Sa Valaauina Pea e Auauna Atu
E ui lava sa aloaia le faatagaina o a’u e le avea se misiona talai, ae sa mafai lava ona ou auauna atu i se auala ‘anoa.
A o ou tamaitiiti ma avea ma se alii talavou, sa ou sauniuni e auauna atu i se misiona talai mo le Ekalesia. E pei ona sa fautuaina ai i tatou e Elder David A. Bednar o le Korama a Aposetolo e Toasefululua, sa ou manao e avea ma se faifeautalai, e le na ona alu i se misiona.1 Ae ona o o’u luitau faale-soifua maloloina, o lea na ta’u mai ai e le Matagaluega o Faifeautalai, e le o se naunauga sili mo au le feagai ma le mamafatu o se misiona talai. E ui lava ina sa mata e faigofie ona ou le fiafia, ae sa ou saunia lava e auauna atu i lo’u Faaola, ma sa ou saunia e talia Lona finagalo mo au.
O Lo’u Avanoa
O le mea sa tupu ia te au e ta’u o le faatagaina faamamaluina. O lona uiga, sa silafia e taitai o le Ekalesia lo’u agavaa ma lo’u naunau e auauna atu ae sa fautuaina au e auauna atu i isi auala. E faapei foi o le toatele o isi tagata o ē le mafai ona auauna atu i ni misiona talai, sa ou lagona le uunaia o a’u e fai nisi mea e sili atu nai lo le na o le “faagasolo pea o lo’u olaga.” Sa ou manao e auauna atu, ma sa ou faia—o se faifeau faamisiona fesoasoani a le Ekalesia i le lotoifale. O le fesoasoani mai o lo’u epikopo ma le peresitene o le siteki, sa ou maua ai se auala e auauna atu ai i le Alii a’o ou nofo ai i lo’u aiga.
Sa i ai se tulaga manaomia i le Matagaluega o Otiovisio a le Ekalesia, ma talu ai ou te nofo latalata i le Fale o Ofisa o le Ekalesia i le Aai o Sate Leki, o lea sa mafai ai ona ou fesoasoani. Sa tuuina mai e lo’u peresitene o le siteki se valaauga, vaetofia au, ma faia ni tulafono faapitoa mo au i le taimi o la’u auaunaga. E ui ina sa foliga mai ia te au e uluā tulafono, ae sa ou aoao ai sa faamanuiaina au ina ua ou mulimuli ai. E ui atonu e ese tulafono a isi faifeau faamisiona fesoasoani e ese foi peresitene o siteki, a o tulafono nei sa ou mulimulita’ia:
-
Tausisi i se faasologa o mea e fai i aso taitasi: ala i le 6:30 i le taeao, suesue i tusitusiga paia ma le Talai La’u Talalelei mo le lua itula i aso taitasi; fai faamalositino mo le 30 minute i aso taitasi; moe i le 10:30 i le po.
-
Mulimuli i le tulafono a le Ekalesia i le faiga o laei.
-
Na o musika faaleaoaoga po o musika faale-Ekalesia e faalogologo ai.
-
Faatapulaa le faaaogaina o le komepiuta na o le imeli; faatapulaa le matamata i le televise; leai ni taaloga vitio.
-
Tau lava o gaoioiga i vaega e auai—leai ni evaga faamasani.
-
Ia faia faatalanoaga faalemasina ma le epikopo.
O nisi taimi pe a ou i ai i se vaega pumoomoo i lalo o se fale i le vevela e 100-tikeri (38ºC) e toso ai uaea i le aso atoa, ou te mafaufau lava pe o le a le faiā i le faataunuuina o le tino ola pea ma le ola e faavavau o le tagata (tagai Mose 1:39). Pe o a’u moni ea o se vaega o le ‘au i le faasoaina atu o le talalelei i le lalolagi atoa? Na ou iloaina o loo fai mai le Mosaea 2:17 a’o tatou auauna atu i tagata, o lo tatou i ai lava lena i le galuega a le Atua, ae sa fai si umi faatoa ou talitonu ai e moni lava.
Sa ou aoaoina e faapei lava o se misiona talai, o le misiona fesoasoani e le faatatau ia te oe. E faatatau i le aoao e faia mea e finagalo le Alii e fai. I le taimi o la’u auaunaga, sa ou fesoasoani ai e faatulaga moli ma tuu i lalo, faatulaga masini e faaaoga mo le leo o fonotaga po o sauniga, ma masini mo fela’uaiga. O se galuega faigata, ma le palapala, ma ou te le faatauagavale lava i konafesi aoao. O le mea moni, i le taimi nei pe a ou matamata i soo se faasalalauga, e ōi lo’u tino atoa aua ua ou iloa le tele o le galuega e aofia ai.
E Faatatau i le Galue
I le taimi o la’u misiona fesoasoani i le Ekalesia, sa ou aoaoina ai le taua o le tausisia o le taimi, tiutetauave, fai sa’o le galuega, ma tuuina atu la’u taumafaiga sili. A o taumafai o’u matua e aoao mai ia te au nei mea, sa ou le malamalama seia iu ina ou vaaia, e mafai e le faama’imau taimi ma taumafaiga ona aafia tonu ai galuega a isi. A o loma la’u misiona, sa faigofie ona taulai atu i le na ona fiafia. Ae o le taimi lava ua e i ai i lau misiona, e te iloa ai o le a le malie le avea ma soa e le iloa pe faapefea ona galue. O se vaega o le sauniuni e auauna atu, o le aoao lea e galue.
O A Isi Mea Sa Ou Aoaoina
Sa ou aoaoina foi e talisapaia i latou o loo galulue i tua atu, e le o iloa atu e le lautele. Sa ou vaaia le galulue malosi o taitai o le Ekalesia e aunoa ma le gauai ifo ia i latou lava pe faamoemoe foi i ni faiga faapitoa. Sa ou vaaia isi o galulue i luitau sili atu nai lo le mea sa ou i ai, sa aoao mai ai ia te au e mafai ona i ai lava se mea e auauna atu ai tagata uma lava.
Sa ou iloa ua faamanuiaina au i malosiaga ma tomai, ma o le galue malosi e mafai ai ona ou faia e sili atu nai lo le mea sa ou faia. Sa ou aoao ai a’o ou faaaloalo i isi tagata, ua atili ai foi ona ou fiafia ia te au lava. E faigofie ona masani i le mausa o le vaai maualalo i tagata ina ia taumafai ai e fiafia atili ia i tatou lava. Peitai o le faaaloalo e mo itu uma, ma o i latou foi o ē fai ma sui ia Iesu Keriso, e tatau ona tumu i le faaaloalo.
E ui i lea, o le lesona aupito taua sa ou aoaoina, o le a fesoasoani le Alii ia te oe e faia mea faigata. Sa faigata ona nofo i le fale, faigata ona faia o feau masani, faigata ona lē avea ma taula’iga o le vaaiga, faigata ona usitai i tulafono o le misiona, ma faigata ona faalogo o ta’u mai e tagata ia te au e le o se misiona “moni” la ou te faia. Peitai, sa fesoasoani le Alii ia te au. Ou te iloa o le a fesoasoani o Ia ia te oe e faia mea e manaomia ona e faia ina ia e fiafia, ia e maua le lagona lelei mo oe lava, ia tuputupu a’e, ma avea o se tagata e sili atu. Alu ifo i ou tulivae, punou lou ulu, ma ia e faamaoni oe lava a o e tatalo. Ona e sauni lea e auauna atu i soo se mea ma soo se taimi e valaauina ai oe.