Fesili ma Tali
“Ua amata ona ulaula la’u uo. E faapefea ona ou ofo atu e fesoasoani ia te ia e aunoa ma le faatiga ia te ia?”
Atonu ua iloa e lau uo e le lelei le ulaula mo le ola maloloina. Ma afai o ia o se tagata o le Ekalesia, ua ia iloa o le ulaula ua le tusa ai lea ma le Upu o le Poto. O le auala sili la e fesoasoani ai ia te ia o le le faitioina lea o ia ae ia faamalosiau ia te ia ina ia faafoia lena amio.
A e talanoa atu ia te ia i lenei faafitauli, tau i ai ua e talanoa atu ona o lou popole alofa ia te ia, o lona ola maloloina, ma lona manuia faaleagaga. Afai e te iloa ua manao o ia e tuu le ulaula, ia e lagolagosua ma faamalosiau i ai. Atonu e te manao e faitau le Talai La’u Talalelei, itulau 203, lea e tuuina mai ai ni nai manatu e fesoasoani i tagata e faafoia o latou mausa le lelei.
O le tele o tagata sailiili i le Ekalesia ua mafai ona tuua le ulaula ina ua latou malamalama e uiga i le Upu o le Poto. Na oo mai lea suiga e le gata ona o le faateleina o lo latou lava uunaiga ae ona o faamanuiaga faaleagaga. Sa faamanuiaina i latou e le Alii ina ia aveesea lo latou manao e ulaula ae ia maua le manao e usiusitai. Mafaufau e valaaulia lau uo e te lua anapopogi ma tatalo mo lea faamanuiaga.
Fesili Atu Pe Faapefea Ona E Fesoasoani Atu
Ta’u atu ia te ia e te alofa ma e popole ia te ia. I se auala manaia, faamanatu atu ia te ia o le ulaula e le lelei mo le tino. Ta’u atu ia te ia e te matua manao e fesoasoani ia te ia i soo se auala e te mafaia, ma fesili atu po o le a se mea e mafai ona e faia.
Alysha S., 13, Iuta, ISA
Avea oe ma se Faataitaiga
I le taimi ao ou i le aoga maualuga, na amata ona ulaula le toatele o a’u uo. Sa na o a’u lava le tagata o le Ekalesia na auai i lena faapotopotoga o uo. Sa latou iloa o a’u o se tagata o le Ekalesia. I se tasi taimi sa latou fesili mai ai ia te a’u pe aisea ou te le ulaula ai. Sa na ona o’u ataata ma tali atu i le lotomaulalo, “Tatou te iloa ua fai mai le Tusi Paia o o tatou tino o le malumalu, ma o se meaalofa taua ua tuuina mai ia i tatou. O le mea lea, e tatau ai ona tatou alolofa ma tausia le meaalofa ua tuuina mai ia i tatou aua e mai i le Atua.” Sa latou tali mai atonu e sa’o a’u ma e tatau o matou tausi i o matou tino. Sa ou faasoa atu ia i latou la’u molimau e uiga i le Upu o le Poto. Afai tatou te tausia o tatou tino, o le a faamanuiaina i tatou i le ola maloloina lelei ma le poto. Na ou iloa i o latou foliga faaalia ua latou talitonu i mea na ou faasoa atu ia i latou. Talu mai lena aso ua ou vaaia lo latou alualu i luma. O le faasoa atu o lau molimau ia i latou o e o loo tauivi ma le ulaula e mafai ona fesoasoani ia i latou e filifili ai le mea sa’o.
Michael T., 18, Palawan, Filipaina
Faamalosiau ia te Ia e Tatalo
Muamua, ou te tatalo i le Tama Faalelagi e pa’i atu i lona loto, e fesoasoani ia te ia ia malamalama i le taua o le Upu o le Poto, ma fesoasoani ia te ia ia sui. Ou te faamanatu ia te ia e uiga i aafiaga leaga o le ulaula, i le faaleagaga ma le faaletino. Ou te faamanatu foi ia te ia e uiga i lona taua o se tina faamoemoeina ma o lona tino o le malumalu o le Atua ma o le a le fiafia le Tama Faalelagi pe afai na te faaleagaina. Ou te faamalosiau ia te ia e tatalo mo se fesoasoani.
Daniel C., 17, Rivers, Nigeria
Ia Faatuatuaina Oe
Sa masani lava ona ou manatu o le talanoa ma uo e uiga i faafitauli o loo latou faafeagai o le auala sili lea latou te faatuatuaina ai oe. O le faaali atu o lou popole e faailoa atu ai ia i latou e te popole alofa ia i latou ma mea o loo latou faafeagai. E te maua loa se malamalamaaga lelei i mea o loo latou faafeagai, ona mafai loa lea ona e tuuina atu ni fautuaga ma ofoina atu se fesoasoani. O le a faaali atu ai i au uo o loo i ai se tasi e lava lona alofa ia i latou e fai atu ai e tuu le faaleagaina o i latou lava.
Blaine L., 18, Arisona, ISA
Faaali Atu le Alofa
O le mea muamua lava e tatau ona e faia o le faaali atu o lou alofa ma lou manao faamaoni e te fesoasoani ia te ia. Na te iloa loa e te popole alofa ia te ia, ona manaomia lea o lou talanoa atu i ai ma le faaaloalo ma le lotomaualalo e uiga i lana filifiliga e amata ona ulaula. Faamanatu atu ia te ia o ai ia ma lona taua o se tagata ma le faaleagaina o le a faia e le ulaula ia te ia. E mafai foi ona e sii atu i ai le mau o loo talanoa mai e uiga i le Upu o le Poto ma faamanuiaga e maua mai ai (tagai MFF 89). Afai tatou te alo ese i le faamasino atu, o le a faafaigofie foi ona pai atu i loto o tagata.
Mariana S., 18, Buenos Aires, Atenitina
Tausia o o Tatou Tino
O se faauoga o se mea maaleale e faigata ona soona tuu faamalosi atu i ai ou lagona po o manatu faaletagata lava ia. E sili atu foi ona faigata pe a aafia ai ni mataupu o le talalelei. Ou te faamalosiau atu ia te oe e faailoa atu lou popole alofa i lau uo ma faamalamalama ia te ia o le ulaula e le lelei mo le ola maloloina. Faailoa atu e te le manao e faaleagaina o ia i le itu faaletino; ma a tulai mai loa se avanoa, ona faasoa atu loa lea o ou lagona e uiga i le Upu o le Poto. E faamanuiaina i tatou e le Tama Faalelagi pe a tatou tausia le tasi o Ana meaalofa sili ona taua mo i tatou: o o tatou tino.
Kent P., 21, Alberta, Kanata