Taulimaina o le Atuatuvale o Tina Failelele O Se Vaaiga Faaletalalelei

Saunia e Lynn Clark Callister

Polofesa o le Iunivesite a Polika Iaga, Kolisi Faatausimai

A tauivi se tamaitai ma le atuatuvale o le avea ma se failele, e taua lona maua o le lagolagosua mai lana tane, tagata o lona aiga, ma isi.

Ina ua mavae le fa o tausaga o taumafai ia maua se isi a la pepe, sa faafetai Ana (ua suia igoa) ma lona toalua ina ua fanau mai se la afafine. Peitai na lagona e Ana o le taumafai e toe faamasani i tulaga manaomia o se pepe fou, e faaopoopo i le tausiga o lana fanau tama, sa matua lofituina. Sa ia lagonaina lona faasolo ina goto atu i le atuatuvale e ui lava i ana taumafaiga sili e taulima ma faatumau se lagona masani o le lelei o mea uma. Sa tauivi Ana ma le atuatuvale o le avea ma se failele.

O tina uma lava, e aofia ai ma Ana, e iloa o le maua o se pepe e “tatau” ona avea ma taimi fiafia ma e “tatau” i tina fou ona faafetai mo lea faamanuiaga ofoofogia i o latou olaga. Peitai mo nisi o tina, o gasegase o lagona o tina failelele e matua tele se eseesega mai ia lagona fiafia. O le atuatuvale o le tina failele e faaalia i le tele o auala ma e mafai ona i ai aafiaga faaletino, faalelagona, e oo lava i le faaleagaga mo tamaitai o e mafatia ai. Mo se faataitaiga, o nei tina e ono i ai ni o latou faamoemoega faigata mo i latou lava i se taimi o suiga maoae, ma lagona ai e tatau ona mafai ona latou faia mea uma mo i latou lava ma a latou pepe fou aua e tatau ona avea i latou ma “tina-maoae” ma “ava-maoae.”

E taua i nei tamaitai—ma o latou aiga—ona malamalama i le mea tonu e ta’u o le atuatuvale o le tina failele (po o mea e le ta’ua o le atuatuvale o le tina failele), iloa faailoga, saili auala lelei e taulimaina ai, ma le mea sili ona taua, ia iloa o loo i ai le faamoemoe mo le ola i le olaga e masani ai ao feagai ma lagona o le atuatuvale.

O le feagai o se tamaitai ma atuatuvalega o le tina failele e le faapea ai o ia e vaivai, pe ua ia faia se mea sese, pe faapea foi e tuuaia o ia mo ona lava lagona lofituina. O le tele lava o tulaga faapea e le tumau. O le puapuagatia i atuatuvalega o le tina failele, e pei lava o le feagai ma isi faigata, e mafai ona tatou latalata atu ai i le Faaola ao tatou saili i auala e maua ai le malosi faaleagaga. E pei ona faamalamalama mai e le sa avea ma peresitene aoao o Tamaitai Talavou o Ardeth G. Kapp: “Ua tatou iloa e uiga i lo tatou Faaola, peitai o le tele o taimi o o tatou faigata e mafai ona tatou matua maua moni ai o Ia ma iloa moni ai o Ia ma alofa moni ai ia te Ia. … E mafai ona ou molimau atu mai o’u lava aafiaga i lo’u olaga o nisi o a tatou avega aupito mamafa, faanoanoaga, ma le lototiga e i ai le taimi e mafai ona suia ai i le ‘manuia [filemu] mai le Atua, o loo silisili lava i mea uma e manatu i ai’ (Filipi 4:7) ao tatou ‘faatalitali ia Ieova’ (Isaia 40:31).”¹

E Faigata Atu Nai Lo Na o “Faanoanoaga Ona o Pepe”

Mo nisi o tamaitai, o le fanauina o fanau e tutupu ai ni lagona le tumau o le faanoanoa lea e masani ona taua o “faanoanoaga ona o pepe.” O faailoga—ia e masani lava ona aliali mai i totonu o le vaiaso muamua o le fanau mai o se pepe ma e mafai ona oo atu lava i le 10 aso—e ono aofia ai le maligi o loimata, itagofie, vaivai, popolevale, ma lagona maaleale i mea lelei ma mea faalelelei. O faanoanoaga ona o pepe e tele lava ina mafua ona o suiga faaletino e oo i ai le tina, peitai o nei faailoga e mafai ona faateteleina ona o le le lava o le moe, le paleni o meaai, o se pepe faigata, ma le leai o se lagolagosua. O faanoanoaga ona o pepe e tupu i aganuu uma lava i le lalolagi ma e aafia ai e oo atu i le 80 pasene o tamaitai o e fanauina fanau.

I lona faafeagai, o le atuatuvale o le tina failele o se gasegase e faavae i le paleni o le fausaga faanatura ma vailaau o le tino. E ui lava e leai se tasi o mautinoa le mafuaaga moni o le gasegase, ae talitonu le au suesue o le fesuisuiaiga i mone e tupu i taimi o le maitaga ma le taimi e maea ai le fanau mai o le pepe, o mea ia e ono tupu ai fesuisuiaiga o le paleni i vailaau faanatura i le faiai. O lena, faatasi ai ma popolega ma le vaivai lea e oo mai i le fanauina o se pepe fou, e mafai ona oo atu ai i le atuatuvale. E tusa e 10 pasene o tamaitai o e fanauina se pepe o le a maua i le atuatuvale o le tina failele, lea e masani ona tupu i totonu o le fa vaiaso i le maea ai ona fanauina o le pepe, ae mafai foi ona tupu mai i soo se taimi i le tausaga e sosoo ai. O le tele o tamaitai o e maua i le atuatuvale o le tina failele sa oo muamua i le atuatuvale; o tina fou o loo i ai i lenei vaega e tatau ona vaavaai lelei o latou lagona ina ia latou maua se fesoasoani pe a aliali mai ma faateteleina ia faailoga.

O nisi tamaitai e oo i ai le atuatuvale o le tina failele, e amata ona faasolo manuia o latou faalogona i totonu o ni nai vaiaso, ae o isi, latou te lagonaina “ua ese lava i latou” mo ni nai masina. Ae e le o mamao lava le fesoasoani: o le iloa o faailoga o le laasaga muamua lea i le toe amata ona toe lelei o lagona.

Faailoga

E masani lava, e manatu se tina fou o le lagonaina o le atuatuvale ua faaalia ai lona vaivai. Atonu e popole foi o ia nei manatu mama nisi tagata ia te ia pe a latou iloa ona faalogona. Ona o ia mafuaaga ma isi lava, atonu o le a ia le talanoaina ai faailoga e oo atu ia te ia, ae tuu ai le atuatuvale o le tina failele e le vaaia ma le togafitiaina.

Na talanoa mai Ioane e uiga i le aafiaga o lona aiga ma le atuatuvale o le tina failele, sa ia faapea mai, “Na nana e lo’u toalua, o Karolina, ona faailoga [o le atuatuvale] mai tagata uma, na oo lava ia te a’u. Sa faigata ona ou iloa pe o le a tonu le mamafa o ona mafatiaga. Ou te manatu sa mafaufau o ia i le avea ai o ia ma toalua o le epikopo e le mafai ai ona ia tauina atu i se tasi—e le o au, e le o ana uo, e le o lona tina—se mea na tupu.”

Sa ta’ua e Dr. Cheryl Tatano Beck, o se tamaitai tausimai suesue, o le atuatuvale o le tina failele “o le gaoi e faoa le lagona faaletinā.”² Peitai e mafai e tagata o le aiga ma uo mamae ona fesoasoani e faaumatia lea “gaoi” e ala i le vaavaai mo ona faailoga. Atonu latou te mautauina ni suiga i amioga o le tina fou, e aofia ai mea ia:

O se lagona atuatuvale lea e uma lava le tele o aso o i ai.
O le leai o se ataata pe taaloalo ma le pepe.
O ni foliga pupula a lalo po o le sioa.
O le faanoanoa i taimi uma.
O ana faamatalaga e uiga i ni ona faaletonu po o ni faaletonu o le pepe.
Faaalia o lagona tausalaina po o lona le agavaa.
O lona le mautonu e uiga i mataupu masani.
O le aliali o lona itaitagofie, aemaise lava pe a tagitagi soo le pepe. (Tagai i faamatalaga “Faailoga o le Atuatuvale o le Tina Failele” i autafa o le itualu 30 mo nisi faailoga i totonu o le tagata lava ia e na o tina lava latou te iloa.)

Afai e manatu tagata o le aiga ma uo mamae ua latou iloaina nisi o nei faailoga ae e le o mautinoa, e mafai ona latou fesili atu ma le faaeteete i le tina ni fesili e pei o le “O i ai se mea o mamafa ia te oe [po o e faanoanoa ai pe ua leai sou faamoemoe]? O le a le umi talu ona i ai ou lagona faapea?” po o le “O e lagonaina e leai se fiafia i lou olaga?” E iloa loa e le tina ma i latou e latalata ia te ia ia faailoga, ona mafai loa lea ona amata ona latou taulimaina le atuatuvale.

Taulimaina o le Atuatuvale o le Tina Failele

E taua tele le taulimaina o le atuatuvale o le tina failele, e le gata mo le manuia o le tamaitai ae faapea foi mo le pepe ma le aiga atoa lava. Talu ai o le tina e masani lava o le totonugalemu lea o le siosiomaga o fegalegaleaiga a lana tama, o ona lagona e aafia ai foi le tamaitiiti. Ma o le manuia o le tina ma le pepe e aafia ai foi le manuia o le aiga.

Talu ai o lenei tulaga e aafia ai le aiga atoa, o le puleaina o le atuatuvale o le tina failele o se popolega a le aiga atoa. E taua i le tamaitai le maua o le lagolagosua mai lona toalua, tagata o lona aiga, ma isi.

Lagolagosua mai Aiga ma Uo. I le “O Le Aiga: O Se Folafolaga i le Lalolagi,” “o le tane ma le ava ua i ai tiutetauave paia e alofa ma tausi e le tasi le isi ma a la fanau.”³ O auala autu mo le faafetaiaia o luitau o le atuatuvale o le tina failele o le, ia faamalosia ai sootaga a le ulugalii ma ia faateleina ai le ola magafagafa o le tane. E taua le maua e le tina fou o le fesoasoani ma le lagolagosua a le tane i gaoioiga e pei o nei:

O le faatinoina o galuega i le fale ma le tausia o le isi vaega o le fanau.
Faaitiitia le fuainumera o tagata e asiasi atu ina ia maua ai se siosiomaga filemu. (Peitai, o nisi tamaitai, o le i ai o tagata e asiasi atu e ono fesoasoani e faaitiitia ai faailoga o le atuatuvale.)
O le fesoasoani i le tina ia lava sana malologa, talafeagai ana mea taumafa, ma faamalositino.
Fesoasoani i le tausiga o le pepe.
Ia aoao e uiga i le atuatuvale o le tina failele.
Tuuina atu o faamanuiaga faaleperisitua pe a tatau ai.
Ofoina atu o le meaalofa o lou i ai—o le faalogo, alofa, ma le tau lava o le i ai faatasi ma ia. Faatasi ai ma le fusi atu ia te ia, o se talatalanoaga faamalolo atonu e na o le tasi lava le fuaiupu: “Ai lava se faigata o lenei mea ia te oe.”
Faamalosiau atu i le tina fou e saili se fesoasoani faafomai pe a talafeagai ai.

Fai mai Rasela, o le sa aafia i le atuatuvale o le tina failele i le maea ai o le fanau mai o lana tama lona tolu, “O le galuega sili ona itiiti e avea ma mea matautia le faigata, aua na leai so’u malosi faalelagona ma faaletino. Sa ou matua faafetai i lo’u toalua i lona malamalama ma lona agaalofa ma lona fesoasoani ia te a’u i le aumaia o le fesoasoani sa ou matua manaomiaina.

Atonu e faigata ona malamalama se tane i le atuatuvale o le tina failele, ma o nisi taimi atonu e tali mai ai o ia ma le le mautonu, le fiafia, ita, tausalaina, popole, po o le maasiasi. Atonu e fesoasoani ia te ia le auai i faatalatalanoaga faufautua po o le faitau o tusi e faalautele ai lona malamalama i le atuatuvale o le tina failele ma iloa ai auala e sili ona aoga ai lana fesoasoani. O lona faia o lea tulaga e mafai ona aoga ia te ia ma lona toalua.

Sa faapea mai Ioana, o le sa mafatia i le atuatuvale o le tina failele ina ua fanau le au i lana masaga, “E ui ina sa fai ma luitau ia i maua ma Samu lea aafiaga, ae ua faamalosia la maua faaipoipoga. Na faateleina lo ma felatai i la maua mafutaga nai lo le mea sa i ai muamua. Sa ma galulue faatasi e foia faafitauli. Sa ou faalagolago ia te ia mo faamanuiaga faaleperisitua. Sa ma fesootai moni lava o le tasi i le isi aemaise ai ma le Alii.”

E mafai ona faalauteleina e le aiga lautele ma tagata o le Ekalesia le lagolagosua a le tama. O Kathleen H. Hughes, lea sa avea muamua ma fesoasoani i le au peresitene aoao o le Aualofa, sa saunoa e uiga i lona aafiaga i le atuatuvale o le tina failele ma le fesoasoani na ia maua mai i isi.

“Ina ua maea le fanau mai o le ma atalii … , sa ou oo i se atuatuvale matautia. O le toatele o tamaitai i lo’u aiga e mafatia i le atuatuvale o le tina failele ma, e pei ona outou silafia, i aso na sa laitiiti lava se mea na faia e fomai e fesoasoani ai i tamaitai sa maua i lenei tulaga. Sa tuua a’u e tauivi e saili lo’u auala ou te sao ai i lea pogisa.

“Ae o na taimi faigata mo a’u sa masani ona faafaigofieina ma faamamaina e uso agalelei o le uarota o e na alolofa i la’u fanau ma alolofa foi ia te a’u i le faaletino, faalelagona, ma le faaleagaga—ma fesoasoani mai ai ia te a’u i lena taua faalelagona.”⁴

E mafai ona maua e tamaitai le lagolagosua faaopoopo e ala i faalapotopotoga mo tina fou. Sa lipoti mai e Kirisitina, o le sa nofo mamao mai [lona] aiga lautele ma lagona lona tuua toatasi ina ua uma ona fanau i lana pepe muamua, e faapea, “Ao ou talanoa atu i isi tina talavou i le matou atufalega, sa ou iloa ai e tele vaega e tutusa lelei ai a ma tauiviga. Sa matua fesoasoani lava lena mea—ma na tele lava ina ou ata nai lo lo’u tagi.”

Togafitiga Faapolofesa. Atonu e mafai e tina fou ona mafaufau e saili se fesoasoaniga faapolofesa, e aofia ai fautuaga mai le Tautua a le AAG mo Aiga (tagai www.ldsfamilyservices.org) pe mai se isi fesoasoani talafeagai e fautua mai e se fomai. Mo nisi, atonu e manaomia ai ni talavai, e pei ona tusia mai e se fomai o le mafaufau po o isi fomai.

Tausia o Oe Lava. E matua taua tele le tausia e tina fou o i latou lava e ala i le matua lava o le malolo, ai o meaai paleni, ma le faaaoga o le “taimi malolo” e faatasi ai ma ni vaega o tina po o ni vaega e tafafao faatasi ai tamaiti.

Ma le isi, talu ai o le tulaga faatina e matua faigata i le faaletino ma le faalelagona, o lea e tatau ai i tina ona faatutu ni sini anoa e mafai ona fetuutuunai, ma ia manatua “o le mea ma lona tausaga i mea uma” (Failauga 3:1). O Elisapeta, o le sa fanauina se fanau teine e toafa i le va o ni nai tausaga, sa faapea mai, “E le tatau ona tuu le faia o feau i le fale ma le kukaina o meaai pe afai e i ai isi tamaiti o manaomia ni lavalava mama ma ni meaai. Na ou iloa le aoga o le faia o ni feau laiti i aso taitasi—tasi le tagamea, fufulu le tapu o le faletaele (ae le o le faletaele atoa), fuafua meaai, ona alu lea o lo’u toalua e fai le faatau. O le lagona o loo ou aoga, e tusa lava pe na o sina mea laitiiti i aso taitasi, o se faamalosiauga tele lea.”

O Isi Fesoasoaniga Aoga. E ono aoga foi isi gaoioiga i le puleaina ma le faatoilaloina o le atuatuvale o le tina failele.

O le faalogologo i musika faagaeetia.
O le faitauina o tusitusiga paia ma isi tusi musuia. Sa lipoti mai e Ana sa sili lava lona fiafia i le faitauina o le 2 Nifae 4, lea o loo faamaumau ai lagona o le lotovaivai ma le le mautonu o Nifae, ona tupu ai lea o lona iloa o le alofa o le Alii mo ia: “Ua fai lo’u Atua mo’u faalagolagoga; na Ia taitai mai ia te au i o’u puapuaga” (2 Nifae 4:20).
Tausia o se tusi talaaga. Sa fai mai Rasela, “Ao ou tusitusi i totonu o la’u tusi talaaga, sa mafai ona ou faaleoa o’u lagona faanoanoa loloto. Sa fesoasoani ia te a’u ou te nofouta atili ai i mea na foliga mai na amata ai lagona o le atuatuvale. Sa fesoasoani foi ia te a’u e amata faitau ai o’u faamanuiaga.”
Tatalo mo se fesoasoani ma se faamafanafanaga. Fai mai Ana, “O le faanoanoa na atili faigata ai ona ou lagona le mafanafana o le Agaga Paia lea sa ou matua manaomia. Sa ou taumafai e luiina leo leaga ia sa ou lagonaina ai le vaivai ma masalomia ai lo’u malosi e manumalo ai i o’u lagona le lelei.” Sa fesili Ioana ia te ia lava ma le Alii i lenei fesili ao faia e ia se tatalo faaletagata lava ia ma manatunatu loloto, “Le Tama Faalelagi, o le a se mea e tatau ona ou aoaoina mai i lenei mea?

O Le Nofoaga o Tofotofoga i o Tatou Olaga

O le iloa e mafai ona tatou aoao mai o tatou tofotofoga e mafai ona faamalosia ai lo tatou faatuatua, e tusa lava pe o loo tatou i ai i le totonugalemu o faigata. E le tuulafoaiina lava i tatou e le Atua i o tatou tauiviga e saili le faamoemoe. Sa fautua mai Elder Jeffrey R. Holland o le Korama o le Au Aposetolo e Toasefululua: “I soo se tasi o loo tauivi ina ia iloa atu le malamalama ma maua le faamoemoe, ou te faapea atu: Ia taofi mau pea. Taumafai pea. E alofa le Atua ia te oe.”⁵ Ma e alofa lava o Ia ia te oe. Sa valaaulia i tatou e Sister Patricia Holland, le faletua o Elder Holland, tatou te toe foi i “le atoatoa o o tatou agaga, o lena lotogatasi i totonu o o tatou tagata lea e faapaleniina uiga eseese o le olaga ia e faigata ma le mafai ona tatou alo ese ai.”⁶

Sa faamatala mai e Ana le auala sa ia uia: “Ao ou tauivi e foia le atuatuvale o le tina failele, sa ou saili ia ou aluese mai le pogisa ae ulu atu i le malamalama, le malamalama o le Alo o le Atua. Sa ou tagi ina ua ou faitauina le Isaia 53:3–4, ina ua ou malamalama atoatoa mo le taimi muamua o le Faaola sa avea ‘o le tagata faanoanoa, ua masani foi ma le tiga. … E moni, ua na tauave o tatou tiga, ma na tauave o tatou faanoanoa.’ Sa ou taofi mau i le folafolaga e faapea, o le Faaola o lo’u Faaola patino, sa auina mai o Ia e ‘foaiina atu ia i [tatou] le matagofie e sui a’i le lefulefu, o le uu o le olioli e sui a’i le faanoanoa, o le ofu e fai a’i viiga e sui a’i le loto faavaivai’ (Isaia 61:3). Ao ou tulimatai atu i le Faaola, sa ou iloa atoatoa ai sa Ia silafia o’u mafatiaga, ma e mafai ona Ia fesoasoani mai ia te au ma le silafia lelei ao ou aapa atu ia te Ia.”

Ata na tusia e Dilleen Marsh

E mafai ona fesoasoani tagata o le aiga ma uo mamae e tuuitiitia le atuatuvale o le tina failele e ala i le vaavaai mo ona faailoga ma ofo atu le fesoasoani ma le lagolagosua.

O le iloa e mafai ona tatou aoao mai i o tatou tofotofoga e mafai ona faamalosia ai o tatou faatuatua, e tusa lava pe tatou te oo i le loloto o o tatou faafitauli ma faigata.