Mauaina o se Molimau
Sa ou ola ae i se aiga lelei tele ae e le toaaga i le lotu. E le masani ona ou faalogo o tuuina mai ni molimau i le moni o le talalelei i totonu o lo matou fale. O lea la, e ui lava ina sa ou ola a’e i le Aai o Sate Leki, Iuta, i se siosiomaga e malosi ai le Au Paia o Aso e Gata Ai, ae ou te le’i ola a’e i se aiga masani o le Au Paia o Aso e Gata Ai. Sa lei faia ni matou afiafi faaleaiga pe faapotopoto foi e tatalo faaleaiga. O le tele o tu masani a le Ekalesia e masani ai a’u uo, e fai lava si fou ia te au.
Talu ai lenei siosiomaga faaleaiga, atonu o au o se tagata mulimuli e ono tu atu ma fai atu se molimau i luma o se potopotoga tele o le Seminare. O a’u foi o se talavou matamuli e 15 tausaga, ma sa fai si o’u ofo ina ua ou tu atu i se faaleotele leo i luma o tamaiti e 300 o le Seminare. Ae sa ou mafanafana ona o le mea sa ou lagonaina i le taele o lo’u loto. E oo mai lava i le asō, o loo ou manatuaina pea le uunaiga lofituina a le Agaga ou te tu ma tuuina atu la’u molimau i lena sauniga a le seminare.
Ou te le manatuaina upu tonu sa ou tautala ai, ae o le a le galo lava ia te au le mu o lo’u loto, o le molimau tino sa ou mauaina e moni le Ekalesia. Ou te manatuaina lelei le lagona o le Agaga o le Agaga Paia sa faaifoifo ane i o’u luga a o tuuina atu la’u molimau i le moni o lenei Ekalesia.
Sa Ou Iloa
A o lei oo mai i lena aso, sa ou talitonu e moni le Ekalesia. Sa ou fiafia i le Ekalesia. Sa ou manatu e lelei, ma sa ou auai. Peitai, i lena taimi taua o lo’u olaga, sa ou iloa e moni le Ekalesia. Sa le mafai ona ou faafitia, ma e leai se tasi e mafai ona aveesea lena molimau mai ia te au.
Talu mai lena aso i le Seminare, ua faafiaafe ona ou tuuina atu la’u molimau. Ou te manatua nisi o na taimi, ae leai lava se taimi na matua ofoofogia mo a’u pe sa matua ta’a’ina ai le faatulagaina o lo’u lumanai e pei o lena uluai taimi a o ou talavou. O se tasi o mafuaaga na faia ai e lena mea se uunaiga tumau mo au, ona sa tutusa lo’u matua ma le Perofeta o Iosefa Samita ina ua ia vaai i le Tama Faalelagi ma Lona Alo, o Iesu Keriso, ma iloa ai o le a avea o ia ma meafaigaluega e toefuatai mai ai le Ekalesia moni i le lalolagi.
O le aafiaga o le tuuina atu o la’u molimau ma le mauaina o se molimau moni, o se taimi lea na ou faia ai faaiuga taua i le tele o itu i lo’u olaga. A oo mai faatonuga mai le Alii ia te oe, o se mea silisili lea o le a e aoaoina. Ona o lenei molimau, sa ou manao ou te auauna atu, ia avea ma se tama a’oga lelei, ma atiina ae tomai faalevafealoai ma le patino. Sa matua faateleina lo’u manao e aoao atili i tusitusiga paia. Sa tele atu o’u faamoemoega i le olaga. Sa ou iloaina a ou tausisia lo’u agavaa, o le a faatagaina au e folafola atu le talalelei.
Sa ou iloaina foi sa silafia e le Atua lo’u tagata. O se tasi lena o mea taua lava sa ou ofo ai ma suia ai au. O a’u o Lona atalii! O le taimi lava e te iloa ai po o ai oe, ua e manao ia lelei atili. E oo mai ai se mana o le iloa—o se mana e na o musumusuga a lo tatou Tama Faalelagi e maua mai ai.
Pe a ou toe vaavaai atu i lena aafiaga, ou te talitonu sa finagalo le Tama Faalelagi e aumai ia te au se avanoa e atiina ae ai ni nai uiga ma tomai ina ia faigofie teisi ai ona Ia galue faatasi ma au. Ou te manatu sa finagalo foi o Ia ia ou mafaufau e auauna atu i se misiona, o se mea e lei faamalosia i lo’u aiga. A o ou talavou, ou te lei mafaufau tele i se misiona. Peitai o le aafiaga i la’u molimau, sa ou iloa ai mo le uluai taimi sa ou manao e auauna atu i se misiona. O isi o’u aafiaga na faamalosia ai lena manao, peitai o le taimi muamua lena na ou iloa ai ou te fia alu. Sa ou iloaina sa finagalo lo’u Tama i le Lagi ia te au e faamisiona talai e faasoa atu i Ana fanau mea ua ou iloaina nei.
Tatala Lou Loto
O le mauaina o se molimau e pei lava o le mea na oo i ai sa Nifae ina ua afio mai le Faaola e asiasi ia i latou. Muamua, latou te lei malamalama i le siufofoga o le Atua aua sa na o o latou taliga sa faalogologo ai. Peitai, ina ua tatala o latou loto, sa latou malamalama ai loa i Lona siufofoga.
“Ua atu tolu foi ona latou lagona le leo, ma ua uai atu o latou taliga e faalogologo i ai, ma ua faasaga atu o latou mata i le mea na sau ai le leo; ma ua latou tulimata’i ae i le lagi, i le mea na sau ai le leo.
“Faauta foi, o le atu tolu ua malamalama ai ia te i latou le leo na latou faalogoina” (3 Nifae 11:5–6).
O le tatala atu o lou loto i musumusuga a lo tatou Tama i le Lagi o se elemene taua tele i le olaga. O le a e manaomia lava Ana musumusuga.
E te feagai ma ni luitau tulaga ese, ma o le auala e faatoilalo ai nei luitau o le faataga lea o le Agaga Paia e tō ifo i ou luga. Faataga o Ia e taiala oe. E oo mai le malosi mai lo tatou Tama Faalelagi i fesootaiga faaleagaga ma lagona o le loto. Ma o le malosi o le Alii e mafai ai ona tatou agai i luma. O le a saunia e le Alii lena malosi i a tatou molimau patino.
Olioli i le Avea ai o se Talavou
O le faamalosia o lau molimau o le a fesoasoani e te olioli ai i tausaga o lou talavou, lea e mafai ona avea ma taimi aupito sagisagi o lou olaga. E le faaitiitia ai le taua o le faia o se misiona po o le faaipoipo i le malumalu po o se isi lava aafiaga matagofie o le a e oo i ai i lou olaga mulimuli ane, ae ou te fautuaina oe ina ia e olioli i le avea ai ma se talavou. E faapefea la ona e faia lena mea? E ala i le tausia o poloaiga uma a le Alii; e le mafai ona e filifili po o le fea e tausi ae o le fea e le tausia! Ua tuuina mai poloaiga taitasi mo se faamoemoega poto—ia faasaogalemuina ai oe.
O se vaega o le savali a le Au Peresitene Sili i le Mo Le Malosi o le Autalavou e faitauina:
“E finagalo lo outou Tama Faalelagi ina ia olioli o outou olaga ma ia toe taitaiina atu outou i Lona afioaga. O faaiuga tou te faia i le taimi nei, o le a fuafua ai le tele o mea o le a mulimuli mai i o outou olaga faapea foi ma le faavavau.
“Ona e alofa le Alii ia te oe, o lea ua Ia tuuina atu ai ia te oe poloaiga ma afioga tulei a perofeta e taialaina ai oe i lau faigamalaga.”1
Ua saunoa mai Peresitene Gordon B. Hinckley, lo tatou perofeta ma le peresitene: “Ia avea i tatou o ni tagata fiafia. O le fuafuaga a le Alii o se fuafuaga o le fiafia.“2 Ia tatou mulimuli i le Perofeta, ma ia fiafia o tatou olaga. O le taimi lenei o le sagisagi fiafia o outou olaga—e tatau ona malie. E mafai e gaoioiga a le Ekalesia ona fesoasoani tou te olioli moni ai lava i lo outou talavou.
Ia maua le lototoa e mulimuli ai i mea ua e lagonaina i lou loto. Taofi mau i na lagona ma faalauteleina. E taua lou fausia o se molimau ma i ai le faatuatua o Iesu Keriso o lou Faaola ma lou Togiola. E taua lou malamalama o Ia, na togiolaina oe, ona o le alofa mama atoatoa.
Faatasi ai ma lena malamalama, ua ia te outou le avanoa matagofie e tuufaatasi ai lou faatuatua ia Iesu Keriso ma le salamo, ina ia mautinoa ai o aoga a outou feagaiga. Ona mafai lea ona outou maua le taitaiga ma le taiala mai se tasi o le Aigaatua, o le Agaga Paia lea. Oka se meaalofa! O lena meaalofa sili e maua mai ona o le faatuatua i le Alii o Iesu Keriso, ma olioli ai i fua o le salamo.
A o ou talavou, sa ou mauaina se isi meaalofa: o se molimau ola, tuputupu ae, o se tautinoga i le talalelei a Iesu Keriso. A o ou faafaileleina lena molimau, sa faaauau pea ona tupu. Sa amata ona ou malamalama i le mamanu a le Alii—Lana fuafuaga e toe taitai atu au i lo’u Tama i le Lagi. “O mea mai le Atua o le malamalama lava ia, o le talia foi le malamalama, ma tumau pea i le Atua, e faateleina atu ai le malamalama; ma e tuputupu pea le pupula o lea malamalama seia oo mai le aso atoatoa ona lelei” (MFF 50:24).
Ou te tuuina atu la’u molimau paia o le Atua o lo tatou Tama ma Lona Alo, o Iesu Keriso, o le Faaola o tagata uma. E mafai foi ona e maua lena molimau. E mafai foi ona e maua lena tautinoga. E mafai ona e maua nei a o e talavou, e faapei foi o au. E te le tau faatali.