Taeka Tabeua

Te Rongorongo Man Te Moan Beretitentii

E a tia te Riaona ni buokiia aomata aika mwaiti ni katamaroa maiuia. Te Rongorongo Man Te Moan Beretitentii e aki kona n tinanikuaki iroun temanna ae tangira te maiu ae raoiroi. Te Rongorongo Man Te Moan Beretitentii e a tia ni buokai ni baronga raoi maiu. E ngae ngke I aki kona ni kabooa katotoon te Riaona, taian boki ake I kona ni karekei ni wareki a buokai n riki bwa te aomata ae raoiroi riki.

Abraham Adaranijo, Canada

Reirei Teuana Imwiin te Reirei Teuana

Ngke I a tibwa bwabetitoaki ni kaaina te Ekaretia, I aki kona n ota raoi n te euangkerio, ma man warekan te Riaona, ao I a tia ni kona ni mataata n ana reirei teuana imwiin te reirei teuana. I bon kairaki irouia naake a tibwauai bwaai ake a tia n rinanoi ni maiuia. Kam rabwa ibukin boreetian karaki aika tamaroa ake a boutokai taian reirei ibukin te euangkerio.

Federico G. Balut Jr., Philippines

A Kanga Aomata ni Maiuakina Raoi te Euangkerio

Ai bon tamaroara ao ni kororaoira te kakabwaia ni karekean te Riaona inanon mweengara ao n taabo n tango boki, ike ti a kona ni warekia inanon mwaawara ao ara tai ibukin tamneira. I kakaitau n aron tamaroan taian karaki ibukin aroia aomata n te tabo teuana ke ia riki ni kona ni maiuakina raoi te euangkerio. Aio e bon katiteuanaira. E kaungaira bwa ti na aki maaku, ao e kamatoa nakoira bwa ti aki tiku n ti ngaira.

Elsie Castillo, Ecuador

Kaungaaki n Oki

Ngke te ataei ngai, I rikirake n aki-kakaonimaki nakon te Ekaretia, ma ngke ai tebwi tabun au ririki ao I a iangoia n oki. Imwain karaoan te babaire ae kakaawaki aei, I tataro ao ni karaua ni iangoia bwa tera nanon te oki nakon te Ekaretia ao taian katabeaki ake a na irekereke ma ngaia.

Anne are I a baireia ni wareki tabeua booki ake a maan ibukin te Riaona. I bon wareware ni kakaei taian karaki ake a na kaungaai ao ni kamatoa au iango n okira te ekaretia.

Ni wareki nako karaki ni kaineti ma aomata ake ti tebo aroia ma bwaai ake a riki naba nakoiu, I karekei boutoka ni kaunganano aika mwaiti. Angiin, taian karaki a tia ni buokai ni kamataata nakoiu bwa akea temanna ae kororaoi n te ekaretia ao bwa ngkana iai au kairua naba ao e kainnanoa karaoan te bwai teuana ae na kona ni kaetia.

I a tia ngkai n okira te ekaretia. I ataia bwa taian bootaki bon ti tebo ma aron naba ake ngkoa, ma ngkai iai riki tamaroan au taratara, iterana teuana bon man taian iango ake I kunei inanon te Riaona ni kaineti ma aron kakukurein taian kiraati ao te bootaki n toa.

Ni katoa tai ngkana I wareka te Riaona, I namakina te rau n nano ngkana I kunei kaekaan au titiraki.

María Pilar Santana, Dominican Republic

Ana Taetae Ara Burabeti ae Tangiraki

I kan kakaitau nakoim ibukin kakanakoan te Riaona maekatiin nakoiu n taainako. Ngkai ai bon 93 au ririki ni maiu. I a tia ni kakarekea te maekatiin man te tai are I moan bwabetitoaki ao ni kamatoaki iai ni karokoa te tai aei. E uarereke rimoa ma e kakaongora n taainako. I a rangi ni kukurei ni kanoan te maekatiin; ma e ngae n anne, e rangin ni bwaka nanou n ana taetae ara burabeti ae tangiraki. E bon kakukurei te ongora irouna uoua te tai n te ririki n tain te maungatabu ni kabuta.

Lydia Dominguez, USA