Te mana patururaa o te faaroo i roto i te mau taime no te papu ore e te tamataraa
Te faaroo i te Atua e i roto i Taʼna arataʻiraa na roto i te Varua Maitai, ia outou i roto i teie ao aehuehu e te tamataraa.
O vai te ore e hinaaro i te haapapuraa i roto i te mau taime no te papu ore e no te hiʻoporaa ? O vai tei papu maitai e aita roa te hoê mana aueue ore e hinaarohia i roto i te oraraa ? Te niu tinana o te oraraa i te ao nei o te tupuraa ïa o te taata e toʼna upootiʻaraa. No reira, te vaira te taime no te tamataraa e te feaa no te horoʻaraa i te raveʻa i taua tupuraa ra. O vai ïa tamarii o te ore e faatupu i te paari no te patururaa iaʼna iho i te mau faahaparaa tei faaotihia e te mau metua ? Oia atoa e to tatou Metua i te Ao ra. Ua faatupu Oia i Taʼna faanahoraa no te oaoa ia tamatahia tatou, noaʼtu te mau fifi, ia ravehia râ te mau faaotiraa faufaa rahi ia nehenehe tatou ia tupu, ia paari, e ia manuïa i roto i te tamataraa o te pae tino nei.1 Auaa râ, i roto i Toʼna here rahi, ua horoʻa mai Oia i te hoê raveʻa ia tatou no te tatara i taua mau tamataraa ra a tupu noaʼi ma te itoito e te paari. Te parau nei au no te mana o te patururaa o te faaroo i roto i te mau taime no te papu ore e no te hiʻoporaa ?
Ua horoʻa mai te Atua i te ite ia tatou no te faaohipa i te faaroo ia roaa ia tatou te hau, te oaoa, e te tumu o te oraraa. Tera râ, no te faaohiparaa i teie mana, e mea tiʻa ia itehia te faaroo i te hoê mea. Aitaʼtu e niu pautuutu atu i te faaroo i roto i te here o te Metua i te Ao ra no outou, faaroo i roto i Taʼna faanahoraa no te oaoa e faaroo i roto i te paari e te hinaaro ia Iesu Mesia no te faaoti i te mau meaʼtoa o Taʼna i fafau mai.
Ia ore vetahi i maramarama i te faaroo e eitaʼtoa ïa e nehenehe ia faaohipa iaʼna i roto i toʼna îraa. E manaʻo vetahi e te aparauraa no niʻa i te haapaʻoraa e te arataʻiraa o ta te hoê e farii na roto i te faaroo aueue ore, e ere ïa te manaʻo taata noa. Tera râ, e ere te faaroo i te hoê parau faaau e aore râ, e peu tahutahu, e mana râ i niuhia i niʻa i te mau parau tumu mure ore. Ua faaohipa aʻe nei outou i te faaroo e ua manaʻo e aita outou i farii i te pahono ? Mai te mea e ua tupu te reira, aita ïa outou i maramarama e aita hoʻi i apee i te mau parau tumu i niuhiaʼi te faaroo. Na teie hiʻoraa e tatara i te auraa o taʻu parau.
Tau matahiti i mairi aʻe nei, ua haere atu vau i roto i te hoê faanahoraa no te faito i te huru o te mau tuhaa o te atomi. E ravehia tei tamatamataraa atomi i niʻa i te hoê matini tutuha auahi no te horoʻaraa i te puai teitei o te ito. E faahaerehia teie mau mea rii tumu i roto i te mau piha tei vehehia e i reira e hiʻopahiaʼi to ratou hopearaa. Eita e itehiaʼtu te puai teitei o te ito, tera râ, e mea tiʻa ia haapaʻo maitai ratou no te arairaa ia ore te fifi ia tupu i niʻa i te taata. I te hoê mahana, ua tomo mai te taata tiaʻi i te vahi tamatamataraa. Ma te manuanu parau mai nei, « E mau taata haavare anaʻe outou, faahua i te rave i te hoê ohipa faufaa, eita râ vau i te maamaa. Ia ore outou e ite, e faaroo, e tamata, e hauʻa, e aore râ, e fafa, eita ïa e vai ». Na taua huru ra i faataupupu i taua haapiiraa ra oia hoʻi, te vai nei te faufaa o te ore e itehia e teie na tumu ite e pae nei. Ua hinaaro anei teie taata i te tatara i toʼna feruriraa ia maramarama e mea nahea teie mau mea rii tumu o te atomi e iteahiaʼi , e nehenehe ïa oia e faaite papu i to ratou vairaa. Oiaʼtoa te vairaa o te faaroo eiaha roa e feaa. E farii outou i te mau haamaitairaa no to outou faaroo a pee ai outou i te mau parau tumu o ta te Atua i haamau ia faaohipahia.
Teie te tahi o taua mau parau tumu ra :
-
A tiʻaturi i te Atua e i Toʼna mau hinaaro no te horoʻaraa i te tauturu ia hinaarohia mai, noaʼtu eaha te huru o te mau tamataraa.
-
A haapaʻo i Taʼna mau faaueraa e ia ora i te reira no te faaite i te Fatu e e nehenehe Oia e tiʻaturi ia outou.
-
A faaroo i te omumu a te Varua.
-
A faaohipa itoito no taua omumu ra.
-
A faaoromaʻi e ia maramarama e, ia vaiiho anaʻe te Atua ia outou ia aro ia tupu outou i te rahi, ei reira te pahonoraa e tae mai ai maa vahiti e maa vahiti no te hoê taime roa.
Te faaroo e e ohipa, ua haamauhia ïa i niʻa i te tiʻaturiraa i te Fatu e i niʻa i Toʼna hinaaro no te pahono i te mea o ta outou e titau ra. Na « te Fatu… e haamaitai e e faarahi i teie tiʻaturi iaʼna ra ».2 Na te hiaai no te faaohipa i te faaroo e faarahi i to outou ite papu e te paari no te faaohiparaa i te mana o te faaroo.
E nehenehe outou e haapii nahea ia faaohipa i te faaroo ma te puai na roto i te faaohiparaa i teie parau tumu i haapiihia e Moroni : « O te faaroo nei, o te tiʻaturi ïa i te mau mea aore i hiʻohia ; no reira, eiaha outou e marô i te mea aore i hiʻohia e outou ; e ore hoʻi outou e tae i te ite e ia oti te tamataraa i to outou faaroo ».3 No reira, i te mau taime a tamataʻi outou i to outou faaroo, a rave ma te tiʻamâ no te hoê faahoruhoruraa, e farii outou i te haapapuraa a te Varua. E haapuai taua mau manaʻo ra i to outou faaroo. E ia rave faahou outou i taua hohoʻa ra, e puai atu â to outou faaroo. Ua ite te Fatu i to outou mau hinaaro. Ia ani outou ma te parau-tiʻa e te hinaaro mau, e faaite Oia ia outou i te mea e rave o te faarahi i to outou paari ia rave na roto i te faaroo. Ia faaohipahia te faaroo ma te paari e riro te faaroo i te aereere, i te puai, i te itoito, mai te hoê puai faaurûhia i roto i to outou oraraa. A tere ai outou i ô atu i te otiʻa o to outou maramarama i roto i te papu ore, ma te faaohipa i te faaroo, e arataʻihia outou a imi ai outou i te mau faaotiraa te ore e roaa ahiri e aita e faaroo. Te faaite papu nei au e, e parau mau te reira.
Noaʼtu e e faaohipa puai outou i te faaroo, eita râ te Atua e haamauruuru tauʻe mai ia outou ia au i to outou mau hinaaro. Tera râ, e horoʻa mai râ te Atua i te mea maitai na outou ia au i Taʼna faanahoraa mure ore. Ua here Oia ia outou i te hoê here rahi e te hope roa, eita e tiʻa ia outou ia feruri i roto i to outou huru tahuti nei. Ahiri outou i ite papu i Taʼna faanahoraa, eita roa ïa outou e ani i te mea ê atu noaʼtu e te faahepohia maira outou ia na reira. E horoʻa te faaroo haavare ore i te maramarama e te puai no te farii i te hinaaro o to tatou Metua i te Ao ra noaʼtu e e mea taaê Taʼna faanahoraa i ta outou. E farii tatou i Toʼna hinaaro ma te hau e ma te papu, ma te ite e ua hau aʻe Toʼna paari mana hope i to outou iho paari no te iteraa i Taʼna faanahoraa ia au i tei heheuhia mai te hoê tuhaa iti i te taime hoê.
E ere te faaroo i te taumi-noa-raa i te hoê pitopito e ua roaa te pahonoraa. Ua faaite te Fatu, « O taʻu e here ra, o taʻu ïa e aʻo, e e papaʻi hoʻi : e tena na, a faitoito, e e tatarahapa ».4 Ua ite Brigham Young, « Aita roa te Atua e horoʻa na Toʼna feia, e aore râ, na te hoê taata, te mau haamaitairaa teitei ma te horoʻa-ore mai i te mau ati no te tamata mai ia ratou ».5 Iaʻu iho nei, no te tahi mau opuaraa puai, ua farii au i te rohirohi, i te horuhoru, i te tutavaraa tei tae mai hou aʻe te hoê pahonoraa papu. Tera râ, ua patu teie mau iteraa rau ia tatou. E tamaru te iteraa e na roto i Taʼna tauturu, eita te Atua e vaiiho ia outou ia faahemahia hau atu i to outou puai.
E faaohipa te Atua i to outou faaroo no te hamani i to outou huru. To outou huru e faaiteraa ïa e riro outou mai te aha. E faaite to outou huru mau na roto i te mau maitiraa tano i roto i te mau ati e te tamataraa o te oraraa. E arataʻi to outou faaroo ia outou i taua mau maitiraa tano ra. E mea papu roa, te mea o ta outou e rave e o ta outou e feruri ra o te mea ïa e faataa i to outou huru e e riro outou mai te aha. No reira te mau maitiraa o ta outou e rave e mea tiʻa ïa ia faaurûhia e te Fatu. E nehenehe te tahi atu mau taata e faaitoito mai ia outou ia rave i te faaotiraa tiʻa, eiaha râ taua mau faaotiraa ra ia faahepohia mai e ratou. E mea tiʻa ia feruri, ia pure, e ia faaohipa i to outou faaroo ma te hinaaro i te rave i te mau maitiraa ia au i te mau haapiiraa a te Fatu. E rave outou i teie mau maitiraa na roto i te tiʻaturi ia au i te faaroo o ta outou i tuu i roto, e mai te mea e faaohipa maitai outou ia au i taua faaroo ra, e haapapuhia mai ïa e, e mea tiʻa.
E patu te faaroo i te puai o te huru e roaa ia outou i te mau taime o te hinaaro rû. Eita taua huru ra e roaa i roto i te mau taime o te mau tamataraa e aore râ, faahemaraa rahi. Ia faaohipahia râ. E tupu te huru o te hoê taata na roto i te haapaʻoraa e rave rahi matahiti i te mau parau tumu e te mau parau haapiiraa mai te hoê ahu te huru tei hamanihia e rave rahi mau taura e mau û taaê. I roto i te Iakobo e taiʻo tatou : « Na taua tamataraa i to outou faaroo ra e faatupu i te faaoromaʻi tamau. E tuu atu hoʻi i ta te faaoromaʻi tamau ra ohipa ia tiʻa roa, ia maitai roa outou eiaha ei hapa, eiaha ei mea toe ».6 Te niu o te huru, o te parau-tiʻa ïa. Na te huru tiʻamâ e haapuai i to outou paari no te pahono ma te haapaʻo i te arataʻiraa a te Varua. Te huru parau-tiʻa o te mea ïa e faariro ia outou arau aʻe. E mea faufaa aʻe te huru parau-tiʻa i te hoê mea noaʼtu o ta outou e hoo mai i roto i teie oraraa, ua hau atu i te ite e aore râ, i te hoê manuïaraa i te mau mea o te ao nei. Na te reira outou e tiʻaturihia mai ai. E patu te huru parau-tiʻa i te niu o te puai pae varua. Na te reira e faatiʻa ia outou i roto i te mau taime no te ati e no te tamataraa ia rave i te mau faaotiraa rahi, te mau faaotiraa faufaa roa e te tano, noaʼtu te faaheporaa. Te faaite papu nei au, eita Satane e te tahi atu mau puai e haaparuparu e aore râ, e haamou i to outou huru. Na outou iho râ e haamou i to outou huru na roto i te haapaʻo-ore-raa.
E faanahoraa maere mau ta to tatou Metua. Na ta outou faaohiparaa i te faaroo e patu i te huru o te taata. E faarahihia te huru o te taata i apitihia i to outou paari no te faaohiparaa i te faaroo. I reira to outou tiʻaturiraa e upootiʻaʼi i te mau haavaraa o te oraraa e e maitai-roaʼtu ai. E tamau â ïa te tamino no te haapuairaa i te haere i mua, ma te haapuai i to outou faaroo a patu ai outou i to outou huru.
E parau mau ïa te parau « E rahi to outou huru mai te mea e tuu outou i te mea rahi atu i roto », oiaʼtoa te mau haamauruururaa pae varua. E roaa ia outou te mea o ta outou e aufau atu na roto i te haapaʻo, na roto i te faaroo ia Iesu Mesia, na roto i te faaohipa haehaaraa i te parau mau o ta outou i haapii. Te hopea o taua mau mea ra, o te hamaniraa ïa o to outou huru, na roto i te tupuraa o te paari, e te rave faaotiraa i ta outou opuaraa i niʻa i te fenua nei – e tupu mau ïa na roto i te tamataraa.
Noaʼtu eaha te tupu mai, noaʼtu eaha te mau huananeraa e tupu i roto i te ao nei, e nehenehe outou e farii i te patururaa mana o te faaroo. Eita roa te reira e taui. Eita roa te here faito ore o te Metua i te Ao ra e taui. Na Taʼna evanelia e horoʻa mai i te haapapuraa e e horoʻa mai i to outou oaoa. E ere Taʼna faanahoraa no te tamata noa ia outou i niʻa i te fenua nei, e farii atoa râ outou i te tupuraa na roto i te raveraa i te mau opuaraa tano, faaurûhia e te faaroo, turuhia e to outou haapaʻo.
No te aha e haapeʻapeʻaʼi i te mau ati o muri nei e aore râ, i te mau papu-ore-raa o te ore e tiʻa ia outou ia haapaʻo. Na to outou râ parau-tiʻa e faarahi i te manuïaraa ia ore roa outou e oto. E tae mai taua mau tamataraa ra, na to outou faaroo râ e arataʻi ia outou ia rave i te mau faaotiraa. Te hau i roto i to outou feruriraa, te papuraa ia pahono i te mau fifi teimaha, to outou râ oaoa hopea, tei to outou noa ïa tiʻaturiraa i to tatou Metua i te Ao ra e i Taʼna Tamaiti, o Iesu Mesia. E faufaa morare hau aʻe te parau-tiʻa. E horoʻa te reira i te mau haamaitairaa na roto i to outou faaroo e i te haapaʻoraa i te mau faaueraa a te Atua. A haamanaʻo te vai nei te puna no te hau e te au maitai no outou. E mea papu maitai e ua here to outou Metua i te Ao ra ia outou noaʼtu eaha te tupu mai, noaʼtu te huru no te mau ati, te faahemaraa e aore râ, te mau peʻapeʻa o ta outou e farii. Eita râ te haapapuraa e taui. Te paari o ta outou e farii, tei te huru ïa o te puai o to outou faaroo i roto Iaʼna e i Toʼna hinaaro i te haamaitai mai ia outou.
Te faaite papu nei au e paturu te faaroo i te Atua e i roto i Taʼna arataʻiraa na roto i te Varua Maitai, ia outou i roto i teie ao aehuehu e te tamataraa. Te faaite papu nei au na roto i te faaohiparaa i teie mau parau tumu o ta tatou i farii e tauturu te reira ia outou ia tiʻamâ noa i te mana o te faaroo no te patururaa i roto i te mau taime no te papu ore e te tamataraa.
E rave rahi feia e haaati nei ia outou o te taa-ore nei e o te imi nei i te raveʻa no te mau fifi taa- ore. A faaite atu ia ratou i to outou iteraa papu no te parau-mau e no te mana o te faaroo A tauturu outou ia ratou ia maramarama e nahea te faaroo i te Atua e i Taʼna mau haapiiraa, tei faahoʻihia mai i roto i to ratou îraa i roto i Te Ekalesia a Iesu Mesia i te Feia Moʻa i te Mau Mahana Hopea Nei, i nehenehe ai i te haamaitai i roto i to ratou oraraa i teie nei, i roto i teie tau arepurepu. Faaite i te mana o te Fatu no te haamaitai i to ratou oraraa. A rave i te reira i teie nei. E tauturu mai te Fatu ia outou. Na to outou faaroo e arataʻi e e paturu ia outou. Ua ite au e, e tupu mau te reira. Na roto i te iʻoa o Iesu Mesia, amene.