Puleaina o O Tatou Lotoita
Ina tatou tula’i mai ia ma avea o ni alii ma tamaitai o le Atua, ma puleaina o tatou loto ina ia tauluuluola le filemu ma le alofa i totonu o o tatou aiga.
A o ou faiaoga i vasega o faaipoipoga ma aiga ma faitauina pepa e faamatala ai e tamaiti aoga a latou sootaga ma o latou matua, sa manino mai ai i le gasologa o tausaga, o le ita, afai e le taofiofia, e mafai ona avea ma lepetiaga tele i faaipoipoga ma sootaga faaleaiga. O le agasala o le ita (tagai Joseph Smith Translation, Efeso 4:26) e le gata ina faataumaoia ai sootaga ae e ‘aati ai foi le amio.
Ou te le manatua se itu lelei e faaalia ai le ita, e ui lava e mafai ona tauamiotonuina le inoino amiotonu ma le faasa’oina o mea sese. O loo ta’u mai i tusitusiga paia o le ita lē pulea e leaga ma e faataumaoi i taimi uma. O se tasi lea o meafaigaluega autu a Satani e faatama’ia ai faaipoipoga ma sootaga faaleaiga.
O loo ta’ua e le Alii ia Satani “o le tamā lea o finauga, ua ia faaosoina foi loto o tagata e fefinauai ma le ita” (3 Nifae 11:29). Na tautino atu e le Faaola ia Sa Nifae, “Faauta, e le o la’u mataupu lea, e faaosoina loto o tagata i le feitagai; a o lamataupu lenei, ia mavae atu lava mea faapena” (3 Nifae 11:30; ua faatusilima mea e faamamafa).
Suia le Ita i le Faamalosiauga
O se tasi o galuega faatino a le vasega na ou tuuina atu i a’u tamaiti aoga, o le tusia lea o se pepa e uiga i le talaaga o lo latou aiga. Na patino lava ona ou faatonuina i latou e faamatala mai malosiaga o o latou matua, o vaivaiga, ma faaipoipoga. Atonu o le elemene le lelei o le olaga faaleaiga na mafuli i ai tusiga a tamaiti, o le lotoita o le tamā, e ui lava e le o faapito tasi na o tamā. Tusa lava foi pe malolosi tamā i valaauga o le Ekalesia, faitau faatasi ma le aiga tusitusiga paia, ma auauna atu mo isi, e i ai lava nisi o loo tauivi ma le pulea o le ita.
E moni e vaai le fanau i tamā (ma tina) o ni tagata e sili atu ona faigata ona e tatau lava i matua ona aoai le fanau, ma e toalaiti lava ni tamaiti laiti, i lena taimi, e faafetai atu i o latou matua mo le aoaiga. Ae o tamaiti aoga o le tupulaga ua i ai i kolisi, ua sili atu ona tutoatasi ma ua toe tepa i tua i o latou olaga i le aiga ma iloiloina mea lelei ma mea leaga. O le toatele lava e toe faapea mai, maimau pe ana malosi atu le faasāsā a o latou matua ia i latou! Ae peitai, e toatele o loo tauaveina ni mailaila mai ni mea na tutupu a o laiti.
Sa manatua e se tasi tamaitai talavou faapea e masani ona e’ē lona tama, faamata’u ma sasa faamo’amo’a lana fanau. Afai e fai e se tamaitiiti se mea sese i le aso, ona lalafi uma ai lea o i latou pe a oo ina manava mai lo latou tama mai le galuega.
E eseese ma le faiga na faia e le tamā o Peresitene Gordon B. Hinckley: “Ou te faafetai e faavavau mo se tama sa ia le faaoolima lava i lana fanau pe a ita,” o le saunoaga lea a Peresitene Hinckley. “Tasi o le mea, sa ia te ia se taleni matagofie e faailoa atu ai ia i latou le mea ua faamoemoeina mai ia i latou ma tuuina atu ai ia i latou le faamalosiauga e ausia ai.”1
I se saunoaga e uiga i le aafiaga tumau o tamā mo a latou fanau, na faaopoopo mai ai Peresitene Hinckley: “Ua uunaia au faapea e fanauina e tama saua atalii saua. Ou te talitonu o le tele o faasalaga e faia i auala faapena, e tele atu le leaga e tupu mai ai nai lo le lelei. E le manaomia e fanau le sasa. Latou te manaomia le alofa ma faamalosiauga. Latou te manaomia ni tamā latou te tepa taulai i ai ma le faaaloalo ae le o le fefefe. E ui i na mea uma lava, latou te manaomia faataitaiga lelei.”2
E faatatau i tamā o ē ua faataatia ese le amio pulea ae saua pe a oso lo latou ita, ua lapatai mai ai Peresitene Hinckley: “E leai se alii ua i ai le amio leaga ma le mataga faapena e agavaa mo le perisitua a le Atua. E leai se alii ua faapea lana amio e agavaa mo avanoa o le maota o le Alii. Ou te faanoanoa ua i ai nisi o alii ua le agavaa mo le alofa o o latou taitoalua ma fanau. Ua i ai fanau ua fefefe i o latou tama, ma avā foi ua matatau ia latou tane.”3
Ua valaau atu Peresitene Hinckley i na ituaiga o tamā ina ia salamo. “Ia pulea oe lava. Ia pulea lou ita,” o lana saunoaga lea. “O le tele o mea e oso ai lou ita e faatauvaa lava. Ae ua matautia lava le iuga o lou ita. Ole atu i le Alii e faamagalo oe. Ole atu i le lau avā e faamagalo mai oe. Faatoese atu i lau fanau.”4
O Le Mana o se Faataitaiga Amiotonu
Manatu ane nei la’ia i le ituaiga o amio faatamalii na musuia ai se tasi alii talavou e tusia mea nei e uiga i lona tama:
“Ou te le’i faalogo lava i lo’u tama o fai upu masoa. Ia te au, o se punavai maoae lea o le malosi aua o lo’u tama o la’u faataitaiga ola aupito sili lea o le auala e ola ai i se olaga lelei o le Au Paia o Aso e Gata Ai. O le i ai o se faataitaiga lelei faapena e mulimuli ai, e matua faigofie ai ona faia faaiuga laiti uma o le olaga. A ou iloaina ua ou faia mea sa ou vaai o fai e lo’u tama, e atili tele ai lo’u faafetai mo se tama amiotonu o lē sa soifua i le talalelei a Iesu Keriso i aso uma taitasi. O le a le uma lo’u nofo aitalafu i lo’u tama, ona o le faaali mai ia te au o le ala e finagalo Keriso e ola ai.”
E matua tele naua le uunaiga a tama i a latou fanau. Amuia lava se atalii po o se afafine e i ai se tama e popole, aoao atu, aoa’i ma le alofa, ma uunaia lana fanau ina ia avea ma tagata sili atu, o ni tane po o ni avā sili atu, tama ma ni tina sili atu. O le lotoita e le tupu mai ai ni lagona o le alofa ma le talitonuina i loto o i latou e te ita i ai. Nai lo lena, e faatupu ai le lototiga ma le manatua o se olaga le manaia a o tamaitiiti, lea e tele ina faasosolo atu i le isi augatupulaga.
Taulimaina o le Lotoita
E faapefea la ona aoaoina e se tasi o loo tauivi ma le ita ia le loto pulea? O le a taumafai le lalolagi e fesoasoani i tagata ina ia faatoilalo lo latou lotoita e ala i le faatuina o se ituaiga polokalama e fetuunai ai le amio, lea e ono alu ai le fia tausaga ae na o ni nai taunuuga papa’u e fua mai ai. Peitai, ua ta’u mai e le Alii ma perofeta ia te i tatou, ua uma ona tatou iloa le auala e taulima ai le ita. O le faafitauli o le ita, e afua mai i le le malamalama ma le le faaaogaina o aoaoga faavae o le talalelei. Na saunoa Peresitene Boyd K. Packer, Sui Peresitene o le Korama a Aposetolo e Toasefululua: “O mataupu autu moni, ua malamalama i ai, e suia ai uiga ma amioga. O le suesueina o mataupu autu o le talalelei o le a vave ona faaleleia ai le amio nai lo se suesuega o le amio lea o le a faaleleia ai le amio.”5
O le aoaoga faavae o le salamo e patino lava ona faatatau i le agasala o le ita; e mafai ona maua mai ai le mana faamalolo o le Togiola i o tatou olaga. Na saunoa Elder Jeffrey R. Holland o le Korama a Aposetolo e Toasefululua: “E mafai ona e suia soo se mea lava e te manao e sui ma e mafai foi ona e faia vave. O se tasi lena o talapepelo faa-Satani—faapea e autausagā ma faavavau ona salamo lea. E tutusa lava le umi e salamo ai ma le umi o lou faapea atu ‘O le a ou sui’—ma le loto moni i ai. O le mea moni o le a i ai faafitauli i le faatinoina ma faaleleiga e faia. E sili ai lou faaaluina—ioe e tatau lava ona e faaaluina—aso o totoe o lou soifua e faamaonia ai lou salamo e ala i le tumau ai. Peitai, e mafai ona e vave maua le suiga, tuputupu a’e, faafouga, ma le salamo e faapei foi ona maua e Alema ma Atalii o Mosaea.”6
I le saunoa ai e uiga i le pulea o le ita, na aoao mai ai e Peresitene Hinckley: “O ai na te iloa manu’a ua faia, o lo latou loloto ma le tiga, e upu malolosi ma le saua e tautalagia i le ita? Ua mataga lava se alii ua malosi i le tele o mea, ae vave ita lava pe a tupu mai sina mea laitiiti, e faatauvaa lava, ma oso ai lona faali’i. E i ai i ulugalii uma feeseeseaiga i lea taimi ma lea taimi. A e ua matua leai lava se tauamiotonuina o se ita e oso vave i mea laiti… .
“O le ita malosi o se mea inosia, ma aati. Ma o le mea e sili ona leaga ai, e leai se mea lelei e maua ai; na o le faateleina ai o le leaga i le feitaga’i ma le faatuiese ma le tiga. I soo se alii po o soo se tama tane o faafofoga mai i lo’u leo, ua faigata ia i latou ona pulea o latou laulaufaiva [sei tulou], ou te fautua atu ia outou aioi atu i le Alii mo le malosi tou te faatoilalo ai lenei vaivaiga, ma faatoese atu i e ua outou faatausuai i ai, ma faaaoga le malosi atoa ua ia te outou e pulea ai o outou laulaufaiva.”7
O loo mataituina e tupulaga talavou faataitaiga a matua, ma e matua aafia tele ai. Ina tatou tula’i mai ia ma avea o ni alii ma tamaitai o le Atua, ma puleaina o tatou loto ina ia tauluuluola le filemu ma le alofa i totonu o o tatou aiga. O le vaega aupito taua o le avea ma matua, o se alii ma se tamaitai ia lelei la la’ua ulugalii, ma faia se faataitaiga lelei o le alofa ma le onosai mo a la’ua fanau. O le taulimaina o le lotoita, o le a maua ai se faasiliga mama i le taimi nei ma tausaga oi luma, a o faavaeina e fanau o latou lava aiga ma auaiga.