O Mai e Faalogo i le Siufofoga o se Perofeta
Fai Lou Tiute
I le limasefulu tausaga talu ai sa ou faalogo ai ia William J. Critchlow Jr., a o avea lena ma peresitene o le Siteki a Ogden i Saute, o toe faamatalaina se tala e faatatau i le faatuatuaina, faamamaluina, ma le tiute.
“Sa tutu le [taulealea] o Rupert i autafa o le auala ma matamata i se aofaiga toatele e le masani ai o tagata o faatelelise ane. Ina ua mavae se taimi sa ia iloaina atu sana uo. “O fea a outou faanatinati uma i ai?“ sa ia fesili atu ai.
“Sa mapuea le uo… . ‘Ua leiloa le maa taua a le Tupu! … O loo sailia e tagata uma, aua ua ofoina mai e le Tupu se taui … i le tagata na te mauaina. Sau, e tatau ona ta faavave.’
“ ‘Ae le mafai ona ou alu e aunoa ma lo’u fesili ia Tinamatua,’ o le tali le mautonu atu lea a Rupert.
“ ‘E le mafai la ona ou faatali, ou te manao e sue le maa taua,’ o le tali lea a lana uo.
“Sa faataalise atu Rupert i le fale o loo i le faatausiusiuga o le vaomatua e saili le faatagaga a lona tinamatua… .
“Ae sa lulu le ulu o lona tinamatua. ‘O a mea a mamoe o le a fai?’ sa ia fesili atu ai. ‘E le o fifilemu i totonu o le pa, o loo faatalitali le taimi e ave ai i le vao, ma faamolemole aua ne’i galo ona ave e faafeinu pe a susulu maualuga mai le la i le vanimonimo.’
“Sa ave ma le faanoanoa tele e Rupert ia mamoe i le vao, ma o le aoauli sa ia taitaiina atu ai i latou i le alia o loo i le togavao. O iina sa ia nofo ai i luga o se maa telē i autafa o le vai. ‘Ana mafai ona ou maua lava sina avanoa ou te sailia ai le maa taua a le Tupu,’ sa ia mafaufau ai. Sa punou ifo lona ulu ma faatausisila atu i lalo i le taele o le alia, ae faafuasei ona ia sioa i totonu o le vai. O le a le la mea? E le mafai! Sa ia oso i totonu o le vai… . ‘O le maa taua a le Tupu!’ sa ia alaga ai.
“Faatasi ai ma ona mata ua susulu, sa tamoe atu loa ia Rupert i le faleoo o lona tinamatua e ta’u atu i ai le mea maoae ua ia mauaina. ‘Ia manuia oe, la’u tama,’ sa ia fai atu ai, ‘ae semanu e te le mauaina lava pe ana e le faia lou tiute, o le vaaia lea o mamoe.’ Ma na iloa e Rupert e sa’o lelei lava.”1
O le lesona e aoaoina mai i lenei tala o loo maua i se fuaitau e masani ai: “Fai [lou] tiute; o le mea sili lena; Tuu atu [i le] Alii le vaega o totoe.”2
Ia tatou aoaoina o tatou tiute. Ia tatou agavaa pea e faatino na tiute ma, i le faia ai faapea, o le a mulimuli ai i tulagaaao o le Matai. Ina ua oo mai ia te Ia le valaau o le tiute, sa Ia tali atu, “Lo’u Tama e, ia faia lou finagalo, ma ia ia te oe pea le mamalu e faavavau” (Mose 4:2). Talosia ia faapea ona tatou fai.
Mai se lauga i le konafesi aoao o Oketopa 2006.