Haavare ore
Ei feia haavare ore outou i te mau mea maitai roa i roto ia outou. A haapaʻo maitai i ta outou mau fafauraa tei taatihia i niʻa i te autahuʻaraa o te Atua.
Aita e putuputuraa ê atu i te ao atoa nei e tiʻa ia faaauhia i teie putuputuraa. Noaʼtu tei teihea vahi tatou, noaʼtu eaha te reo ta tatou e paraparau nei, e mau taata anaʻe tatou tei tuuhia te rima i niʻa i to tatou upoo no te farii i te autahuʻaraa o te Atua. Noaʼtu e tamaiti iti tatou tei farii i te autahuʻaraa iti, e aore râ, te autahuʻaraa a Aarona, e aore râ, e taata paari tei farii i te Autahuʻaraa teitei aʻe, e aore râ, te Autahuʻaraa a Melehizedeka, ua horoʻahia ia tatou paatoa nei te hoê mea faahiahia roa e te nehenehe, te hoê mea faufaa no te Atuaraa.
Te parau faahou atu nei au e, aita e haaputuputuraa i te ao atoa nei mai teie te huru. Te putuputu nei tatou na roto i te autaeaʻeraa, i roto i te hoê amuiraa taata tei farii i te hoê puai, e aore râ, te hoê mana, tei farii i te haamaitairaa no te parau e no te rave i te ohipa i roto i te iʻoa o te Manahope. Ua feruri te Fatu te Atua o te raʻi ra e, e mea tiʻa ia tuu mai i niʻa ia tatou, te hoê mea tei mauhia e aʼna anaʻe ra. I te tahi taime, te uiui nei te manaʻo e, ua tiʻamâ anei tatou no te farii i te reira. Te uiui nei te manaʻo e, te farii maitai anei tatou i te reira. Te faahiahia nei au i te huru mure ore o taua puai ra e taua mana ra. Tei roto i te reira te parau no te ora e no te pohe, te utuafare e te Ekalesia, te natura rahi e te teitei o te Atua e Taʼna ohipa mure ore.
E te huitaeaʻe e, te faatae atu nei au i te aroha ia outou te mau melo no te mau pŭpŭ o te autahuʻaraa moʻa. Te faatae atu nei au i te aroha ia outou e te mau tavini no te Atua ora tei tuu mai i niʻa ia tatou tataʻitahi i te hoê hopoiʻa o te ore roa e tiʻa ia tatou ia faaruʻe.
Ei tuatiraa i teie aroharaa, ua faaoti au ia paraparau i te mau auraa rau o te hoê parau. Taua parau ra, o te haavare ore ïa.
Te feruri nei au i te parau no te haavare ore ia tatou iho. Te feruri nei au i te parau no te haapaʻo- maitai-roa i to tatou hoa faaipoipo maitihia. Te feruri nei au i te parau no te haavare ore i te Ekalesia e i te mau huru e rave rahi o te mau ohipa i roto i te Ekalesia. Te feruri nei au i te parau no te haavare ore i te Atua o te raʻi ra, to tatou Metua Mure ore, e Taʼna Tamaiti Here, to tatou Faaora, te Fatu ra o Iesu Mesia.
Ei feia haavare ore tatou i te maitai rahi e vai ra i roto ia tatou. E mau tamaiti anaʻe tatou na te Atua tei farii i te haamaitairaa ia mau i Toʼna mana hanahana. Te ora nei râ tatou i roto i te hoê ao ino. Te vai nei te hoê puai tamau, o te huti nei ia tatou i raro, ma te titau ia tatou ia rave i te mau mea aore i au i te autahuʻaraa hanahana ta tatou e mau nei. E mea maitai ia hiʻo e, e mea nahea to te metua no te haavare, taua tamaiti haavare o te poʻipoʻi ra, tei hurihia na niʻa mai i te raʻi ra, fariiraa i te mau raveʻa e te ite no te faaueue, no te animanihini, no te haaputuputu i pihaʻi iho iaʼna, i te mau taata aita i paari e aita i vai araara noa. Aita i maoro aʻe nei, ua haapoupouhia te hoê hohoʻa teata ei hohoʻa nehenehe roa aʻe no teie matahiti. Aita vau i mataʻitaʻi i te reira hohoʻa, aita atoa vau e manaʻo ra e haere e mataitai. Ua parauhia mai râ iaʻu e, ua î roa te reira i te mau mea no niʻa i te apeniraa, e no niʻa hoʻi i te mau mea faaino.
Ua riro te peu taotoraa te tane e te vahine ei hoê o te mau tapaʻo o to tatou nei anotau. Te feia hamani i te reira mau mea, te ohi nei ratou i te moni i niʻa i te tua o te feia e au nei e mataʻitaʻi i te reira. I roto i te mau reni matamua o te heheuraa ta tatou e parau nei e, te Parau Paari, te na ô nei te Fatu e : « No te mau ino e te mau uma e vai nei e o te vai â hoʻi i roto i te aau o te mau taata opuaraa ino i te mau mahana hopea, ua faaara vau ia outou na, e te faaara nei hoʻi au ia outou na mua roa ra, na roto i te horoʻaraaʼtu ia outou teie parau no te paari na roto i te heheuraa » (PH&PF 89:4).
I muri iho, ua parau oia no niʻa i te maa ta tatou e tuu i roto i to tatou vaha. E tiʻa i te reira mau huru parau ia parau-atoa-hia no niʻa i te mau mea ta tatou e tuu i roto i to tatou feruriraa, ia fati anaʻe tatou i raro aʻe i te mau hohoʻa faufau o te apeniraa.
E te huitaeaʻe e, outou e te mau tane atoa e te mau tamaroa atoa e faaroo mai nei i toʻu reo, ua ite outou e, eaha taua mau mea viivii ra. Aita e titauhia te hoê tabula hohoʻa purumu no te faaite ia outou e, eaha te mea e tupu mai i niʻa ia outou mai te mea e, e fati outou i raro aʻe i te mau hohoʻa faufau o te apeniraa. A faaau na i te reira i niʻa i te nehenehe, te hau, te manaʻo nehenehe e roaa mai na roto i te tiʻaraa i pihaʻi iho i te Fatu e te faateiteiraa ia outou i niʻa aʻe i te mau peu iino e haati nei ia tatou.
No outou teie parau, e au mau tamaroa here e parahi nei i roto i teie putuputuraa. Ua riro outou ei mau tapaʻo taaê na te enemi. Mai te mea e, e noaa outou iaʼna i teie nei, ua ite oia e, e riro oia i te upootia i niʻa ia outou no te oraraa taatoa. Tei roto ia outou te tahi mau puai e te tahi mau iteraa o te aau faahiahia rahi no te hoê opuaraa hanahana. Area râ, ia haaviiviihia te reira, e riro mai ïa ei haamouraa eiaha râ ei paturaa.
E mauruuru rahi toʻu no te puai o to tatou feia apî. Ua ite atoa râ vau e, te topa nei te tahi pae no to ratou haapaʻo ore. Ua riro te taata hoê tei moʻe ei ati rahi. Te hinaaro nei te basileia o to tatou Fatu ia outou. E mata na ia ite-tiʻamâ-hia mai outou no te reira. Ei feia haavare ore outou ia outou iho. Eiaha e rave i te mea e viivii ai outou, na te reira e haamou i to outou puai no te patoʻi.
Te horoʻaʼtu nei au ia outou e te mau tane i te hoê titauraa. Haapae na outou i te parau ino, e taparahi hoʻi te reira ia outou. Haapae i te mau mea iino o teie nei ao. Ei feia haavare ore outou ia outou iho e tiʻa ai. Ei feia haavare ore outou i te mau mea maitai roa i roto ia outou. A haapaʻo maitai i ta outou mau fafauraa tei taatihia i niʻa i te autahuʻaraa o te Atua. Eita e tiʻa ia outou ia rave i te mau mea faufau, eita e tiʻa ia outou ia haavare, eita e tiʻa ia outou ia taviri, eita e tiʻa ia outou ia imi i te maitai i niʻa i te tua o vetahi ê na roto i te ohipa tiʻa ore ma te ore outou e haamou i te hanahana tei roaa ia tatou tataʻitahi, tatou te tamarii na te Atua. Te pure nei au ma toʻu puai atoa, e te huitaeaʻe e, ia faateitei tatou ia tatou i niʻa aʻe i te reira, e ia riro tatou ei feia haavare ore ia tatou iho.
Ei feia haavare ore outou i roto i to outou auraa utuafare. Ua ite au i te mau mea maitai roa e te mau mea ino roa i roto i te faaipoiporaa. I te mau hepetoma atoa ua titauhia iaʻu ia hiʻopoʻa i te mau parau titauraa no te faaore i te taatiraa hiero. Ua riro te faataaraa te tane e te vahine i teie nei ei ohipa matarohia i te ao atoa nei. Noaʼtu e, aita te ture e farii ra i te reira, te ofati noa ra râ te mau tane e te mau vahine i te reira, e te ora amui nei ratou. Te mauruuru nei au, inaha, ua tiʻa iaʻu ia parau atu e, mea iti roa te faataaraa i rotopu i te feia tei faaipoipohia i roto i te hiero. Area râ, i rotopu i te reira mau taata, e faito rahi â to te faataaraa, hau atu i te faito i manaʻohia.
E haere mai te tane e te vahine faaipoipo i te Fare o te Fatu no te faaite i to raua here te tahi i te tahi. E rave raua i te mau fafauraa hanahana e te mure ore i rotopu i te tahi e te tahi e i rotopu i te Fatu. E taatihia ta raua faaauraa i roto i te hoê fafauraa mure ore. Aita e taata e feruri nei e, e maitai noa te faaipoiporaa i te mau taime atoa. Tera râ, e nehenehe i te taata ia feruri e, te mau faaipoiporaa atoa e ravehia i roto i te Fare o te Fatu, tei roto ïa i te reira te hoê fafauraa no te haavare ore te tahi i te tahi.
E mea maoro i teie nei toʻu iteraa e, te tumu rahi roa o te hoê faaipoiporaa oaoa, o te aau aupuru ïa no te maitai o te hoa faaipoipo. I te rahiraa o te taime, o te aau pipiri te tumu rahi no te tamaʻi, no te faataaraa, e no te aau oto.
E te huitaeaʻe e, te hinaaro nei te Fatu ia rave tatou i te mea maitai aʻe. Te hinaaro nei Oia i te mea maitai aʻe, hau atu i te mau mea e itehia nei i te ao nei. Eiaha ia moʻehia ia outou e, na outou iho i maiti i to outou hoa faaipoipo. O outou iho tei feruri e, aita e vahine ê atu i te ao nei mai iaʼna te huru. Na outou iho i hinaaro iaʼna e a muri noaʼtu. Tera râ, i te rahiraa o te taime, ua morohi te ohipa tei tupu i roto i te hiero. Eita e ore e, o te hinaaro tiʻa ore te tumu. Ua mono te faaino i te haapoupou. Ia imi anaʻe tatou i te ino i roto i te hoê taata, e itehia ihoa te reira. Ia faatumu râ tatou i te manaʻo i niʻa i te maitai, e tupu ïa te reira i te rahi e anaana roaʼtu.
Aita vau i ere i te iteraa no te reira. Eita e maoro e taeʻahia te 66 matahiti to te tuahine Hinckley e o vau nei faaipoipo-raa-hia. Aita vau i ite mai te aha te huru toʼna faaoromaʻiraa iaʻu i roto i tera roaraa taime. I teie nei ua paari maua. E mauruuru rahi toʻu iaʼna. Te hiʻopoʻa maite nei au ia maitai noa oia. Te imi nei au i te mea maitai roa aʻe noʼna. Ua riro oia ei hoa faaipoipo faahiahia mau. E vahine faaipoipo maitai teie, e e metua vahine, e mama ruau, e mama û faahiahia teie.
Ua faaroo outou i te parau no te taata tei ora maoro e ua ruau roa, e ua uiui te tahi mau papaʻi veʻa iaʼna i te tumu i ora maoro ai oia. Ua pahono oia e, i te taime a faaipoipohia ai raua, ua faaoti raua e, ia tatamaʻi anaʻe raua, e tiʻa te hoê o raua i niʻa, e haere i rapae i te fare. Te na ô ra oia e, « E taurearea, te tumu no toʻu oraraa maoro, no te rahi ïa o te mataʻi apî taʻu i hutihuti noa i roto i tera rahiraa matahiti ».
E te huitaeaʻe e, ei feia haavare ore outou i to outou hoa faaipoipo. Ia haamaitaihia to outou faaipoiporaa i te maitai o te haavare ore papu te tahi i te tahi. A imi i to outou oaoa i roto i te tahi e te tahi. A horoʻa i to outou hoa faaipoipo i te raveʻa ia hotu toʼna mau hinaaro, ia faahotu oia i toʼna mau taleni, ia ruperupe oia na roto i taʼna raveraa, e ia roaa iaʼna te iteraa i toʼna iho mau manaʻo no te mau mea taʼna i faaoti.
I teie nei, te hinaaro nei au e parau i te tahi parau no niʻa i te haavare ore i te Ekalesia.
Te ite nei matou i te tâuʻa ore rahi. Te parau nei te tahi pae e, « E ere na te Ekalesia e parau mai i toʻu feruriraa no niʻa i tera e tera mea, e aore râ, nahea ia ora i toʻu oraraa ».
Eita, te parau nei au e eita te Ekalesia e parau i te hoê noa aʻe taata nahea oia ia feruri, e aore râ, nahea oia ia rave i te hoê mea. E faaite râ te Ekalesia i te haerea e i muri iho, e titau manihini oia i te mau melo atoa ia haapaʻo i te evanelia e ia fanaʻo i te mau haamaitairaa e roaa mai na roto i taua huru oraraa ra. Eita te Ekalesia e parau i te hoê noa aʻe taata, e aʻo râ oia, e taparu oia, e faaitoito oia, e e titau oia i te haavare ore o te feia e parau nei e, e melo ratou no te Ekalesia.
I te tau e piahi au i te fare haapiiraa tua toru, i te hoê taime, ua parau atu vau i toʻu metua tane e, te feruri ra vau e, ua na rapae rii te mau Hui Mana Faatere Rahi i to ratou tiʻaraa i roto i ta ratou mau aʻoraa i te tahi mea. E taata paari mau teie e te maitai hoʻi. Na ŏ maira oia e, « Ua haapii mai te peresideni o te Ekalesia ia tatou, e te turu nei au iaʼna ei peropheta, ei hiʻo, e ei heheu parau, e e pee au i taʼna aʻoraa ».
Te tavini nei au i roto i te apooraa rahi no teie Ekalesia a 45 matahiti i teie nei. Ua tavini au ei Tauturu no te Tino Ahuru Ma Piti, ei melo no te Pŭpŭ no te Tino Ahuru Ma Piti, ei tauturu i roto i te peresideniraa Matamua, e i teie nei, e vaʻu matahiti, ei peresideni. Te hinaaro nei au e horoʻaʼtu ia outou i toʻu iteraa papu e, noaʼtu e, ua parahi au i roto ehia rahiraa tauatini putuputuraa i reira te tuatapapa-raa-hia te mau ture e te mau faanahonahoraa a te Ekalesia, aitâ vau i parahi aʻe nei i roto i te hoê o te reira mau putuputuraa e aita e imihia te arataʻiraa a te Fatu, e aore râ, te vai ra te hinaaro i roto i te hoê taata ia aʻo e aore râ, ia rave i te hoê mea no te faahepo i te tahi taata.
Te faaite ra te Apokalupo e : « Ua ite au i ta oe ohipa, e aore oe i toʻetoʻe, aore hoʻi oe i mahanahana, ahiri hoʻi oe i toʻetoʻe, e aore ïa, ia mahanahana ua tiʻa ïa iaʻu.
« E tena na, no te mea te pumahana noa na oe, aore i toʻetoʻe, aore hoʻi i mahanahana, e haapuai atu vau ia oe i rapae i tau vaha » (Apokalupo 3:15-16).
Te fafau atu nei au ia outou e taʻu mau taeaʻe here e, i roto i te tiʻaraa taʻu e amo nei i teie nei, eita roaʼtu vau e farii, eita hoʻi e faahepo i te hoê noa aʻe ture, hoê noa aʻe faanahonahoraa, hoê noa aʻe parau haapiiraa, o te ore e riro ei maitai no te mau melo o teie Ekalesia ta te Fatu.
Naʼna teie ohipa. Naʼna i faatiʻa. Naʼna i heheu mai i te parau haapiiraa. Naʼna i papaʻi i te huru no te raveraa. Naʼna i faatiʻa i toʼna faatereraa. Naʼna teie ohipa e Noʼna teie basileia, e ua parau mai Oia e : « Tei ore i ati mai iaʻu ra, o te aro mai ïa iaʻu » (2 Nephi 10:16).
I te matahiti 1933, ua tupu te hoê arepurepuraa i te Fenua Marite no te faataui i te ture e opani ra i te tapihooraa i te ava. Ia tae i te taime maitiraa, o Utah ïa te tuhaa fenua faufaa roa.
Te rave ra vau i te hoê misioni i Londres, Peretane, i toʻu taiʻoraa i te mau upoo parau o te veʻa o te parau ra e, « Ua taparahi pohe o Utah i te opaniraa ».
O te peresideni Heber J. Grant te peresideni no te Ekalesia i taua taime ra, e ua taparu oia i to tatou mau taata eiaha e maiti no te faaoreraa i te opaniraa. Ua oto roa oia i toʼna iteraa e, e rave rahi te mau melo o te Ekalesia i roto i teie tuhaa fenua tei tâuʻa ore i taʼna aʻoraa.
I teie taime, eita vau e parau atu ia outou i te maitai e aore râ, i te ino o teie opaniraa, e parau atu râ vau ia outou i te parau no te haavare ore papu i te Ekalesia.
Aue toʻu mauruuru, e toʻu mau huitaee, aue toʻu mauruuru rahi no te faaroo faahiahia o te Feia Moʻa i te mau Mahana Hopea nei e rave rahi, i te mea e, ia tiʻa ratou i mua i te hoê faaotiraa faufaa ta te Ekalesia i rave, e farii atoa ratou i taua faaotiraa ra. E mauruuru taaê mau toʻu i te mea e, ua tiʻa iaʻu ia parau atu e, i rotopu i te feia haavare ore, te vai ra te mau tane e te mau vahine manuia, e te rave ohipa, te maramarama, te manaʻo puai e te itoito – e mau taata maramarama rahi e te aravihi.
Ua titauhia ia tatou paatoa ia hiʻo atu i taua mea ra – ua tiʻa anei te Ekalesia, e aore râ, ua hape. Aita e tiʻaraa to ropu. E Ekalesia e e basileia no te Atua e aore râ, e ere roaʼtu.
Mauruuru, e au mau taeaʻe here, outou e te mau taeaʻe puai rahi e te haapaʻo papu e te faaroo rahi e te haavare ore.
I te pae hopea, te haavare ore i te Atua to tatou Metua i te Ao ra e i Taʼna Tamaiti Here, te Fatu o Iesu Mesia.
E tiʻaraa to te mau taata atoa i roto i teie Ekalesia ia ite e, o te Atua to tatou Metua Mure ore e taʼna Tamaiti Here, to tatou ïa Faaora. Ua horoʻa mai te Faaora i te taviri e tiʻa ai ia tatou ia farii i taua ite ra. Ua parau oia e : « O tei hinaaro maite i te haapaʻo i toʼna ra hinaaro, e ite ïa i taʻu e haapii nei e na te Atua, e naʻu iho » (Ioane 7:17).
Ua tuʻi te roo o Iuda Isakariota i roto i te aamu ei taata hoo aiʻa, tei hoo i toʼna haavare ore e 30 moni veo (a hiʻo Mataio 26:15).
Ehia rahiraa i to tatou nei tau, ia au i te parau a Paulo ra, « ua faasatauro ratou … i te Tamaiti a te Atua, e ua faariro faaite noa iaʼna ei faainoraa » na roto i te mau parau iino e te faaino ? (a hiʻo Hebera 6:6).
Ua ite outou i te mau parau iino i te fare haapiiraa e i niʻa i te purumu. A haapae i te reira. Eiaha roaʼtu e vaiiho i te reira ia haere mai i niʻa i to outou utu. A faaite i to outou haavare ore i te Atua o te raʻi e i te Faaora o te ao nei, na roto i te haamoʻaraa i to raua iʻoa.
A pure i to outou Metua i te Ao ra i te iʻoa o te Fatu o Iesu Mesia, e i te mau taime atoa, i roto i te mau huru atoa, na roto i te huru o to outou oraraa, a faaite i to outou haavare ore e to outou here.
O vai to te pae o te Fatu ? O vai ?
Teie te taime no te faaiteraa.
Te ani nei tatou ma te mătaʻu ore ;
O vai to te pae o te Fatu ? O vai ?
(Hymns, no. 260)
Ia vai mai te mau haamaitairaa o te raʻi i niʻa ia outou e to outou mau utuafare, e au mau taeaʻe here. Ia vai haapaʻo maitai noa tatou, te mau tane e te mau tamaroa parau tiʻa e te haavare ore, taʻu ïa pure na roto i te iʻoa moʻa o Iesu Mesia ra, amene.