Lagona Mautinoa Moni
E te fia maua ni lagona lelei sili atu e uiga ia te oe lava? E te fia maua le lagona mautinoa? Ia o le autu o le Mutuale i le tausaga lenei, e mo oe.
E i ai taimi, tatou te tauivi uma ai ma manatu o le le mautonu. Pe ua e fesili ifo ia te oe lava: “O le a se mea e mafai ona ou faia ou te lagona atili ai le lagona mautinoa?” po o le “E mafai faapefea ona ou maua ni lagona lelei sili atu e uiga ia te au lava?”
O loo i ai se tali maoae i tusitusiga paia. Fai mai afai e ia te oe le alofa mama ma “ia teuteuina ou manatu i le mama e le aunoa; ona malosi ai lea o lou faatuatua fai ifo i luma o le Atua” (MFF 121:45). O lena ituaiga lagona mautinoa o le mautinoa moni. Afai e te lagona le mautinoa i luma o le Atua, ua mafai foi ona e lagona le mautinoa i soo se isi lava tagata.
“Ia,” atonu e te fesili faapea, “o le a la le uiga o le amiolelei?” ua saunoa mai Peresitene James E. Faust, Fesoasoani Lua i le Au Peresitene Sili, o le amiolelei e tele ona faauigaga—ola mama, amioga ma mafaufauga sao, o le amiosolia ma le legavia.1
Ma atonu o le a e fesili: “E faapefea ona ou faia lenei mea? O i ai se mea e taialaina au?” Ioe, o loo i ai. O mataupu faavae ma aoaoga faavae o loo i le Mo Le Malosi o le Autalavou o le a taialaina oe e fai filifiliga e te agavaa ai mo le mafutaga ma le Agaga Paia. Ma afai e i ai le Agaga Paia ia te oe, o lona uiga, o loo e i ai i luma o le Atua. Mafaufau i le lagona mautinoa o le Tama Faalelagi ia te oe na Ia auina mai ai lona Agaga ia te oe.
A o e ola ai i tulaga faatonuina o loo faamatalaina i le Mo Le Malosi o le Autalavou, ua folafola mai e le Alii ia te oe “o le a faateleina ou avanoa, faalautele lau vaaiga i le lumanai, ma faamalosi ia te oe.”2 O le a atili ai lou amioatua, ma atili ai ona maua le lagona mautinoa.
Ae ia e faaeteete. E le o le auala lenei e ta’u atu e le lalolagi ia te oe e maua ai le lagona mautinoa. E ta’u atu e le lalolagi ia te oe, ina ia e mautinoa e tatau ona e sili atu nai lo isi i se auala—e moomia ai lou maua o ni mea se tele, ni taleni se tele, se poto tele, ma se tulaga lauiloa tele. E le moni lena mea. O le lagona mautinoa taufaasese lena.
O tulaga faatonuina a le Alii e ese mai tulaga a le lalolagi. A o taulai atu le lalolagi i foliga vaaia i fafo, “e vaai Ieova i le loto” (1 Samuelu 16:7). O oe o se atalii/afafine o le Atua, ma o lou natura paia e le itiiti ifo pe sili atu foi i lo se isi lava tagata. O le mea moni, o tagata uma—e aofia ai ma oe—ua i ai ni taleni ma ni tomai eseese. O nei meaalofa a le Agaga ua tuuina atu ia te oe ina ia mafai ai ona faataunuu lau misiona paia i luga o le fogaeleele. E finagalo le Tama Faalelagi ina ia e fiafia, ia e alualu i luma ma faataunuu mea uma ua Ia finagalo ia avea ai oe.
Pe a oo ni mea faafeagai i lou olaga, mafaufau i toa o tusitusiga paia. E pei o Mose, e mafai ona e maua le malosi i le tatalo ma manatua o oe o se atalii/afafine o le Atua (tagai Mose 1:13, 20–22). O Nifae le isi faataitaiga lelei o se tasi na [i ai] lagona mautinoa i le Alii. Ina ua faatonuina i latou ma ona uso e aumai papatusi apamemea, sa ia iloa ma le mautinoa e mafai ona ia faia faatasi ma le fesoasoani a le Alii. Sa ia faapea mai, “Ou te alu atu ma fai ia mea ua poloaiina e le Atua, aua ua ou iloa, e le aumai e le Atua ni poloaiga i le fanauga a tagata, seiloga na te saunia le ala mo i latou ia mafai ai i latou ona fai le mea ua ia poloaiina ai i latou” (1 Nifae 3:7). Na oo mai le lagona mautinoa o Nifae ona o lona ola mama.
E pei lava o Mose ma Nifae, ma le toatele o isi, a e ola i se olaga mama o le a mafai ona e faataunuu ma le mautinoa lau misiona i le lalolagi, o le lagona mautinoa o le a faateleina, pe o le a “malosi” foi. Matou te iloa e mafai ona maua le lagona mautinoa moni e soo se tasi e naunau “ia teuteuina [lona] manatu i le mama e le aunoa.”
Autu o le Mutuale 2007
“Ia teuteuina ou manatu i le mama e le aunoa; ona malosi ai lea o lou faatuatua fai ifo i luma o le Atua” (MFF 121:45).