Te faaineineraa no te ohipa misionare
E mea faufaa roa ia rave apipiti te mau metua tane e te mau tamaroa i te mau mea tumu no te faaineineraa no te hoê misioni.
I roto i te hoê amuiraa tĭtĭ i tupu iho nei, ua paraparau te hoê taeaʻe tei oti taʼna misioni no niʻa i te faaineineraa no te taviniraa ei misionare. Ua rave oia i te hohoʻa o te hoê metua tane o tei parau i taʼna tamaiti : « E oaoa roa vau ia hamata oe i te hauti taora popo i roto i te ‘ete e nehenehe ïa oe e haapii nahea ia faahoro e ia taora i te popo i roto i te ‘ete. » Ua faaau oia i te reira hohoʻa i te hoê metua tane o tei parau i taʼna tamaiti : « E oaoa roa vau mai te mea e haere oe i ta oe misioni ia nehenehe oe ia haapii e ia riro ei taata maitai no te haapii i te evanelia. » Ua haaputapu teie faahohoʻaraa iaʻu a feruri noa ai a i toʻu oraraa.
I toʻu apîraa, ua riro te taoraraa popo i roto i te ‘ete ei hiaai rahi noʻu. Inaha râ, ua tiʻa-roa te hinaaro o toʻu metua tane. E haapiipii maua toʻu papa e rave rahi hora i te taora e i te faahoro i te popo i roto i to matou fare tamaaraa. E faaroo vau i te mau tuʻaro o te fare haapiiraa tuarua i niʻa i te ratio ma te moemoe â e, ia tae i te hoê mahana, e riro vau ei maʻona no teie tuʻaro. Aita roa te manaʻo no te rave i te hoê misioni i tae i roto i toʻu feruriraa ; aita reʻa e taime i fataahia no te faaineineraa misioni. A tamataʼi au i te haamau i te faito no te tahi atu mau ohiparaa i roto i toʻu oraraa, ua piihia toʻu Papa – o tei ore na i farii i te hoê piiraa i roto i te Ekalesia no na matahiti e rave rahi – ei taata faatere i roto i te ohipa Scout. Ua faatere oia na roto i te faaturaraa i te mau ture atoa, e na roto i toʼna itoito, ua roaa i toʻu mau hoa e iaʻu nei te tiʻaraa teitei roa i roto i te Scout oia hoʻi Aigle Scout. Ua ite mau vau i teie nei e ohipa rahi te faaineineraa no te hoê misioni.
Tupu mau atura te moemoea o toʻu apîraa i toʻu ôraa i roto i te pŭpŭ taoraraa popo i roto i te ‘ete no Utah State University. I roto i te pitiraa o te matahiti i te Fare Haapiiraa Tuatoru, ua matau vau i te hoê taureʻareʻa tei rave na i taʼna tau misioni. Na roto i toʼna hiʻoraa maitai ua haamata vau i te hiʻopoʻa i toʻu mau hoa i te fare haapiiraa, oiaʼtoa to roto i te pŭpŭ taoraraa popo, e inaha te mau taata atoa o taʻu i hinaaro ia riro mai ia ratou atoa te huru e mau taata ïa o tei rave i ta ratou tau misioni. Na roto i te arataʻiraa maitai e te here o toʻu mau hoa – e, ua papu roa iaʻu e, na roto atoa i te mau pure e te hiʻoraa maitai o toʻu metua vahine – i taui ai toʻu mau hiaai. E piti matahiti i muri mai i taʻu tau haapiiraa i Utah State, ua piihia vau ia tavini i roto i te misioni apatoa no Canada.
Toru avaʻe i muri mai, ua faataahia te hoê misionare apî no Idaho mai ei hoa noʻu. Tau-mahana – rii-noa i muri mai, ua ite au i te hoê mea faufaa roa : ua papu maitai toʻu hoa i te evanelia, area vau nei, ua haapii noa ia vau i te mau aparauraa misionare. Feruri ihora vau e ahiri au i faaineine iaʻu ia riro ei misionare maitai i te faaineine-noa-raa ia riro ei maʻona no te taora popo. Area toʻu hoa ra, ua faaineine maitai ïa oia no taʼna misioni i te roaraa o toʼna oraraa e ua riro ei melo faahiahia mau no te pŭpŭ. E mea faufaa roa ia rave apipiti te mau metua tane e te mau tamaroa i te mau mea tumu no te faaineineraa no te hoê misioni.
Te tiʻaturi nei au e ua tano te faaauraa o teie tuʻaro taora popo i roto i te ‘ete i te ohipa misionare. E ere teie tuʻaro no te aro-noa-raa i te tahi pŭpŭ taoraraa popo i niʻa i te tahua, no te mau horaʼtoa râ o te haapiipiiraa e te faaohiparaa. Te ohipa rahi no te faaoraraa i te mau varua, aita ïa i taotiʻahia no na matahiti e piti noa no te tavini i roto i te misioni, e titau mai râ te reira e rave rahi matahiti i te ora-tiʻamâraa e te faaineineraa ia paari i te mau faatureraa no te tavini ei misionare- rave-tamau.
I te 11 no tenuare 2003, ei tuhaa no te haapurororaa no te haapiipiiraa arataʻiraa na te feia faatere, ua haapii te Peresidini Gordon B. Hinckley i te feia faatere o te autahuʻaraa no niʻa i te ohipa misionare. Ua haaferuri taʼna mau parau ia matou i te huru no ta matou pororaa evanelia. Ua parau te peresideni Hinckley : « Ua tae mai te taime e faaʻetaʻetahiaʼi te mau ture no te tiʻamâraa no te feia o te piihia ia tavini ei mau tiʻatiʻaveʻa no te Fatu o Iesu Mesia i te ao nei » (« Missionary Service », Haapiipiiraa matamua na te feia faatere o te Ao nei, tenuare 2003, 17).
E piti huru faaʻetaʻetaraa i te mau ture no te ohipa misionare e tiʻa ia feruri-maitai-hia. A tahi, o te faaineine oioi-roa-raa i te feia apî tamaroa e tamahine. I roto i ta ratou rata no te faaôraa i te tahi mau tauiraa i roto i te mau tabula ohipa a te Feia Apî Tamaroa e te Feia Apî Tamahine teie te parau a te peresideniraa Matamua : « Ia haa te feia apî i roto i teie mau fâ, e faarahi ïa ratou i te mau aravihi e te mau peu o te arataʻi ia ratou i te hiero e i te faaineineraa ia ratou no te hoê oraraa tavini i to ratou mau utuafare e i te Fatu » (rata na te peresideniraa Matamua, 28 no setepa 2001). A faaroo maitai mai nâ i ta ratou mau parau : « a faarahi i te mau aravihi e i te mau peu ». Ei mau metua e ei feia faatere no te feia apî, e tauturu tatou i to tatou feia apî ia imi i teie mau aravihi e i teie mau peu.
Te piti ra, o te faaafaroraa ïa i te tiʻamâraa o te taata iho, o te roaa na roto i te haapaʻoraa i te mau ture a te Atua. Ua manaʻo vetahi o te feia apî tamaroa e ofati ratou i te mau ture, e a faaî ai i mua i to ratou mau episekopo hoê matahiti hou te misioni, ua tiʻamâ ïa ratou no te tavini. E faaroo pinepine tatou i teie uiraa na te hoê o tei ofati i te ture : « Ehea maororaa vau ia tiaʻi hou vau a haere atu ai i taʻu misioni ? » A feruri e ere te tatarahaparaa i te hoê taime tiaʻiraa. Ua parau te Faaora : « E pûpû mai outou i te aau tatarahapa e te varua mărû iaʻu ei mono i te reira. E o te haere mai iaʻu ma te aau tae e te varua mărû ra, o taʻu ïa e bapetizo i te auahi e te Varua Maitai » (3 Nephi 9:20).
Teie te taime no te tatarahaparaa e i te ohiparaa ia roaa te faaoreraa hapa, teie ta te peresideni Hinckley i parau : « Eita e nehenehe ia tatou ia faatiʻa i te mau misionare tiʻamâ-ore ia haere i roto i te ao no te faaite i te parau-oaoa o te evanelia » (Haapiipiiraa matamua na te feia faatere o te Ao nei, tenuare 2003, 17). Ua maramarama tatou i teie nei na roto i te parau a te peresideniraa Matamua, te vaira te mau hara o te vaiiho roa i te feia apî tamaroa e vahine i te ohipa misionare (a hiʻo i te « Faataaraa parau no niʻa i te ohipa misionare no ô mai i te peresideniraa Matamua e te Pŭpŭ no teTino Ahuru ma Piti Aposetolo », 11 no titema 2002).
Ua parau te peresideni James E. Faust : « Te vai nei te tahi mau faaetaʻeta i roto i te oraraa nei. Te vaira te tahi mau mea o te ore-roa e tiʻa ia ravehia, te tahi mau eʻa o te ore-roa e tiʻa ia haerehia, te mau euheraa o te ore-roa e tiʻa ia haapararihia, te mau parau o te ore-roa e tiʻa ia parauhia, e te mau manaʻo o te ore-roa e tiʻa ia faaamuʻamuhia » (« Integrity, the Mother of Many Virtues », Ensign, me 1982, 48).
Ua faaʻetaʻetahia te mau ture no te tiʻamâraa no te ohipa misionare. « Te feia atoa aita e fanaʻo i te mau titauraa i te pae tino, i te pae no te feruriraa, e i te pae aehuehu, no te ohipa misionare-rave- tamau, e haamauruuruhia ïa ma te tura. E nehenehe ratou ia piihia i roto i te tahi mau piiraa ia au i to ratou ite » (« Faataaraa parau no niʻa i te ohipa misionare no ô mai i te peresideniraa Matamua e te Pŭpŭ no te Tino Ahuru ma Piti Aposetolo », 11 no titema 2002). Te tiʻaturi nei matou e, na roto i te peeraa i te mau arataʻiraa i faaitehia e te peresideniraa Matamua, e rahi mai te mau misionare rave-tamau tiʻamâ e tei ineine no te taviniraa.
I roto i te mau tuʻaroraa, rave rahi mau maʻona numera hoê o ta tatou e popou nei, e e tamata ïa tatou i te faarahi i to tatou mau aravihi ia riro mai ia ratou te huru. I roto i to tatou oraraa i te pae varua, e rave rahi atoa ta tatou mau hiʻoraa ia pee, tei hau aʻe râ, o to tatou ïa Fatu e Faaora o Iesu Mesia, o tei pahono i te uiraa a Toma, « Eaha hoʻi matou e ite ai i te eʻa ? » (Ioane 14:5).
Ua papaʻihia i roto i te mau papaʻiraa moʻa : « Ua parau atura Iesu iaʼna, O vau te eʻa…» (Ioane 14:6). I roto i te 2 Nephi, e taiʻo tatou : « A pee mai na outou iaʻu nei. E tena na, e au mau taeaʻe here e tiʻa anei ia tatou ia pee atu ia Iesu ra, ia ore tatou e hinaaro maite i te haapaʻo i te mau faaue a te Metua ra ? » (2 Nephi 31:10).
E toʻu mau hoa feia apî e, e rave rahi o te pee nei i te « eʻa » o te Faaora, o ta outou e imi nei ia riro ei hiʻoraa no outou a faaineine ai outou no te ohipa misionare. E ite outou ia ratou i rotopu i to outou mau fetii, to outou mau hoa, e to outou feia faatere o te Ekalesia. E teie mahana, ua faariro vau i toʻu mau hoa ei hoê o toʻu mau haamaitairaa rahi atu o tei imi i te hiʻoraa maitai na roto i te peeraa i te Faaora.
Te pure nei au ia papu te feia apî tamaroa i roto i to ratou mau hiaai parau- tiʻa, ia manuïa outou i roto i te mau meaʼtoa o ta outou e rave, e ia riro outou ia au i ta elder M. Russell Ballard i parau, « te uʻi faahiahia roa aʻe o te mau misionare i roto i te aamu o te Ekalesia » (« Te uʻi faahiahia roa aʻe o te mau misionare », Liahona, novema 2002, 47).
Te faaite papu nei au, mai ta te peresideni Hinckley i parau aʻe nei no te ohipa misionare, e « aita e ohipa rahi atu. Aita e ohipa faufaa atu » (Haapiipiiraa matamua na te feia faatere o te Ao nei, tenuare 2003, 21). Na roto i te iʻoa o Iesu Mesia, amene.