Ina Ia Faamalamalamaina ma Olioli Faatasi Ai
Faamolemole mafaufau i fesili ma tali nei mai tusitusiga paia:
O le a le mea na faaumatia ai le au faomea a Katianetona?
“Ua oo foi ina saili e sa Lamana le au faomea a Katianetona, ma ua latou talai atu le afioga a le Atua i e aupito amioleaga ia te i latou, ua iu ina matua faaumatia lenei au faomea ai sa Lamana” (Helamana 6:37).
O le a le mea e mafai ona puipuia i tatou mai faaosoosoga ma u fanafana mu a le fili?
“O i latou uma o e faalogo foi i le afioga a le Atua, ma taofi mau i ai, e le fano i latou e faavavau; e le mafai foi e tofotofoga ma u fanafana mu a le ita mai ona manumalo ia te i latou e oo i le tauaso e taitaiese ai i latou i le malaia” (1 Nifae 15:24).
O le a le mea e sili atu ona malosi i le faatosinaina o o tatou mafaufau nai lo le taufaamatau o le oti po o taua?
“O lenei foi, ona ua aoga tele le talaiga o le upu i le taitaiina o le nuu e fai mea tonu—e moni, sa sili ona aoga ai i manatu o le nuu ai le pelu, po o se tasi mea ua oo atu ia te i latou—o le mea lea sa faapea ai Alema, e tatau ona latou tofotofoina pe aoga i ai le afioga a le Atua” (Alema 31:5).
O le a le mea o le a tatou olioli faatasi ai?
“O lea, o le talai atu atoa ma le talai mai, e malamalama le tasi i le tasi, e faamanuiaina ma olioli faatasi i laua uma” (MFF 50:22).
O le mea e malie ai, e tutusa lava le tali i nei fesili uma: o le mana lea o le afioga a le Atua. O le mea lenei e mafai ona tatou puipuia ai a tatou fanau ma faatoilalo ai luitau tetele o aso e gata ai—i o tatou lava olaga, i totonu o o tatou aiga, ma le lalolagi.
E faapefea la ona tatou maua faamanuiaga o loo i ai mo i tatou e ala i le mana o le afioga a le Atua? E mautinoa lava e taua suesuega a le tagata lava ia. Ae e oo mai foi ia i tatou mana e sili atu pe a tatou iloa ona aoao atu ma aoaoina mai le upu e ala i le Agaga. O le auala lenei tatou te “faamanuiaina ma olioli faatasi [ai].”
Mauaina e ala i le Agaga
E ui ina talafeagai le tele o le tulimata’i atu i le matafaioi a le faiaoga i se tulaga faaletalalelei, ae e ao foi ona tatou vaavaai ma le totoa ia tatou lava matafaioi o ni tagata a’oa’o.
I se tasi Aso Sa i ni nai tausaga ua mavae, a o ou auauna ai o se Fitugafulu Eria, sa ma malaga faatasi ai ma le peresitene o le misiona i le lotoifale e taitai ni fonotaga i ni vaega eseese. I le tau faaiuga o le fonotaga mulimuli, sa ma tau fai lagona uma le vaivai. E silia i le 300 maila na ma o ai i le taavale (480 km) ma ua tai faafia ona ma lauga. Na amata le fonotaga ma faagasolo le lisi lea na ma faia foi i isi sauniga.
Ae ina ua ma lauga, na tupu ai se mea matagofie lava. Na faateteleina le Agaga, ma na see atu le aoao atu ma le aoaoina mai i se isi tulaga fou, lea sa faaauau ai i le fonotaga atoa. Mulimuli ane, sa ma taufai faapea ifo, “Matuai manaia tele. O le fonotaga aupito sili lena ona manaia o le aso!”
O le a le mea na faia ai le eseesega? E le o se mea na ma faia. E le’i faafuasei ona sili atu ona ma atamamai pe maoae se lafolafo pe faaleagaga foi. O le mea moni, afai e i ai se mea, sa fai lava si o ma lelavava mai gaoioiga o le aso. O autu na ma tautalagia na tutusa lava ma autu i isi fonotaga.
A o ma talatalanoa e uiga i ia sauniga, na ma iloa ai o tagata na auai i le fonotaga mulimuli, sa sili atu ona lotomaulalo ma saunia faaleagaga. O le taunuuga, sa sili atu lo latou naunau e faalogo ma aoaoina i le upu, ma sa mafai ona faaaoga i ma’ua e le Alii o se auala e faamanuia ai o latou olaga. O le manuia o lena fonotaga, ona sa sili atu ona faatatau ia i latou nai lo i ma’ua.
Talu mai lena taimi, sa ou maua ai le anoanoai o faataitaiga o le faatinoina o lenei mataupu faavae. E leai se isi mea e sili atu ona lelei le aoaoina ai nai lo le galuega i le tino a le Alii lava ia. I le tusi a Mataio, sa tatou faitau ai, ina “ua oo atu o ia [Faaola] i lona lava nuu … sa le tele foi ni vavega na na faia i lea mea, ona o lo latou le faatuatua” (Mataio 13:54, 58). E toetoe lava a tatou faalogo atu ia Moronae i le pito i tua o folafola mai, “ou te apoapoai atu ia te outou aua tou te faafitia le mana o le Atua; aua o loo galue o ia ma le mana e tusa ma le faatuatua o le fanauga a tagata, e le liu lava o ia o le aso, ma taeao, e oo foi i le faavavau” (Moronae 10:7; ua faatusilima mea ua faamamafa).
Ou te fia fesili atu nei ia te outou ina ia mafaufau i le faaaogaina o lenei mataupu faavae e faatatau i lou gafatia ona maua aafiaga faaleagaga maoae a o e auai i se vasega po o se sauniga faamanatuga i le Aso Sa. O le a lau matafaioi i le fausia o le siosiomaga lea e mafai ai e le Agaga ona aoao atu ia te oe mea e ao ona e iloa? Afai e te maua se vasega a le lotu po o se sauniga faamanatuga e le manaia, pe o faatatau ea lena i le faiaoga— po o oe?
Mafaufau i le tali a Peresitene Spencer W. Kimball (1895–1985) ina ua fesiligia o ia e se tagata, “O le a lau mea e fai pe afai ua e i ai i se sauniga faamanatuga e le manaia?” Sa manatunatu Peresitene Kimball mo se taimi, ona tali atu lea, “Ou te le iloa; ou te le’i i ai lava i se sauniga faapena.”1 Faatasi ai ma ona aafiaga umi i le Ekalesia, e le fesiligia lava sa auai atu Peresitene Kimball i ni sauniga se tele lea sa faitau ai e tagata a latou lauga, tautatala i se leo e le fesuisuiaia, po o le faamatalaina foi o ni malaga nai lo le aoaoina o aoaoga faavae. Ae atonu foi, sa aoao atu Peresitene Kimball e faapea, e le’i alu o ia i le sauniga faamanatuga ina ia faafiafiaina; sa alu atu e tapuai i le Alii, faafou ana feagaiga, ma aoaoina mai luga. Afai na auai atu o ia ma se loto matala, ma se naunautaiga ina ia “tausia i le afioga lelei a le Atua” (Moronae 6:4), ma se tatalo—ae le o le faamasino atu—mo failauga, o le a aoaoina o ia e le Agaga i mea e ao ona ia faia ina ia avea atili ai ma se soo mataalia ma faamaoni. Sa aoao atu e Peresitene Kimball le mataupu faavae o le aoaoina e le Agaga.
I le Mataupu Faavae ma Feagaiga, ua aoao mai ai i tatou e le Alii i le aoao atu ma le aoao mai le Agaga:
“E moni, ou te fai atu ia te outou, o le ua faauuina ia te au ma auina atu e talai atu le upu moni i le Fesoasoani, i le Agaga o le upumoni, pe na te talai atu ea i le Agaga o le upu moni po o se isi ala?
“Afai foi ua faia i se isi ala e le mai le Atua ia.
“O lenei foi, o le talia le upu i le upu moni, pe talia ea e ia i le Agaga moni o le upu moni po o se isi ala?
“Afai ua faia i se isi ala e le mai le Atua ia.
“O lea, tou te le malamalama ma iloa ea i se a, o le talia le upu mai le Agaga o le upu moni e talia e pei ona talaiina atu ai e le Agaga o le upu moni?
“O lea, o le talai atu atoa ma lē talia mai, e malamalama le tasi i le tasi, e faamanuiaina ma olioli faatasi i laua uma” (MFF 50:17–22).
Manatua ua Ia fetalai, afai tatou te aoao atu pe talia mai i soo se isi lava auala e ese mai le Agaga, e le mai le Atua lea. E na o le Agaga na te silafia o tatou mafaufauga uma, o tatou lagona uma, o tatou manaoga uma. E na o Ia e mafai ona fesootai faapitoa ma patino mai ia i tatou taitoatasi, i mea e ao ona tatou iloa, e faavae lea i le atamai uma o le Atua.
I le avea ai ma tagata aoaoina, e le tatau ona tatou faamoemoe e faafiafiaina [i tatou] e le aunoa, faaosofia faalelagona, pe ta’u mai i taimi uma tali e aunoa ma lo tatou mafaufau i ai o i tatou lava; e tatau ona tatou saunia lelei, ma le agaga tatalo ma saili musumusuga faapitoa mai le Agaga, e fesoasoani tatou te faafetauia ai luitau tulaga ese i o tatou lava olaga. E tusa lava pe o le faiaoga a se vasega o se faiaoga ua 20 tausaga o le tomai faafaiaoga i le inisititiuti po o se palama faatoa liliu mai na te le’i aoaoina muamua se vasega, e laitiiti lava se eseesega i le tulaga lelei o lo tatou aoaoina. O Peteru o se faifaiva; o Iosefa Samita e le sili atu ma le vasega tolu laiti lana aoga. Peitai, na tulei mai ma le mamana le Agaga e ala mai ia te i la’ua, ia i latou o ē i ai “taliga e faalogo ai” (Mataio 11 :15).
Sailia ma le Fesili Atu
E faapefea la ona tatou maua mai e ala i le Agaga? Ou te fautuaina ni manatu se lua: talia le matafaioi mo lo tatou aoaoina ma fai ni fesili faamaoni.
O le manatu muamua e mai le Alema: “Afai tou te ala mai ma fagua o outou mafaufau e oo i le tofotofo i au upu, ma faaaoga sina faatuatua itiiti lava, ioe, afai tou te le mafaia se mea e sili i le manao i le fia faatuatua, ina tuu ia lenei manao e galue i totonu ia te outou, seia lava lo outou faatuatua e talia ai nisi o au upu” (Alema 32:27).
E le mafai ona tatou manatu mama i le aoaoina o le talalelei, ma faamoemoe e maua mai le mana o le upu i o tatou olaga. E tatau ona tatou “ala mai ma fagua o [tatou] mafaufau.” E tatau ona tatou “tofotofo i [Ana] upu.” E tatau ona faaaoga o tatou faatuatua. E tatau ona tatou mananao e talitonu. E tatau ona tatou “tuu ia lenei manao e galue i totonu ia te [i tatou]” ma “talia ai nisi o [Ana] upu.” Matau, e le o faamatalaina e Alema se uiga lea o le alu i le lotu ma faamoemoe e faafiafia outou e se faiaoga. Ua ia aoaoina i tatou e tatau ona tatou talia le matafaioi mo lo tatou lava aoaoina ma aapa atu ma le faatuatua pe afai tatou te faamoemoe e maua le mana o le upu i o tatou olaga.
O le manatu lona lua e maua mai le Iakopo—mai upu paia ia na musuia ai Iosefa Samita e alu i le Vao Paia:
“Ae afai ua leai se poto i so outou, ina ole atu ia i le Atua, o le foai tele mai i tagata uma ma le le toe tautaua; ona foaiina mai ai lea ia te ia.
“A ia ole atu ma le faatuatua, aua lava nei masalosalo. Aua o le masalosalo e tusa ia ma le peau o le sami ua sousou i le matagi ma felafolafoaiina” (Iakopo 1:5–6).
E le aunoa ona faatonuina i tatou e le Alii ina ia ole atu, saili, ma tu’itu’i atu faatasi ma le folafolaga paia e faapea, o le a tatou maua, iloa, ma toina mai ia i tatou ia faitotoa o faaaliga. O le fai atu o fesili faamaoni o le mamanu lea na faatulagaina e le Alii mo i tatou, e valaaulia ai le taitaiga a le Agaga i o tatou olaga. Mafaufau i le tele o nisi fesili sa i le mafaufau o Iosefa ina ua ia faitau i upu a Iakopo:
“O le taulotoaiga o lea tauaiupuga ma le lasi o taofi na ou faapea ifo ai ia te au lava: o le a se mea e ao ina ou faia? O ai o nei lotu uma ua sao; po ua sese i latou uma? Afai foi ua sao se tasi o i latou, o le fea, ma pe faapefea foi ona ou iloa?” (Talafaasolopito—Iosefa Samita 2:10).
O upu a Iakopo na oo mai i le “mana malosi i le loto o [Iosefa]” (Talafaasolopito—Iosefa Samita 2:12) aua sa i ai fesili i lona mafaufau.
O a la ituaiga fesili e alagatatau ona tatou fesili ai? A faapea la e te auai atu i se lesona a le Aoga Sa e faatatau i nei fuaiupu mai le Iakopo. Ao e sauni mo le vasega—pe e te mafaufau foi i nei fuaiupu i le taimi o le vasega—atonu e te mafaufau loloto i fesili e pei o nei:
-
O ai Iakopo? O a fesili po o tulaga na aumaia ai lenei savali faapitoa?
-
O le a le poto?
-
O le a le uiga o le “ole atu ma le faatuatua”?
-
E mafai ona fesili atu e uiga i mea ou te le malamalama ai ma fesili pea “aua lava nei masalosalo”? O le a le uiga o le “masalosalo”? O le a le taimi ma aisea foi ou te masalosalo ai? O a filifiliga e mafai ona ou faia e mautinoa ai ou te le masalosalo?
-
O a ni tulaga na ou lagona ai le “sousou” ma le “felafolafoaiina”? O a ni lagona e mafai ona ou maua mai na taimi e fesoasoani ai ia ou ole atu ma le faatuatua?
-
O a aoaoga ma mataupu faavae o loo aoaoina i nei fuaiupu? O fea se isi vaega o tusitusiga paia o loo aoaoina ai nei mataupu faavae?
-
E faapefea ona fesootai nei mataupu faavae ma le soifuaga ma le misiona a le Faaola? E mafai faapefea ona fesoasoani ou te latalata atu ai ia te Ia?
-
E mafai faapefea ona fesoasoani nei mataupu faavae ia te au po o e pele ia te au, e taulima ai o matou luitau ma avanoa faapitoa?
A o faia la tatou vaega o le fai o fesili musuia ma saili ma le naunautai i se taitaiga i o tatou olaga, ua tatou valaauliaina le Agaga e aoaoina i tatou e ala i le mana o le upu.
Aoao Atu i le Agaga
Ua fetalai mai le Alii e pei foi o le maua mai le Agaga, e ao foi ona tatou aoao atu i le Agaga. O le a le uiga o lena mea?
Atonu sa e vaai i (pe o oe foi o) se tasi o savali atu i le faapaologa e aoao se vasega, tilotilo i le tusi lesona, ma fai mai, “Ia, e le’i i ai sou taimi e sauni ai; o le a ou faalagolago lava e aoao atu i le Agaga.” Pe atonu foi na e vaai i (pe o oe foi o) se tasi na faaaluina ni vaiaso e saunia ai se lesona, ua i ai uma pepa e tufa atu e faalautele atili ai [le lesona], tele o fesoasoani vaaia, ma se tusitusiga o le upu i le upu ua fuafuaina e “aoao atu ai i le Agaga.”
Ou te fautuaina e leai se tasi o nei auala ua faamoemoe i ai le Alii.
O le tulaga faatonuina mo le aoao atu i le Ekalesia atoa ua uma ona faataatia i tusitusiga paia ma ua toe faamamafaina i le tusi lesona Talai La’u Talalelei. Ua aoaoina i tatou ina ia “muai saili ia maua le upu [a le Alii]” (MFF 11:21)—i se isi faaupuga, ina ia saunia ma le maelega e ala i le suesue, fesili ma saili tali i fesili faamaoni, ma fatuina ni otootoga e aoao atu ai. Ona aoaoina lea o i tatou ina ia tatala atoa o tatou [loto] i le taitaiga a le Agaga i le taimi tonu e aoao atu ai, e faatatau i mea e ao ona tatou tau atu ma fai.
I se faasalalauga lata mai nei o le aoaoga a taitai i le lalolagi atoa, na sii mai ai e Peresitene Gordon B. Hinckley le fuaiupu lenei mai le Mataupu Faavae ma Feagaiga:
“Aua nei popole muamua outou i mea o le a outou fai atu ai; a ia teu pea i o outou mafaufau upu o le ola, ma o le a tuuina atu ia te outou i lea lava itula lena vaega e tatau ai mo tagata taitoatasi” (MFF 84:85).
Ona ia taua lea, “O le fautuaga lenei a le Alii. E le mafai ona le amanaiaina e aunoa ma ni taunuuga.”2
E tatau ona tatou “teu pea i o [tatou] mafaufau upu o le ola”—o lona uiga, o le faitau, suesue, fesili i le Alii, ma saunia—ma faalagolago i le Agaga e tuuina mai ia i tatou “i lea lava itula lena vaega e tatau ai mo tagata taitoatasi.” E moni lenei mea e tusa lava pe o tatou aoao atu se vasega pe tuuina atu se lauga i le sauniga faamanatuga po o le konafesi faalesiteki. Ae e i ai se eseesega autu e tasi: o se faiaoga e seasea lava ona tuuina atu se lauga i totonu o se potuaoga, ma o se failauga na te le taitaia se talanoaga i sauniga faamanatuga pe o le sauniga i le Aso Sa o le konafesi faalesiteki pe faaleitu.
I totonu o le potuaoga, o le aoao atu i le Agaga e taua i le fausiaina o le siosiomaga lea e mafai ai ona mafuta ai le Agaga ma faia ai fesili musuia ina ia mafai ona tatou “aoao le tasi i le isi i mataupu o le malo” (MFF 88:77).
Na saunoa mai Elder Richard G. Scott o le Korama a Aposetolo e Toasefululua e uiga i aoaoga i potuaoga: “Aua lava, o lona uiga o la’u tala, ia aua lava, ne’i tuuina atu se aoaoga e aunoa ma le faaauai o tamaiti o le vasega i le faatinoina. O se ‘faiaoga e tautala i le taimi atoa o le vasega’ o se ituaiga aupito vaivai lea o aoaoga i le vasega… . Ia mautinoa e lava le faaauai o le vasega, aua o lena faaaogaina o le faitalia e se tamaitiiti aoga, e faatagaina ai le Agaga Paia e faiaoga. E fesoasoani ai foi i le tamaitiiti e teuina lau savali. A faaupu e tamaiti aoga ia upumoni ia latou lava upu, ua faamautuina ai i o latou agaga ma faamalolosia ai a latou lava molimau patino.”3
O aoaoga i totonu o le aiga e tatau foi ona faapena ona faia i le Agaga. E ui lava ina i ai nisi o o tatou taimi faatulagaina e aoao atu ai, e pei o le suesue faaleaiga o tusitusiga paia ma afiafi faaleaiga, o le tele lava o aoaoga e faia i taimi e le mafaufauina ma e ala atu i faataitaiga. E faatatau foi iinei le mataupu faavae: e tatau i matua ona “teu pea … upu o le ola” ina ia latou saunia ma avanoa mo le Agaga i taimi e aoao atu ai.
A o tatou mulimuli i le fuafuaga a le Alii mo i tatou ina ia aoao atu ma aoaoina i le Agaga, e moni lava ua “faamanuiaina [i tatou] ma olioli faatasi”—i o tatou aiga taitoatasi faapea foi ma le aiga lautele o le Atua.