Rongorongo Ni Kakawari n Reirei

Riiki bwa Tabonibain te Atua ni Katauraoi ibukin Kauaokin Ara Uea

Tataro mwaaka n rinei ao ni wareki koroboki aika tabu man te rongorongo aei ao taian reirei ake a na kaaitarai kainnanoia aine ake ko kawaria. Tibwauai bwaai aika ko a tia n rinanoi ao am koaua. Kaoia naake ko reireinia bwa a na karaoa are ko a tia ni karaoia.

N na Kanga ni Katauraoi ibukin Kauaokin Iesu Kristo?

Inanon D&C 38:30: e taekinna te Uea bwa ngkana ti tauraoi ao ti na aki maaku.

Unimwaane Dallin H. Oaks man aia Kooram Abotoro ake Tengaun ma Uoman: “Aua bwaai aika aki kona ni kakeweaki irouia Aomata Aika Itiaki ni Boong Aika Kaitira: (1) E na oki te Tia Kamaiu nakon te aonaaba ma mwaakana ao te mimitong ae korakora n tautaeka n tain te ngaa n ririki ma te kororaoi ao te rau. (2) N Ana tai n roko ao e na iai te kamaunaki nakoia ake a buakaka ao maungautia ake a kororaoi. (3) Akea ae ata Ana tai n oki, ma (4) aomata aika kakaonimaki a reireinaki bwa a na kamatebwaia kanikinaeana ao n tauraoi i mwaaina… . Ti riai ni katauraoi n te maiun rabwata ao n te maiun tamnei ibukin bwaai aika a na riki n tain te Kauaoki” (“Te Katauraoi ibukin te Kauaoki,” Riaona, Meei, 2004, 7, 9).

Kathleen H. Hughes, te moan kauntira ngkoa n te Beretitentii ni Kabuta n te Bootaki n Aine: “‘Kam kawenea aan te mwakuri ae korakora. Ao man bwaai aika uarereke a reke bwaai aika korakora’ (D&C 64:[33]; e katuruturuaki)… . Te mwakuri ae korakora are ti kan karaoia e na waaki man ‘bwaai aika uarereke.’ Teuana man bwaai aika uarereke akekei, ae I a tia n ataia, bon karekean au tai ni kaoka korakoran maiun tamneiu ni katoa bong” (“Man Bwaai aika Uarereke,” Riaona, Nobembwa 2004, 109).

Unimwaane Robert D. Hales man Aia Kooram Abotoro ake Tenguan ma Uoman: “Te Uea e kaantaningaira bwa ti na kakaonimaki, n anga nanora, n ninikoria n aiaroia naake a tia ni maiu ao ni mate i mwaaira. A bon weteaki bwa a na anga maiuia ibukin te euangkerio. Ti bon weteaki bwa ti na maiuakina maiura ibukin te kaantaninga aei… . Aia tai burabeti ni kabane a tia ni katauraoa te kawai ibukin moan rokon te Uea ao Ana Mwakuri ni Kamaiu. Ai arona naba ma, rongorongon taai ake ngkoa ao taetae ni burabeti a tia ni kawenea aan te mwakuri ibukin Manga Kaokan te euangkerio rinanon te Burabeti Iotebwa Timiti. Iai matara n noori bwaai aika riki ao taetae ni burabeti n ara tai a katauraoira ibukin Kauaokin te Tia Kamaiu?” (“Katauraoi ibukin Manga Kaokan Bwaai ao te Kauaoki: ‘E na Toka Baiu Iaomi,’” Riaona, Nobembwa 2005, 91–92).

N na kanga n Riki bwa Tabonibain te Atua ni Buokia Tabeman ni Katauraoia?

D&C 34:6: E taku te Uea bwa ti na tabeki bwanara ao n takaruaea te rairannano, ni katauraoa te kawai ibukin kauaokin te Uea.

Beretitenti Spencer W. Kimball (1895–1985): “Te riki bwa te aine ae raoiroi n tain kabanean bwaai aika na riki n te aonaaba aio, imwaain kauaokin te Tia Kamaiu, bon te wewete ae rangi n rine. Korakoran ao mwaakan ana kairiiri te aine ae raoiroi ni boong aikai e kona ni kamwaitaki tebwina te tai mwaitina nakon tain te rau. Neiei e katukaki ikai bwa e na karikirakea, e na kamanoa, ao e na tautiana te mweenga—are bon oin ana bootaki ae rine te bootanaomata. Bootaki ake tabeua n te botanaomata a kona n nanououa ao ni bwaka naba, ma te aine ae raoiroi e kona ni buoka kamaiuan te mweenga, are bon te kabanea ao ti te tabo ni katantan ae ataia tabeman aomata ibukon angibuaka ao kangaanga” (“Privileges and Responsibilities of Sisters,” Ensign, Nobembwa 1978, 103).