Sa Ou Manaomia se Faamanuiaga
O Fepuari i le 2005 sa ou i ai i le vaega mulimuli o la’u aoga e avea ai ma se tagata taitai o le ami i togavao malulu o Alapama. Sa matou faaaluina le tele o ao ma po i le tau faaatoatoaina o fuafuaga laiti mo vaega o fitafita savavali i se taumalulu tele. O se tasi afiafi na matou timuia ai i ni timuga malulu ma le mamafa a o matou tauivi ma o matou uso a taitai e faatu la matou tolauapiga e momoe ai mo le po.
Sa ou lagona le pagatia. Na maluluina o’u lima ma o’u vae, ma o taimi uma lava na matuai tiga. Na ou susū pala mai le ulu e oo i tamaivae. Na gatete vaega uma o lo’u tino. O le mea na atili ai le leaga, na ou fefe ina ne’i o’u maua i le nimonia, lea na i ai ni nai taimi ua tuanai na ou maua ai.
Na oo mai i lo’u mafaufau le manatu e togi le solo, ae peitai, na iu ina ou manatua le faataitaiga a paionia i taavaletosolima o e e le’i fiu lava e ui i le tele o tulaga le lelei. Na ou filifili loa o le a ou faamaeaina a’u aoaoga. Ua tele se ositaulaga a i matou ma lo’u aiga o lea ou te le fiu ai i la’u sini e avea ma se taitai. Sa ou tatalo i le Tama Faalelagi mo le malosi ou te faaauau ai pea.
Ou te lei moe i lena po atoa, ma o le aso na sosoo ai na faateteleina ai le leaga o lo’u faafitauli. Na ou vaivai. O le tele o itula na koleni ai i le malulu na leai se mea na fesoasoani ai i o’u tiga ma lo’u tale. Na iloa e se tasi o faiaoga ia lo’u tulaga ma faatonuina a’u e faaalu ni itula se lua i totonu o le faleie mafanafana.
A o ou tutu i le palapala e leai ni ou seevae ma faatautau ou lavalava susū, sa ou moomoo lava mo se faamanuiaga o le perisitua. Na faafuasei ona matala mai pupuni o se tasi o faleie, ma savavali mai ai i totonu ni sui se toalua e koleni faaletaitai. Sa amata ona ma talanoa ma le isi o i laua o Scott Lundell. Na te’i ua oo le talanoaga i femalagaaiga faavaomalo. Na tau mai e Scott e lua tausaga sa ia faaaluina i Filipaina a o lei auai i le militeli. Na vave lava ona ta’u mai e le Agaga ia te au o Scott o se faifeautalai ua maea lana misiona.
“O a au mea na fai iina?” na ou fesili atu ai.
“Oi, o se mea a le lotu,” na tali mai ai.
“O oe o se tagata o le Ekalesia a Iesu Keriso o le Au Paia o Aso e Gata Ai?” o la’u fesili lea.
“Ioe, o lena,” na fai mai ai.
“E faapena foi a’u,” o lau faaopoopo atu lea.
A o ma lulu lima, na ou talosagaina Scott pe mafai ona ia faia so’u faamanuiaga. Sa ioe mai o ia e aunoa ma le faatuai, ma na ou tootuli i le palapala. Na ia tuuina mai se faamanuiaga, ma na faamaloloina ai lava au i le taimi lena! Na toe foi mai le malosi ia te au, ma na uma foi lo’u tale. Na te’a lo’u ma’i. Na ou faamaeaina a’u koleniga, ma e tasi le masina mulimuli ane ae avea ai au ma se taitai.
E moni lava e silafia e le Tama Faalelagi i tatou taitoatasi, ma i Lana lava ala, o le a faamanuiaina ai i tatou pe a tatou faaali atu le faatuatua ia te Ia. I o tatou taimi aupito faigata, o le a Ia tauaveina ai i tatou.
Na maliu Scott Lundell i Afakanisitana i le aso 25 o Novema, 2006. Ou te le’i iloaina lelei o ia, ae o lona maliu na ou mafatia tele ai. Na auina mai o ia e le Tama Faalelagi i se taimi aupito taua o lo’u olaga, ma o le a ou manatua pea lena faamanuiaga faapitoa na tuuina mai ia te au e se alii agavaa na umia le perisitua.