Ua Feiloa’i Elder Oaks i Tagata Lotu i Initia, Pakisitana ma Taialani
Sa faaaluina e Elder Dallin H. Oaks o le Korama a Aposetolo e Toasefululua se taimi e asia ai tagata lotu i Initia, Pakisitana ma Taialani ia Aokuso 17–26, 2007. Sa malaga faatasi o ia ma Elder Donald L. Hallstrom o le Au Fitugafulu, Fesoasoani Muamua i le Au Peresitene o le Eria i Asia, ma o la faletua.
I New Delhi, le laumua o Initia, sa aoao atu ai e le aumalaga le 347 tagata lotu mai paranesi e tolu, o le 54 pasene o le 641 tagata o le ekalesia i lea aai i matu.
E lata i le 7,000 tagata o le ekalesia e nonofo i lea vaega o le atunuu e tele i Hindu ma Musalemi. O le toatele e nofoia le itu i saute i itumalo e lua, e aofia ai Bangalore, lea o loo i ai le nofoaga tutotonu o le Misiona i Bangalore. E toaitiiti tagata lotu i New Delhi, e pei o Delhi, ma foliga masani o ala pumoomoo ma povi e taaloa.
“I la’u asiasiga talu ai i Initia,” na saunoa ai Elder Oaks, “sa na o ni nai selau o tagata lotu i le atunuu atoa. O le taimi nei, ua faagaeetia lava au i le faatupulaia o o tatou tagata, faapea lo latou malolosi i le talalelei.
“E ui ina ausage o tatou tagata lotu; ae tumu i le faatuatua. I lau asiasiga i New Delhi i le 1989, sa na o le tasi le paranesi sa feagai ma faigata ona sa na o le toatasi le faifeautalai na i ai ua mae’a lana misiona. O le taimi nei, ua tolu paranesi ma le toatele ua maea misiona, e aofia ai le peresitene o le itu e 34 tausaga, o Praveen Beesa. O ia ma lona faletua ma le toatele o isi tagata lotu, ua maea ona faamauina ma o latou aiga i le Malumalu i Hong Kong [Saina]”.
E ui ina latou fetaia’i ma luitau, o tagata o le Ekalesia i Initia, pei lava o le tele o Kerisiano, ua faataga ia faia a latou lava tapuaiga. “O se mea taua ia i latou o latou faamauga i le malumalu,” na saunoa ai Elder Oaks, i le matauina lea, e 93 pasene o le 344 tagata lotu ua maea ona faia o latou faaeega paia, o loo umia i le taimi nei pepa faataga mo le malumalu.
O Elder Oaks ma lona faletua o Kristen, faatasi ma Elder Hallstrom ma lona faletua o Diane, na feiloai atu i ni aiga se tolu i o latou fale. Ua iloga le aiga o John ona e toafa o la alo tama na faataunuuina manuia a latou misiona. Na toe taua e tagata o le aiga lagona o le faagaeetia a’o auai i se sauniga i le lua tausaga ua tuanai, lea na saunoa ai Peresitene Gordon B. Hinckley i New Delhi.
“O tagata Initia e aulelei ma malolosi”, na saunoa ai Elder Oaks. “E fiafia i le uunai o se malo faatemokalasi ma olaola le tamaoaiga. E maoae so latou lumanai faamanuiaina i le saofaiga a malo o le lalolagi.”
Mai Initia, na faaauau le faigamalaga a Elder ma Sister Oaks, ma Elder ma Sister Hallstrom i Pakisitana e feiloai ma tagata lotu iina. Na latou asia le tele o aiga lotu e aofia ai se aiga e toalima, faatoa fa masina talu ona papatiso. Sa latou faia foi se faeasaite i se aso o le vaiaso, lea sa auai le 475 tagata.
E na o tagatanuu Pakisitana o loo galulue faafaifeautalai i lea malo e pulea faaperesitene Isilami, e tusa ma le 170 miliona tagata, o se fuainumera o loo aofia ai le 3 miliona tagata Kerisiano. “E le faigofie le avea ma se Kerisiano i Pakisitana”, na saunoa ai Elder Oaks. O le tele o Kerisiano e nonofo faatasi i kolone.
Mai Pakisitana, na faaauau atu ai le faigamalaga a Elder ma Sister Oaks, ma Elder ma Sister Hallstrom i Taialani, mo se konafesi faale-itu. O le toatele o le latalata i le 15,000 tagata lotu i Taialani e nonofo i le itu i saute. O le itumalo o Chiang Mai i le itu i matu o Taialani, e i ai le 875 tagata lotu.
O Taialani o se atunuu e olaola le tamaoaiga, tusa ma le 95 pasene o ona tagatanuu o tagata Puta [Buddhists], e ui lava ina e saoloto isi i tulaga tau tapuaiga.
I tagata lotu i Initia, Pakisitana ma Taialani i matu, na faamamafaina i ai e Elder Oaks ma Elder Hallstrom pogai faavae o le talalelei e pei, o se molimau i le Faaola, faamalolosia o aiga, o aia a le perisitua ma sauniga faalemalumalu, ma le manaomia o le vaai toto’a i le aoaoina o le autalavou ia avea ma ni taitai i le lumanai.
I le latou faigamalaga, sa tufatufa atu ai e Sister Oaks le silia ma le 1,000 “Totigilima Molimau,” mo taitai o le Ekalesia e faaaoga i le aoaoina o tamaiti i le Peraimeri. O Totigilima Molimau, o ni mea faitino mo le aoao atu. I tamatamailima taitasi o loo i ai se ata e faailoa mai ai se elemene o le molimau. O isi mea sa tufatufa atu e faaPeretania, Hindi, Thai, ma le Urdu.
Sii mai i le Church News, 22 Setema 2007.