muaulu. O Peresitene Iquic, o le peresitene o le Paranesi o San Juan, i le Siteki o Guatemala City Florida, o loo fausia se fale fou mo lona toalua o Etelvina, ma la laua fanau e toafa.
E alofa o ia i lona aiga ma manao ia lelei le fale, ae e manao foi o ia ia saogalemu ma malosi. O loka, moli, ma se taualuga ma puipui malolosi ua na o nisi ia o vaega ua saunia e puipuia ai lona aiga mai tagata ma elemene o le natura.
Ao talanoa o ia e uiga i le puipuia o si ona aiga pele, sa malolo teisi o ia. Talu ai ua masani Peresitene Iquic i le tala ia Mixco Viejo, ua ia malamalama ai, po o le a lava le lelei ona puipuia o le fale mai mea e tutupu i fafo, o tulaga sili ona matautia i lona aiga e ono oo mai mai mea e aumai i totonu e le aiga.
O Le Pa’ū o Mixco Viejo
O Mixco Viejo, o se aai faaleagaina e latalata i le fale o Iquic, sa amata mai anamua po o le t.a. 900. Atonu sa avea lea aai o se vaaiga matagofie ao lei pa’ū i le 500 tausaga talu ai. E tietie mai le aai faaauupegaina i le tumutumu o ni atumauga e vanu ona itu uma. O loo taumate tagata suesue o le eleele ma talafaasolopito sa i ai se taimi sa avea ai lea aai o se nofoaga mo tagata e sili atu i le 1,500, faapea ma le isi 7,000 sa nonofo i vanu o loo siomia ai.
E le o manino nisi o vaega o le talafaasolopito o le pa’ū o Mixco, ae e aoga le tala. I le 1525 sa taumafai ai le taitai au Sipaniolo o Pedro Alvarado e siomia Mixco Viejo. Na silia ma se masina o taumafai le au Sipaniolo ma i latou sa latou auau faatasi e faoa le aai, ae sa matua tele soifua na maumau ai. Peitai, sa tumau pea ona avea Mixco Viejo o se nofoaga mo ona tagata na faigata ona sao atu i ai se isi.
Ae peitai, fai mai le tala sa i ai se isi auala e sao atu ai—o se auala faalilolilo na tau atu i le aai mai se ana e le mamao, o se auala atonu na manatu tagata o Mixco Viejo e le manaomia ona puipuia aua e laitiiti ma sa lelei ona natia.
Sa maua e le au Sipaniolo. Sa latou faaaogaina si ava laitiiti sa le leoleoina e tagata o le aai, ma faateia ai tagata na nofoia le aai i lo latou o mai mai totonu ma faaumatia Mixco Viejo.
O Le Iloa o Vaivaiga
E talitonu Peresitene Iquic o fale ma aiga e faapei lava o Mixco Viejo—i lalo o se osofaiga faaleagaga lea e sau ai Satani e “siitaua ai i le au paia a le Atua, ma siomia faataamilo ai i latou” (MFF 76:29).
“E sue lava e le fili i taimi uma se auala e sau ai i totonu,” o le saunoaga lea a Peresitene Iquic. “E le tatau ona maua mai i tatou o tatou momoe.”
E leai se puipui faaletino pe faaleagaga e mafai ona taofia i fafo se fili e tau mai i se faitotoa e le o leoina. Ua lapatai mai perofeta a le Atua e faatatau i avanoa matautia e ono sao mai ai le fili i totonu e tusa lava po o le a le malosi o le puipui. O le tele o nei faitotoa e faatatau i mea tatou te matamata i ai, i mea tatou te faalogo i ai, ma auala e faaalu ai o tatou taimi. Ae, a uma ona tatou faalogo i lapataiga faaperofeta, e pule lava i tatou i la tatou filifiliga po o a mea e ao ona tatou faia.
Faamalolosia o o Tatou Aiga
E taua tele le Agaga Paia ao tatou filifili po o mea tatou te faia e faamalosia pe faavaivaia ai i tatou.
“O le ala foi e faamasino ai … e pei o le malamalama o le ao ai le pouliuli o le po,” o le aoao mai lea a Mamona. “Aua faauta, ua foaiina mai le Agaga o Keriso i tagata uma lava, ina ia iloa ai e i latou le lelei ma le leaga” (Moronae 7:15–16).
“Tatou te manaomia le Agaga Paia e fai ma o tatou taiala,” o le saunoaga lea a Peresitene Iquic. “E tatau ona tatou faaaofia i o tatou olaga mea e valaaulia ai le Agaga Paia ae aveese mea e tausuai ai ia te Ia.”
“Ua manino lava le tulaga faatonuina,” o le aoao mai lea a Elder David A. Bednar o le Korama a Aposetolo e Toasefululua. “Afai o se mea tatou te mafaufau i ai, vaai i ai, faalogo i ai, pe fai foi tatou te taumamao ai mai le Agaga Paia, o lona uiga ua tatau loa ona taofia le mafaufau i ai, vaai i ai, faalogologo i ai, po o le faia o lena mea. … O le avea “o le Agaga Paia ma o [tatou] taiala’ (MFF 45:57) e mafai ma e taua mo lo tatou tuputupu ae faaleagaga ma lo tatou ola ai i se lalolagi ua faateteleina le amioleaga.”1
Toe Fausiaina o Puipui
I le aso, o loo taumafai tagata e faasaosaoina ma toe fausia mea na faaleagaina o Mixco Viejo—o se galuega faigata tele i le mavae ai o le 500 o tausaga.
O loo taumafai Peresitene ma Tuafafine Iquic e faasaosao lo latou aiga ma puipuia mai le lalolagi, o se galuega foi e faigata ae e mafai ona faia e ala i tatalo faaleaiga (tagai MFF 10:5), suesue faaleaiga i tusitusiga paia (tagai 1 Nifae 15:23–24), afiafi faaleaiga (tagai 2 Nifae 25:26), ma le aoaoina o le taua o le usiusitai (tagai MFF 88:34).
O loo aoao atu foi e Peresitene ma Tuafafine Iquic le salamo aua ua la malamalama e ui lava i le faia o na mea uma e puipuia ai lo laua aiga ma i laua lava ia, atonu e tele atu ni faitotoa nai lo faitotoa e mafai ona leoina. Ma i se taimi itiiti o le vaivai e mafua mai i mea faalavelave, e ono pa’ū ai lava se tasi.
I le saunia ai mo na taimi, ua iloa e Peresitene ma Tuafafine Iquic e tatau ona la aoao atu la laua fanau e le gata i le faatuatua ia Iesu Keriso ma Lana Togiola ae faapea foi i le salamo (tagai MFF 68:25) aua a oo ina fai e la laua fanau ni mea sese, o le a latou iloa o latou sese ma iloa le auala e faaleleia ai.
“O le a i ai pea lava pea faaosoosoga,” o le saunoaga lea a Peresitene Iquic. “E tatau ona tatou iloa o tatou sese ma vave ona salamo, a leai o le a tuutaia ai lo tatou alualu i luma ma taofia ai i tatou mai le puipuiga a le Agaga.”
I le mou atu ai o le malamalama ma le tala ia Mixco Viejo i lona mafaufau, ua teu ai e Peresitene Iquic ana meafaigaluega ae valaau faatasi lona aiga mo la latou lotu afiafi ao faasolo ina pogisa. ◼
Faatasi ai ma taumafaiga e puipuia la laua fanau mai tulaga matautia faaleagaga, o loo aoao foi e Byron ma Etelvina Iquic i latou e uiga i le salamo ina nei tei lava ua sosolo ane le fili i talaane o puipui o lo latou aiga.
Ata na pueina e Adam C. Olson
Luga: O Byron ma Etelvina Iquic ma le la fanau (mai le agavale) Briseida, Byron, Glenda, ma Nelson o loo asiasi i toega o mea na faaleagaina o Mixco Viejo i Kuatemala. Fai mai le tala sa faatoa faoa lenei aai na malu ona puipuia ina ua maua e le fili se ala lilo agai i totonu.