“Tama, Ou Te Mitamita ia te Oe!”
Talu ai ona sa ma le iloaina ma lou toalua ni aoga i Madrid, Spain, e faatautai e tagata O Le Ekalesia a Iesu Keriso o le Au Paia o Aso e Gata Ai, ma talu ai ona sa ma mananao ia maua e le ma fanau ia aoaoga faalelotu, o lea na ma lesitalaina ai i latou i se aoga na lagolagoina e se isi ekalesia. Talu ai sa na o le ma fanau lava tagata o le tatou Ekalesia na aooga i lenei aoga, sa ma faamoemoe ia le avea i latou ma taulaiga o le faailoga lotu.
O se tasi aso ia Oketopa o le 1999, na aumai ai e lo ma atalii o Pablo, e 16 tausaga i le taimi lena, se valaaulia mai le aoga e auai i se aoaoga ma se talanoaga na faaautuina “Faapotopotoga Faalelotu: Faamamona.” O le aoaoga o le a tuuina mai e se taitai taualoa na lauiloa i le faaaluina o se vaega tele o lona olaga e suesue ai ekalesia, ae maise lava O Le Ekalesia a Iesu Keriso o le Au Paia o Aso e Gata Ai.
I lou popole ai ina nei tuuina mai ai se lagona sese e uiga i o tatou talitonuga, o lea na ou fesootai atu ai i le matou peresitene o le siteki ma faailoa atu ia te ia lea fonotaga. Sa ia tusia le aso ma le nofoaga ma fai mai ou te talanoa i le Matagaluega o le Va i Fafo a le Ekalesia, e vaai pe mafai ona auai se sui [o le Ekalesia] ma tali soo se fesili e ono tulai mai.
Ina ua taunuu mai lena aso, sa matou o atu loa ma lou toalua ma lou atalii i le aoga. O le fale faafiafia na faia ai le aoaoga sa nofoia ai le 500. O le taimi lava na matou nonofo ai i o matou nofoaga, sa matou vaavaai solo ai e sue nisi tagata o le Ekalesia o e atonu o i ai i le aofia toatele na faatumulia ai le potu. E le’i umi ae matou iloa atu Uso Quirce o le Va i Fafo. Sa talotalo mai o ia mai le isi itu o le potu.
Sa amataina le fonotaga, ma sa faailoa mai e le faatonu o aoaoga le failauga, ma le anoano o viiga ia te ia ma se faamatalaga auiliili o iunvesite na maua ai ona tikeri, o le poto salalau ma le faalelotu. Na amata le tautalaga a le failauga i se otootoga puupuu o le talafaasolopito o le FaaKerisiano mai le taimi o Iesu Keriso ma Ana Aposetolo seia oo i le tausaga 1830, o le taimi muamua lea na faalogo ai le lalolagi i le Ekalesia a Iesu Keriso o le Au Paia o Aso e Gata Ai, na faatuina i Amerika.
Sa faaleogaoga tele le iloiloga faatulagaina a le failauga o la tatou tapuaiga. Sa iloagofie lava sa ia faitauina le tele o a tatou tusi aua sa masani ona ia sii mai fuaiupu mai le Tusi a Mamona ma le Mataupu Faavae ma Feagaiga. Sa tele foi ina faitau mai mai le tala a le Perofeta o Iosefa Samita o le Uluai Faaaliga. Na foliga mai sa faamoemoe o ia e taitai atu lana au faalogologo i le faaiuga e faapea, o le faaMamona e moni lava o se faapotopotoga faalilolilo, e pei ona ia talitonu i ai, ae e le o se tasi o vaega e aupito sili ona matautia.
Na ou tusia ni faamatalaga o mea uma sa ou manatu na sese, e pei o le taimi na fai mai ai o Mamona e le o ni tagata Kerisiano, ma na kopi mai e Iosefa Samita le Tusi a Mamona mai se talafatu ua leva a Amerika. Sa fai si auiliili o le aoaoga ma na uma i le silia ma le 90 minute, ma o le taimi lea na alu ae ai se patipati tele i le fale faafiafia.
Ina ua uma le pati tele ma amataina le talanoaga, o le tagata muamua lava na tulai o Uso Quirce, o le sa faailoa atu o ia o se tasi o le Ekalesia. Sa ia faamalamalama atu le ala na maua ai e Iosefa Samita ia papatusi auro ma lona sao i le avea ai ma se Perofeta o le Toefuataiga.
A o ou faalogologo atu ia Uso Quirce, na faafuasei ona ou lagona le tatau ona ou tulai foi ma faamalamalama ni aoaoga faapitoa, ina ia mafai ona iloa e tagata uma sa i ai le moni e uiga ia tatou aoaoga faavae ma o tatou talitonuga.
Ina ua ou faailoa atu i lou aiga sa fia fai sau tala, sa fefe Pablo ma fai mai, “Leai, Tama, faamolemole. Aua nei faia sau tala, aua e iloa uma lava e tagata o loo iinei ia au, ma e ono i ai ni faafitauli mo a’u i ou faiaoga.” Sa ou mafaufau i ai ma le palaai i lo’u tuua na o Uso Quirce e tautala, ae na ou le manao foi e oo ni faafitauli i lou atalii, ma o lena taimi sa ou filemu ai. Ae peitai, a o alu pea le taimi, na ou lagona le uunaiga malosi a le Agaga.
Sa ou toe tau atu foi i lou aiga ou lagona, ma sa faaauau pea ona faailoa mai e lou atalii lona tetee i lou tulai. Mulimuli ane, i le le mafai ai ona ou toe teenaina le uunaiga a le Agaga, sa ou tulai malie ae ma savali atu loa i le pito i tua o le fale faafiafia e faatasi ai ma Uso Quirce. Ma sa faateia i le magamagagu o le aofia: “O se isi foi Mamona.”
Ina ua faauma e Uso Quirce lana saunoaga, sa tuu lou lima i totonu o lau taga e aumai i fafo au faamatalaga na tusitusi, ae i lou te’i tele, na leai se mea i lau taga. Na galo au faamatalaga na tusitusia i le mea sa ou nofo ai. O le taimi tonu lava lena, ua oo ai i lou avanoa e tulai ai.
Ou te le iloa po o gafea e amata ai. O mea uma sa ou faamoemoe e fai atu na mouese mai lo’u mafaufau. Sa ou amata i le faapea atu, sa avea au ma se tagata O Le Ekalesia a Iesu Keriso o le Au Paia o Aso e Gata Ai mo le 26 tausaga ma na ou iloaina na o le pau lenei o le Ekalesia moni i luga o le fogaeleele, ma na toefuataiina e Iesu Keriso e ala i le Perofeta o Iosefa Samita, ma o Iesu o le Alo o le Atua—o lo tatou Faaola ma le Togiola.
Ou te le manatua pe o le a le umi na ou tautala ai, ae po o a foi mea uma na ou tautala ai. Na pau le mea na ou manatuaina o le lofituina o le sa’o, ma na ou lagona le tau fai autilo mai o mata e 500 ia te au. Ina ua uma lau tautalaga, na ou faafetai atu ia i latou na auai mo le avanoa na tuuina mai e faailoa atu ai ou talitonuga ma ou liliu loa ma tuua le fale faafiafia. Sa ou lagona le toafilemu, ae sa gatete ou vae.
Ina ua uma le fonotaga, sa mafai ona ou toe faatasi atu i lou aiga, sa sau lou atalii ma fai mai, “Tama, sa e faia le mea sao. Sa e tuuina mai se molimau matagofie, ma sa e tautala ma le mana ma le pule. Tama, ou te mitamita ia te oe!”
Na iloa e Pablo atonu e i ai ni ona faafitauli i le aoga ona o le mea na ou faia, ae sa sili atu le taua ia te ia o le iloa o loo i ai se molimau i lona tama ma e naunau e puipuia.