O Mai e Faalogo i le Siufofoga o se Perofeta

Aapa Atu i Isi

Saunia e Peresitene Thomas S. Monson

Mai se lauga sa faia i se faigalotu i le Iunivesite o Polika Iaga i le aso 13 o Novema, 2007.

Ua aoao mai Peresitene Monson e mafai ona tatou fiafia pe afai tatou te aapa atu i isi.

President Thomas S. Monson

Ina ia maua le fiafia moni, e tatau ona tatou tulimatai atu i fafo o i tatou lava. E toatele ua o mai i totonu o le Ekalesia—pe ua oo ina latou iloa ma faaaloalogia le Ekalesia —aua sa taumafai se tasi e aapa atu i fafo atu. Ou te faasoa atu ia te outou se aafiaga o loo teufatuina e lo matou aiga na amata mai i le 1959, ina ua valaauina a’u e pulefaamalumalu i le Misiona a Kanata i Toronto.

Na lei umi lava na matou taunuu i Kanata, ae atoa le lima tausaga o le ma tama teine, o Ana. Sa vaai o ia o feoai faifeautalai i le faia o a latou galuega, ma sa manao foi o ia e avea ma se faifeautalai. Sa faaalia e lo’u toalua lona agaga malamalama i lona faatagaina lea o Ana e alu ma ave ni nai kopi o le Uo a Tamaiti [lea ua taua nei o le Uo]. Sa le lava lena ia Ana. Sa manao foi o ia e ave se kopi o le Tusi a Mamona ina ia mafai ona talanoa ai o ia i lona faiaoga, o Miss Pepper, e uiga i le Ekalesia.

I ni nai tausaga na mavae nei, i le tele o tausaga talu ona matou toe foi mai Toronto, sa matou foi mai ai i lo matou aiga mai sa matou malologa ma maua ai se tusi i totonu o la matou pusa meli na aumai ia Miss Pepper na faitauina faapea:

Le pele Ann:

Mafaufau i tua i le tele o tausaga ua mavae. Sa avea a’u ma ou faiaoga i Toronto, Kanata. Sa ootia a’u i kopi o le Uo a Tamaiti na e aumaia i le aoga. Sa ootia a’u i lou tuuto i se tusi ua taua o le Tusi a Mamona.

Sa ou faia se folafolaga e i ai se aso ou te alu atu ai i le Aai i Sate Leki e vaai pe aisea na e talanoa mai ai e pei ona sa e faia, ma pe aisea foi ua e talitonu ai i le ala ua e talitonu ai. O le asō sa ou maua ai le avanoa ou te alu ai i le nofoaga autu mo tagata asiasi i le Lotoa o le Malumalu. Faafetai lava i se teineitiiti e lima ona tausaga o le sa i ai sona malamalamaaga o mea sa ia talitonu i ai, o lenei ua ou maua se malamalamaaga atili i le Ekalesia a Iesu Keriso o le Au Paia o Aso e Gata Ai.

Na maliu Miss Pepper i se taimi e lei leva talu ona mavae lena asiasiga i le Aai i Sate Leki. Oka se fiafia o Ana ina ua ia ulufale atu i le Malumalu o Jordan River i Iuta ma faatinoina galuega faalemalumalusa mo lona faiaoga pele o le sa ia aapa atu i ai i le tele o tausaga ua mavae.

Totoina o Fatu o le Talalelei

O le aapa atu i isi o se tasi lea o auala e mafai ona e faasoa atu ai le talalelei i aso uma. Soo se taimi lava e te tautala ai i le mea sao, e te loto fesoasoani ma agalelei i au uo, pe e te ola foi i tulaga faatonuina o le talalelei, o loo e faasoaina atu le talalelei. O taimi e te faia ai ia mea, o loo e totoina ni fatu ninii o le talalelei i loto o tagata. O nisi o na fatu atonu e i ai ni aso e ola ae ai i ni molimau matagofie ma malolosi o le talalelei.

Vaavaai i vaaiga ia o loo i lalo. I luga o fatu taitasi, ia tusi ai se upu e ta’u mai ai se auala se tasi o loo faasoa atu ai e le tamaitiiti le talalelei. Ua faia le tasi mo oe. Ona valivali lea o fugalaau matagofie e ola mai i fatu taitasi.

O Se Tamaitai Laitiiti Ua Matua

Ann M. Dibb

Ua matua ma ua faaipoipo nei ia Ann Monson, ma o lona suafa o Ann M. Dibb. Sa na o le fa ona tausaga i le taimi na avea ai lona tama ma peresitene o se misiona. O loo ia manatuaina pea foliga o le kapeta ma meaafale i le fale o le misiona. O loo ia manatuaina lona tootuli ma tatalo i tafatafa o lona moega ao fitu ona tausaga ma lagona ai le ta’u mai e le Agaga ia te ia e iloa lelei o ia e le Alii. Ina ua iva ona tausaga, sa avea lona tama ma se tasi o le Korama a le Au Aposetolo e Toasefululua. E toalua ona tuagane, ma o ia o le afafine e toatasi i le aiga o Peresitene ma Sister Monson.

O Sister Dibb e lalelei ma mafanafana ona foliga ataata, ma o loo fiafia pea e aapa atu i isi. E fiafia o ia e tusia ni tusi ma faia ni keke ma ni pai mo tagata. I le konafesi aoao ia Aperila 2008, sa faauuina ai Sister Dibb e avea ma fesoasoani lua i le au peresitene aoao a Tamaitai Talavou. E femalagaai o ia i le lalolagi atoa, e feiloai i tamaitai talavou ma musuia i latou ia mulimuli i faataitaiga a le Faaola ma aapa atu i isi.

O Peresitene ma Sister Monson i le 1961 faatasi ai ma Ann ma ona tuagane, o Tom (agavale) ma Clark (ogatotonu).

Ata na tusia e Beth M. Whittaker; ata o Sister Dibb na pueina e le Busath Photography

Fesoasoani