Taokita n te LDS A Anga Te Bwaintangira n te Taratara

E kabanea maiuna n ataei Blendina Muca ni ikakorakora ma waakin aorakina ae ataaki bwa te aoraki are e aki kona ni uaia n airiri iai maata, ke te bwao ni mata. Imwiin ririki aika bati n akea te tokanikai n te bwainaoraki i aon oin abana ae Albania, e a kunea buokana mairoun te tia bwainaoraki ae kaain America are e kawara abana ni mwanangana man te kamweeraoi.

“Ma ngke I uarereke ao e bwaoua matau,” e taekinna Ms. Muca. “E kanakoai tamau bwa N na kawara te taokita, are e anganaki te katimtim ao te kirati ni mata… . A bon aki kaeta matau—a rikirake riki ni bubuaka—ma I nanakonako ma te kantaninga bwa a na bon raoiroi.”

N aki ongea ana taratara ae memeere, man ana botumwaaka te kairake mai Albania aei e a riki bwa te tia itutu ae bane arona, te mwakuri are e bon rianako iai.

Ngke e kaaina te Ekaretia tarin Ms. Muca, e a uki te mataroa ibukin te kairake n ataeinaine ae e aki nakoraoi ana taratara. Mitinare ibukin te Mwakuri ni Kamweraoi n te Ekaretia, a roko n ana tai ni bwabetito tarina, ao a kaoa Ms. Muca bwa e na kawara te onaoraki ae mwanenaki man te LDS ma taan mwakuri iai aika taokitan te mata man te United States.

Dr. Rick Olson, taokitan te mata irouia ataei n te Reirei ae Rietata i Iowa, e karaoa te korokoro iaon matan Ms. Muca. Imwaain te korokoro, te aoraki ae kairake, tarina, ao raoraoia a katiteuanaaki n te tataro ma Dr. Olson.

“E bubutia te Atua te taokita bwa e na karaoi baina kanga koora bwa e na katoka aorakin matau,” e taekinna Ms. Muca, “ao E karaoia. I ataia bwa e a tia te Atua ni karaoa te kakai.”

Te bwaintangira ae te nooraaba—kaetan te taratara ae memeere, bwaai ni mwakuri aika bwaintangairaki, ao katauraoan boutokaan te mwakuri n tararua—e karaoaki nakon aaba aika rikirake rinanon ana mwane ni buoka te Church Humanitarian Services (Tabo ni Ibuobuoki ibukin te Kamweraoi n te Ekaretia).

Dr. George Pingree, taokitan te mata ae e a tia ni motirawa man te mwakuri i Salt Lake City, bon te tia babaire n ana buroukuraem ibukin te taratara n te aonaaba ao e tei ibukiia taokita aika e raka iaon 200 mwaitia ake a anganano ni kaainakin te buroukuraem.

“E raka iaon 40 te mirion aomata n te aonaaba aika a mataki,” e kabwarabwara Dr. Pingree, “angiia a riki mataia, rootakin ataein te mata, ke kangangan te taratara ake a kona ni kaetaki.”

Taan kairiiri n te Ekaretia ao mitinare n te kamweraoi a bairei bwaai aika kainnanoaki aika onoti ibukin aba aika rikirake, e kabwarabwara Dean Walker, te manatia buroukuraem aika kakaawaki n te Church Humanitarian Services.

“A karokoaki bubuti, ao imwiina ti a bairea aron te waaki ni kaitarai taina kainnano aikai,” e reitia n taekinna Tari Walker. “Ti kona ni karaoi inanon 1 te ririki 10 nakon 15 taian buroukuraem ni mwakuri—buroukuraem ni mwakuri ake e anga te reirei iaon waaki ao taian mwakuri nakoia taan tararua te mauri ibukin kanakoraoan te taratara ibukiia aomata aika bati.”

E noora riki kaokoron te maiu Ms. Muca imwiin ana korokoro ae nakoraoi. E kabwarabwara: “Te bwai ae I tangiria ngkai bon te nakon te reirei ae rietata ao ni buokiia naake a kainnanoa te ibuobuoki—ni buokia aomata n te aekaki ni kawai are e buokai iai te Atua. A bon riiriki kakai.”