Giselyo pinaagi sa Balaan nga Espiritu sa Saad
(Doktrina ug mga Pakigsaad 132:7)
Ang pagdawat sa mga ordinansa sa pagkapari ug pagsulod sa sagrado nga mga pakigsaad mao ang importanteng mga lakang sa “tibuok kinabuhi nga tinguha” sa pagpahisubay sa atong mga kasingkasing, hunahuna, ug kinabuhi ngadto sa kabubut-on sa Dios.
Nakakat-on ko og importante nga leksiyon daghang katuigan na ang milabay gikan ni Presidente Boyd K. Packer. Siya miingon:
“Bisan unsa pa ang pagkalumulupyo o kaliwatan, lalaki man o babaye, bisan unsa pa ang trabaho, bisan unsa pa ang inyong edukasyon, walay pagsapayan sa henerasyon diin ang usa ka tawo nagpuyo, ang kinabuhi usa ka panaw alang natong tanan, balik ngadto sa presensya sa Dios.
“Ang mga ordinansa ug mga pakigsaad mao ang atong mga kredensyal aron makasulod ngadto sa Iyang presensya. Ang pagdawat niini sa takos nga paagi mao ang tibuok kinabuhi nga tinguha; ang paghupot niini human sa pagdawat mao ang hagit sa mortalidad.”
Nag-ampo ko nga ang Espiritu Santo motudlo ug molamdag sa matag usa kanato samtang atong gikonsiderar ang kaimportante sa mga ordinansa ug mga pakigsaad isip espirituhanong mga kredensyal alang sa atong panaw pauli ngadto sa Langitnong Amahan.
Ang Sambingay sa Pasaporte
Sugdan nako pinaagi sa usa ka mubo nga istorya. Sa usa ka higayon, adunay usa ka lalaki nga gustong mobisita sa mga sakop sa pamilya sa layong nasod. Siya miplano sa iyang biyahe, miimpake sa iyang maleta, ug mibiyahe sakay sa eroplano paingon sa siyudad diin nagpuyo ang iyang mga paryente.
Ang lalaki malipayong migawas sa eroplano ug milakaw padulong sa passport control checkpoint. Siya adunay balido nga pasaporte nga giisyu sa usa ka awtorisado nga ahensya sa gobyerno sa iyang nasod. Gipakita niya ang iyang pasaporte ngadto sa usa ka opisyal sa utlanan, kinsa miberipika sa pagkatawo, nasyonalidad, ug mga hinungdan sa pagbisita sa lalaki diha sa nasod. Apan wala giatiman pag-ayo sa lalaki ang iyang pasaporte. Ang pahina sa personal nga impormasyon nahugaw ug nadaot. Ug ang nagisi nga pahina giayo sa wala gitugotan nga paagi gamit ang tape ug glue.
Tungod niini, wala dawata sa opisyal sa utlanan ang iyang pasaporte ug midumili sa paghatag sa selyo nga gikinahanglan aron makasulod siya sa nasod. Ang lalaki nasagmuyo ug naglibog kon unsay sunod niyang buhaton.
Ang leksiyon niini nga istorya yano ra kaayo: ang integridad sa usa ka pasaporte kinahanglan nga mapadayon sa paglabay sa panahon. Ang pagkupot og balido nga pasaporte naghatag og oportunidad sa lalaki nga makasulod sa nasod, apan ang pasaporte lamang dili garantiya nga tugotan gyod siya nga makasulod sa nasod.
Siyempre, kining yanong analohiya adunay mga limitasyon. Dili sama sa kadaot sa pisikal nga pasaporte, ang mga kalisdanan ug kasakit nga atong nasinati nga dili tungod sa atong kaugalingong sayop dili makapakunhod sa mga saad sa Dios alang kanato o makapawalay bili sa atong mga pakigsaad.
Mga Pakigsaad, mga Ordinansa, ug Gisaad nga mga Panalangin
Alang sa mga disipulo ni Jesukristo, ang pagdawat sa mga ordinansa sa pagkapari ug pagsulod sa sagrado nga mga pakigsaad mao ang importanteng mga lakang sa “tibuok kinabuhi nga tinguha” sa pagpahisubay sa atong mga kasingkasing, hunahuna, ug kinabuhi ngadto sa kabubut-on sa Dios.
Ang pakigsaad usa ka ligdong nga saad—usa ka malungtarong pasalig tali sa Dios ug sa Iyang mga anak nga lalaki ug babaye. Ang Dios ang nag-establisar sa mga kondisyon sa tanang pakigsaad sa ebanghelyo, ug ang Iyang mga anak naggamit sa ilang moral nga kabubut-on sa pagkat-on ug pag-uyon sa unsay Iyang gihangyo kanila nga buhaton.
Ang mga pakigsaad madawat pinaagi sa sagrado nga mga ordinansa. Ang ordinansa usa ka balaan nga buhat nga gihimo pinaagi sa awtoridad sa pagkapari nga adunay espirituhanong katuyoan ug mahangtorong importansya ug may kalabotan sa mga balaod ug mga lagda sa Dios. Ang mga ordinansa nagtudlo usab kanato mahitungod sa matang sa mga pakigsaad nga atong dawaton sa atong kinabuhi.
Ang mga pakigsaad ug mga ordinansa sa gipahiuli nga ebanghelyo sa Manluluwas mao ang espirituhanong mga kredensyal nga makaabli sa langitnong mga bintana sa oportunidad aron madawat sa atong kinabuhi ang balaan nga katuyoan, direksyon, ug kalig-on. Ang Dios misaad sa Iyang mga anak nga lalaki ug babaye og langitnong mga panalangin sa pagtuman sa mga pakigsaad, lakip ang pagkamasulundon sa mga balaod ug mga ordinansa sa ebanghelyo ni Jesukristo. Ang padayon nga pagkamatinud-anon gikinahanglan aron kadto nga mga kredensyal mahimong balido ug aron madawat ang gisaad nga mga panalangin.
Ang Espiritu Santo mao ang Balaan nga Espiritu sa Saad
Ang Espiritu Santo mao ang ikatulong sakop sa Dios nga Kapangulohan. Siya usa ka personahe sa espiritu, nagpamatuod sa tanang kamatuoran, ug mao ang saksi ug mensahero alang sa Amahan ug sa Anak.
Ang Espiritu Santo gihulagway usab sa kasulatan isip ang Balaang Espiritu sa Saad, kinsa moaprobar o mokompirma nga madawat sa Dios ang matarong nga mga buhat sa Iyang mga anak. Sa kataposan, ang tanang ordinansa ug mga pakigsaad sa ebanghelyo kinahanglan nga maselyohan pinaagi sa Balaang Espiritu sa Saad. Sama sa gipadayag sa Ginoo ngadto ni Propeta Joseph Smith, “Ang tanang pakigsaad … nga wala gihimo ug gisudlan ug giselyohan pinaagi sa Balaang Espiritu sa saad … walay epekto, hiyas, o kalig-on diha ug human sa pagkabanhaw gikan sa mga patay.”
Kon giselyohan pinaagi sa Balaang Espiritu sa Saad, ang usa ka ordinansa, panaad, o pakigsaad nagbugkos dinhi sa yuta ug sa langit. Kini nga pagselyo adunay kondisyon sa mortalidad ug mahimong maguba o mawala pinaagi sa pagkadili matarong.
Ang pagdawat niining makaaprobar nga pagselyo pinaagi sa Espiritu Santo kasagaran dili usa ka higayon nga panghitabo; hinuon, kini moabot sa paglabay sa panahon kon kita kinasingkasing ug makanunayon nga maghinulsol, motahod sa atong mga pakigsaad, ug motugyan sa atong mga kasingkasing ngadto sa Dios. Ang matarong nga pagtinguha niini nga panalangin mao “ang hagit sa mortalidad,” sama sa gihulagway ni Presidente Packer.
Ingon nga ang lalaki sa akong istorya bahin sa pasaporte nanginahanglan og awtorisado nga selyo sa iyang pasaporte aron makasulod sa laing nasod, ang matag usa kanato nagkinahanglan usab sa makapamatuod nga pagsaksi sa Balaang Espiritu sa Saad aron madawat nato ang mahangtorong mga panalangin nga nag-uban sa mga pakigsaad ug mga ordinansa sa ebanghelyo sa Manluluwas.
Ang matag usa kanato kinahanglan nga mapasalamaton sa sagrado nga mga oportunidad nga “maglakaw subay sa tanang mga ordinansa sa Ginoo” ug makadawat pinaagi sa Balaang Espiritu sa Saad, “sa paglabay sa panahon,” ang makaaprobar nga selyo mogarantiya sa tanang gisaad nga mga panalangin.
Ang Ordinansa sa Pagselyo
Ang pagselyo sa usa ka lalaki ug usa ka babaye diha sa balay sa Ginoo mao ang labing taas nga pakigsaad ug ordinansa sa gipahiuli nga ebanghelyo sa Manluluwas. Ug importante, ang pagsabot sa doktrinal nga kaimportante sa usa ka ordinansa sa pagselyo nga giselyohan pinaagi sa Balaang Espiritu sa Saad makatabang sa pagtubag, sa tinipik, lawom nga personal nga mga pangutana mahitungod kon ang mga pagpili sa laing tawo makapugong ba sa usa ka matinud-anong nagtuman sa pakigsaad nga madawat ang mahangtorong mga panalangin.
Ang ordinansa sa pagselyo naglakip sa duha ka sukaranan ug may kalabotan nga mga bahin: (1) ang mahangtoron nga panaghiusa sa usa ka lalaki ug usa ka babaye diha sa kaminyoon—nga mahimong sabton nga usa ka patas nga pagselyo—ug (2) ang pagselyo sa bana ug asawa ngadto sa mahangtorong pamilya sa Dios ug ang pagsumpay sa katawhan sa tanang henerasyon—nga mahimong sabton nga usa ka bertikal nga pagselyo. Ang duha ka elemento sa ordinansa parehong mahinungdanon.
Ang gituyo ug giampo nga mga resulta sa usa ka pagselyo sa templo tali sa usa ka lalaki ug usa ka babaye naglakip sa tibuok kinabuhi nga espirituhanong pagtubo, debosyon sa kaminyoon, pagkamaunongon, pagtinabangay aron mabuntog ang mga kawalay kaseguroan ug mga hagit sa mortalidad, ug malungtarong kalipay.
Usahay, subo lang, ang gituyo ug giampo nga mga resulta dili mahitabo. Ang mga sala sa kapikas, pagkadili matinud-anon, personal nga pagbiya sa kamatuoran, o uban pang mga kalisdanan mahimong hinungdan sa panagbingkil, pagpalayo, ug gani diborsyo. Sa ingon niini nga mga sitwasyon, ang usa ka matinud-anong kapikas mahimong mangutana, “Ang dili matarong nga paggamit sa moral nga kabubut-on sa laing tawo makakuha ba gikan kanako sa unsay gisaad sa Dios?” Ang tubag niini nga pangutana usa ka kusganong dili!
Ang dili takos nga mga binuhatan sa usa ka kapikas seguradong maghatag og kasakit ug kasubo sa laing kapikas ug sa mga sakop sa pamilya. Apan, ang pagkadili matarong sa usa ka tawo dili makapugong o makababag sa nagpadayong suplay sa gugma, kalig-on, ug mga panalangin sa Dios ngadto sa laing tawo. Ang gahom sa walay kinutoban ug walay kataposan nga Pag-ula sa Ginoo makabuntog sa tanang butang, sa tanang panahon, bisan asa, alang sa matag tawo nga hugot nga nagtuman sa ilang mga pakigsaad Kaniya.
Ang kapikas nga makalapas sa mga pakigsaad ug dili maghinulsol nagsalikway sa oportunidad nga madawat sa iyang kaugalingon ang makaaprobar nga selyo sa Balaang Espiritu sa Saad alang sa patas ug bertikal nga mga aspeto sa ordinansa sa pagselyo.
Ang usa ka matinud-anong kapikas nga nagtuman sa mga pakigsaad ug nagpadayon uban sa pagtuo magpabiling takos nga madawat sa iyang kaugalingon ang makaaprobar nga selyo sa Balaang Espiritu sa Saad alang sa bertikal nga aspeto sa ordinansa sa pagselyo ug madawat ang uban pang nag-uban nga indibidwal nga mga panalangin.
Kamo mahimong mangutana, “Unsaon man kini pagkahitabo kon ang kaminyoon sa templo dili molungtad?”
Ang gipadayag nga doktrina sa Ang Simbahan ni Jesukristo sa mga Santos sa Ulahing mga Adlaw wala magtubag sa tanang detalye ug gagmay nga mga detalye bahin sa ingon niana nga mga sitwasyon. Wala ko kahibalo ug dili ko makapasabot sa tukmang paagi kon sa unsang paagi ug kon kanus-a madawat ang gisaad nga mga panalangin. Apan nasayod ko nga ang gisaad nga mga panalangin madawat gayod. Walay matinud-anong disipulo sa kataposan nga dili makadawat sa bisan unsang mahangtorong panalangin nga gisaad sa Dios tungod sa dili matarong nga paggamit sa moral nga kabubut-on sa laing indibidwal.
Akong taposon uban sa makapaseguro nga pagpamatuood ni Hari Benjamin: “Nagtinguha ako nga hunahunaon ninyo ang bulahan ug ang malipayon nga kahimtang niadtong nagsunod sa mga sugo sa Dios. Kay tan-awa, bulahan sila sa tanang butang, sa temporal ug sa espirituhanon; ug kon magpabilin silang matinud-anon hangtod sa kataposan dawaton sila sa langit, nga pinaagi niana makapuyo sila uban sa Dios sa kahimtang nga walay kataposang kalipay. O hinumdomi, hinumdomi nga tinuod kining mga butanga; kay ang Ginoong Dios namulong niini.”
Ako malipayon nga mopamatuod sa katinuod sa propetikanhong saad ni Hari Benjamin sa sagradong ngalan ni Ginoong Jesukristo, amen.