Savali a le Au Peresitene Sili

O Malosiaga O Le A Laveaiina Ai i Tatou

Saunia E Peresitene James E. Faust

Fesoasoani Lua i le Au Peresitene Sili

Ata

Ua ou lagona le uunaiga e faaleo atu se leo o le lapataiga e uiga i le tiapolo ma ana agelu—le pogai ma le autu o mea leaga uma. Ou te faia ai ma le agaga tatalo, aua o Satani e le o se mataupu faagaeetia. Ou te manatu ia te ia, o le tau faasese mua.

Ou te manatu o le a tatou molimauina le faateleina o faamaoniga o le mana o Satani a o faatupulaia le malosi o le malo o le Atua. Ou te talitonu o taumafaiga faateleina a Satani o se faamaoniga lea o le moni o lenei galuega. I le lumanai, o le a sili atu ona atamai ma malosi le fili. O le a ufiufi i faiga pepelo ma le atamai, ae o le a sili atu foi ona iloagofie ia faiga. O le a tatou manaomia se malosi faaleagaga sili atu e iloa ai ituaiga togafiti leaga ma le malosi sili atu e tetee ai. Peitai o faafitauli ma toatuga i le galuega a le Atua o le a na o sina taimi itiiti, aua o le a agai pea i luma le galuega.¹

E le o se mea lelei le tosina atu ia Satani ma ana mea lilo. E leai se mea lelei e maua i le faalatalata atu i le leaga. E faatusa i le taalo i le afi, e faigofie lava ona mu ai: “O le malamalama i le agasala e faaosoosoina ai i tatou ina ia faia.”² Pau lava le ala saogalemu, o le taumamao ese lea mai ia Satani ma soo sana gaoioiga leaga po o ana faiga faatiapolo foi. O aafiaga faataumaoi o le tapuai i le tiapolo, faataulaitu, temoni, faalauatau, vaafaatau, faitogafiti eleelea, ma isi ituaiga uma o faiga faatemoni, e tatau ona aloese mai ai i taimi uma.

Peitai, sa saunoa Peresitene Polika Iaga (1801–77) e taua le “suesue … i le tiapolo, ma ona taunuuga.”³ Ona o Satani o le pogai o mea leaga uma i le lalolagi, o lea e taua ai ona iloa o ia lea o le autu o le tetee i le galuega a le Atua. Sa manino ona faamatala mai e Alema lenei mataupu: “E mai le Atua o mea lelei uma, a e mai le tiapolo mea leaga uma.”⁴

O lo’u faamoemoega tonu lava i le filifilia o lenei mataupu, o le fesoasoani lea i tagata talavou e ala i le lapataia o i latou, e pei ona fai mai Paulo, “Ina nei oleolegia i tatou e Satani: aua tatou te le valea i ana togafiti.”⁵ Matou te faamoemoe ia mafai e tagata talavou, o e le masani ma mataupu tau faasese a le lalolagi, ona aloese mai faatosinaga ma auala taufaasese a Satani. Ou te le fai atu ua ou maua se malamalama faapitoa i ala a Satani, peitai e i ai nisi taimi ua mafai ona ou iloa ai ana uunaiga ma ana galuega i lo’u olaga ma olaga o isi. A o o’u i ai i la’u misiona muamua, sa taumafai Satani e faaliliuese a’u mai lo’u ala agai i le lumanai, ma ana faapea e mafai, na te faaumatia lo’u ta’uaogaina i le galuega a le Alii. Ua tusa lena ma le 60 tausaga ua mavae, ae ou te manatua pea foliga fetaui o ana faatosinaga.

Faaosoosoga Faatosina a Satani

O ai e le’i faalogo ma lagonaina faatosinaga a le tiapolo? E masani ona logo lelei ma faigofie ona taliaina ana savali. O se leo moomia, faaoleole ma le malie. E le malo pe pavale. E leai se tasi e fia faalogo i le leo o Satani pe ana malomaloā pe saua. Afai e le logomalie le leo o le tiapolo, e le mafai ona tauanauina tagata e faalogo i ai.

Na tusia e Shakespeare, “O le perenise o le pogisa o se tamalii,”⁶ ma, “E mafai foi e le tiapolo ona sii mai Tusitusiga Paia mo lona faamoemoega.”⁷ I le avea ai ma taufaasese mua, o loo i ai ia Lusifelo ni mana ofoofogia o le taufaa’ole’ole. E pei o la Paulo ia Korinito, “E le se mea foi lea e ofo ai; aua o Satani lava, ua liua o ia e ia ma agelu o le malamalama.”⁸

O nisi nei o fuaitau taufaasese a Satani “O le la e fai e tagata uma lena mea”; “Afai e le afaina ai se isi, e leai se mea e leaga ai”; “Afai ua e fiafia i lena mea, ua lelei”; po o le “O le mea ‘lelei’ lena e fai.” O nei faaupuga faaufiufi ua avea ai Satani ma taufaasese mua, o le matai o le taufaasese, o le faamatua o le taufaa’ole’ole, ma le pepelo silisili.

E tofu i tatou uma ma ni taofi [brakes] i totonu, e taofiofi ai i tatou a o le’i mamao lo tatou mulimuli atu ia Satani. O le leo itiiti ma le malu lea o loo i totonu o i tatou. Ae a tatou faatagaina i tatou lava e gauai atu i faaosoosoga a Satani, ona amata loa lea ona sisina le suauu o le taofi ma faapea ona vaivai ai o tatou taofi ma lē toe aoga.

Ua tuuina mai e Nifae ia i tatou le mamanu po o le ala e galue ai Satani:

“A o nisi na te faalotomalie, ma faamoe ia te i latou i le filemu i la le tino, latou te fai mai: ua lelei mea uma i Siona; e moni, ua manuia Siona, ua lelei mea uma—e faapena ona olegia e le tiapolo o latou agaga, e taitai ifo ai i latou ma le faaeteete i seoli.

“O nisi foi na te viivii i ai ma fai atu ia te i latou e leai se seoli. Na te fai atu foi ia te i latou: E le se tiapolo a’u nei, aua ua leai se tiapolo—e faapena ona musumusu o ia i o latou taliga seia faamauina i latou e ia i ana filifili matautia e le malaveaiina mai ai.”⁹

Na faamatalaina e le Au Peresitene Sili ia Satani faapenei: “O loo galue o ia i lalo o se taufaasese malu e faigata ai i le toatele ona iloa o ia po o ana faiga. E leai se solitulafono na te le faia, leai se togafiti na te le fuafuaina, leai se mala na te le aumaia, leai se loto na te le nutimomomoina, leai se ola na te le aveeseina, leai se agaga na te le faaumatiaina. E sau o ia e pei o se gaoi i le po; o ia o se luko i ofu faamamoe.”¹⁰ O Satani o le matai o le lalolagi i le faaaogaina o le taufaasee, ma na te iloa foi le mana maoae o upu, o se mana e masani ona faaaoga e ana auauna.¹¹ Ua avea o ia o se tasi o malosiaga sili o le lalolagi.

Sa ou faalogo i se tasi taimi ia Ernest LeRoy Hatch, o le sa avea ma peresitene o le malumalu o Guatemala City, o faapea mai, “O le tiapolo e le atamai aua o ia o le tiapolo; ua atamai o ia ona ua matua.” E moni, ua matua le tiapolo, ma sa le avea o ia i taimi uma ma tiapolo. O le taimi muamua, sa le’i avea o ia ma pogai o le leaga. Sa faatasi o ia ma au a le lagi i le amataga. Sa avea o ia ma se “agelu a le Atua o le sa i ai le pule i luma o le Atua.”¹² Sa muamua mai o ia ia Keriso ma fai atu i le Atua le Tama, “Faauta, o au lenei, auina atu au, ia avea au mou atalii, ma o le a ou togiolaina le fanauga a tagata, ina ia le se ese se agaga e toatasi, ma o le a faapea lava ona ou faia; o le mea lea, ia tuu mai ia te au lou mamalu.”¹³ Sa fia faia e ia lenei mea e ala i le fai faamalosi, ma faaumatia ai le saolotoga o tagata.

Na avea Satani ma tiapolo i le sailia o le mamalu, mana, ma le pule e ala i le faamalosi.¹⁴ I le isi itu, o Iesu o lē na filifilia “mai le amataga,” na fetalai atu i le Atua, “Lo’u Tama e, ia faia lou finagalo, ma ia ia te oe pea le mamalu e faavavau.”¹⁵ E matua eseese lava ia auala! E ui lava ina sese Satani, ae sa faatauanau atu pea lava o ia ma tosina atu ai le tasi vaetolu o au a le lagi e mulimuli atu ia te ia.¹⁶ Sa ia faatinoina se faaoleole tele i le faapea atu, “O au foi o se atalii o le Atua,”¹⁷ ma faatauanauina nisi ia sili atu lo latou alolofa ia te ia nai lo le Atua.

Saolotoga—O La Tatou Filifiliga

O lo tatou saolotoga, ua tuuina mai ia i tatou i le fuafuaga a lo tatou Tama, o le filifiliga sili lea i le fuafuaga a Satani o le faamalosi. Faatasi ai ma lenei meaalofa faaeaina, ua mafai ona tatou tuputupu ae, faaleleia atili, alualu i luma, ma saili atu i le atoatoa. A aunoa ma le saolotoga, e leai se tasi o i tatou e mafai ona tuputupu ae ma alualu i luma e ala i le aoao mai i a tatou mea sese ma faaletonu ma [sese] o isi.

Ona o le fouvale, na tuliesea ai Lusifelo ma “avea ai ma Satani, ioe, o le tiapolo lava lea, o le tama o pepelo uma lava, e faasese ma faatauaso mafaufau o tagata, ma taitai faatagataotaua i latou i le mea na te loto i ai, o i latou uma ia o e e le faalogo i le leo [o le Alii].”¹⁸ Ma o lenei la peresona o le sa avea ma agelu a le Atua ma sa i ai le pule i luma o le Atua, sa aveesea mai le afioaga o le Atua ma Lona Alo.¹⁹ O lenei mea na tupu ai le faanoanoa tele, “aua na tutulu le lagi ona o ia—o ia o Lusifelo, o se atalii o le taeao.”²⁰ Pe le tuuina atu ai ea e lenei mea se matafaioi i au soo o Keriso, ia faaalia le popole mo ē pele ua sē ese mai le ala ma “ua vavaeeseina ai i latou mai luma o le Atua”?²¹ E leai se isi faiga sili atu ou te iloa nai lo le faaali atu o le alofa le faatuaoia, ma fesoasoani i agaga ua leiloloa, ina ia sailia se isi ala.

Ae peitai, o loo faia e Satani se gaoioiga le talafeagai ae taua. I le tusi o le 2 Nifae ua tau mai ai ia i tatou, “Aua e tatau lava ona i ai le faafeagai o mea uma.”²² O le mea moni, na lapatai mai Peteru, “Ia outou faautauta ma mataala; aua o le ua fai outou mona fili, o le tiapolo lea, o loo fealualuai o ia e pei o se leona tagi, ua saili se tasi e aina e ia.”²³

Na tuuina mai e C. S. Lewis, o se tusitala Kerisiano, se vaaiga manino i ala faatiapolo. I se tusi fatu na ia faia, na faatonuina ai e le matai tiapolo o Screwtape, le tiapolo faataitai o Wormwood, o le o loo aoao ia avea ma tiapolo e sili atu ona atamai:

“O le a e fai mai o mea ia o ni agasala sili ona laiti; ma e aunoa ma se masalosalo, e pei o le au faaosooso laiti uma, e te naunau lava ia mafai ona lipoti atu ia amioleaga tulaga ese… . E le afaina pe o le a le laitiiti o agasala, ae o le tuufaatasiga o o latou taunuuga ia aluese malie mai le tagata mai le Malamalama ma alu atu i le Pogisa… . E moni, o le auala aupito saogalemu i Seoli o le auala e faifaimalie lava—o le auala e faaifoifo malie, o le eleele malu, e leai ni afega faafuasei, leai ni maa e faailoga ai, e leai foi ni faasino auala.”²⁴

Na tusia foi e C. S. Lewis: “O le manatu sese o loo i ai nei e faapea, e le iloa e tagata lelei le uiga o le faaosoosoga. O se matuai pepelo lava. E na o i latou o e taumafai e tetee atu i faaosoosoga e iloa lona malosi… . E te iloa le malosi o se matagi i le taumafai e savali agai atu i ai, ae le o le taoto i lalo.”²⁵

Na faamatala mai e le Perofeta o Iosefa Samita mai ona lava aafiaga, “O le latalata atu o se tasi i le Alii, o le a sili atu ai foi se mana e faaaoga e le fili e taofia ai le ausiaina o Ona faamoemoega.”²⁶

O Lo Tatou Puipuiga: Tumau Mausali

Ae ui i lea, e le tatau ona taofia i tatou e le fefe i le mana o Satani. E le mafai ona i ai sona mana ia i tatou vagana tatou te faatagaina o ia. O ia lava o se tagata palaai, ma afai tatou te tumau mausali, o le a solomuli o ia. Na fautua mai le Aposetolo o Iakopo: “O le mea lea ia outou gauai ai i le Atua. Ia outou tetee atu i le tiapolo, ona sola ese ai lea o ia ia te outou.”²⁷ E le mafai ona ia iloa o tatou mafaufauga vagana ua tatou tautatala ai. Ma na fai mai Nifae, o le tiapolo “e leai sana pule i loto” o tagata amiotonu.²⁸ Ua tatou faalogo i tagata fai faaluma ma isi i lo latou ta’uamiotonuina pe faamalamalama o latou sese i le faapea mai, “O le tiapolo na mafua ai ona ou faia.” Ou te le manatu lava e mafai e le tiapolo ona faamalosi i tatou e faia se mea. E moni e mafai ona ia faaoso ma faasese, ae leai sana pule ia i tatou seiloga tatou te tuuina atu ia te ia [le pule].

O le mana e tetee atu ai Satani atonu e malosi atu nai lo lo tatou iloa. Na aoao mai le Perofeta o Iosefa Samita: “O tagata uma ua i ai o latou tino [faaletino], e i ai la latou pule ia i latou e leai ni tino. E leai se pule a le tiapolo ia i tatou vagana ua tatou faatagaina o ia. O le taimi lava tatou te tetee ai i se mea mai le Atua, ua i ai foi ma le mana o le tiapolo.”²⁹

Na ia taua foi, “O agaga leaga e i ai o latou noataga, tapulaa, ma tulafono e pulea ai i latou.”³⁰ O lea la, o Satani ma ana au e le o ia i latou le mana uma. O se tasi o auala a Satani o le tauanau lea o se tagata ua solitulafono ia manatu e leai se faamoemoe mo se faamagaloga o ana agasala. Ae o loo i ai pea le faamoemoe. O le tele o agasala, po o le a lava le matuia, e mafai ona salamo mai ai pe afai e faamaoni le manao i ai.

Malamalama i le Tiapolo

Ua tele le faamanuiaina o Satani i lenei tupulaga faaseegofie. O le taunuuga la, ua latou faasalaina ai ma ana au le toatele o tagata. Peitai, o loo i ai se talita malosi e tetee atu ai i le mana o Lusifelo ma ana au. O lenei puipuiga e maua i le agaga o le malamalama e ala i le meaalofa o le Agaga Paia. O lenei meaalofa e oo mai i taimi uma e ala i faaaliga patino, ia i latou o e taumafai e usitai i poloaiga a le Alii ma mulimuli i fautuaga a perofeta soifua.

O lenei faaaliga patino, e mautinoa lava le oo mai ia i latou uma o e manatu tasi i le mamalu o le Atua, aua ua folafola mai, o o latou tino o le a “faatumuina i le malamalama, ma o le a leai se pogisa” ia te i latou.³¹ O i latou uma o e o mai ia Keriso i le usiusitai i feagaiga ma sauniga o le talalelei, e mafai ona latou taofia taumafaiga a Satani. O soo lotomaulalo o le Matai paia e le tatau ona faaseseina e le tiapolo, pe afai o le a latou faamaoni ma amiotonu i o latou uso a tagata, o atu i le maota o le Alii, aai ma feinu ma le tatau i le faamanatuga, tausia le Aso Sapati, totogi a latou sefuluai ma taulaga, tatalo ma le loto faamaoni, auai i le galuega a le Alii, ma mulimuli i o latou taitai.

O loo i ai ni malosiaga o le a laveaiina i tatou mai le pepelo ua matua faateleina pea, o le le mautonu, vevesi, faalavelave, faatama’iga, faanoanoa, ma le taufaasese ua i ai nei i le lalolagi. O na malosiaga laveai, o mataupu faavae e faavavau, feagaiga, ma sauniga o le talalelei e faavavau a le Alii o Iesu Keriso. O nei lava foi mataupu faavae, feagaiga ma sauniga, e vaavaalua ma aia tatau ma mana o le perisitua a le Atua Silisili Ese. O i tatou o tagata o lenei Ekalesia, ua tatou umia ma o i tatou foi e puipuia nei mana faatonutonu, lea e mafai ona taofia ai le tele o le mana o Satani i le lalolagi. Ua tatou talitonu ua tatou umia nei mana malolosi mo le manuia o i latou uma ua maliliu, mo i latou uma foi o ola nei, ma i latou e le’i fananau mai.

Ou te tatalo, ia avea le talaiina o le amiotonu, ma mea e mafai ai ona taofia lima tiapolo o le faaoosala, ina ia le faatagaina o ia e faamalaia le lalolagi atoa. Ou te tatalo ina ia faamagalo e le Atua o tatou le atoatoa, o o tatou vaivaiga, ma le tele o a tatou agasala, ma faamagalo i tatou i o tatou sese. Tau ina ia foai mai e Ia le malologa i e o mafatia, faamafanafanaga ia i latou o e faanoanoa, ma le toafilemu i e lotomomomo.

Manatu mo faiaoga o aiga

A uma ona e suesue ma le agaga tatalo i lenei savali, ona fetufaai atu lea e faaaoga ai se metotia faafaiaoga e uunaia ai le auai o tagata o loo e aoaoina. O ni nai faataitaiga nei:

Fai atu i tagata o le aiga e manatu faapea o la e saofafai faataamilo i se afi. Talanoa e uiga i le matautia o le taalo i le afi. E faapefea ona pei lenei mea o le “tosina atu ia Satani ma ana mea lilo”? Ia faasoa atu nisi o faataitaiga a Peresitene Faust i auala e mafai ai ona tatou faatoilaloina ia taufaasese a Satani. Lu’i le aiga ina ia avea ma ni faataitaiga amiotonu i le talepeina o ana fuafuaga.
Aumai se tamai taavale meataalo, o se ata o se taavale, pe faasino le aiga i se taavale o lata ane. O le a se mea e tupu pe afai e ave e se tagata le taavale ae leaga taofi? Ia faatatau atu i le faataitaiga a Peresitene Faust i taofi o loo i totonu o i tatou. Molimau atu i le taua o le faamalosia o lo tatou mataalia i le Agaga Paia ma le faalogo atu i le leo malu ma le itiiti e faafetauia ai le tiapolo.
Faaaoga le tala e tusi ai i lalo nisi o auala a Satani ma nisi o auupega faaleagaga o loo ia i tatou e tau ai ma Satani. Talanoa ma tagata o le aiga e uiga i auala a le tiapolo, ma ta’u atu i ai o loo ia i tatou le mana e faatoilalo ai o ia. Molimau atu o le ola amiotonu e mafai ona faatoilalo ai Satani.