Itudlo ang Kamatuoran Inubanan sa Gugma
Ang pagtudlo sa kamatuoran inubanan sa gugma mao ang mahinungdanong timaan sa mga disipulo ni Kristo sa kataposang mga adlaw.
Pasiuna
Nagkinahanglan og kaisog ang pagbarog alang sa kamatuoran. Nagkinahanglan pa gayod og dugang kaisog ang pagbarog alang sa kamatuoran inubanan sa gugma. Si Presidente Dallin H. Oaks mibalik-balik sa pagpasabot niini nga mensahe. Sa miaging kinatibuk-ang komperensiya mipasabot siya sa hagit: “Kon maningkamot kita sa pagsunod sa tanang sugo sa atong personal nga mga kinabuhi, usahay akusahan kita nga walay gugma alang niadtong wala magtuman niini. Kon magpakita kita og personal nga gugma ug suporta sa mahigugmaong mga kawsa, usahay masaypan kita nga nagpasabot nga nagsuporta sa mga resulta nga supak sa atong ubang relihiyoso nga mga katungdanan.”
Sa akong pag-andam sa akong mensahe karong adlawa, nabalaka ko nga ang pipila mopili lang sa kamatuoran o ang uban mopili lang sa gugma. Nabalaka usab ko nga ang uban makakita lang sa mga kahuyang sa uban ug makalimot sa ilang kaugalingong mga kahuyang. Nahinumdom ko sa dihang si Presidente Russell M. Nelson mihatag sa iyang pakigpulong bahin sa pagpatunhay sa kalinaw, gisugdan nako ang usa ka lista sa akong hunahuna nga nagkinahanglan sa iyang mensahe. Dayon mihatag siya niini nga pasidaan: “Niining puntoha tingali kamo naghunahuna … nga kini nga mensahe makatabang gayod sa [laing] tawo nga inyong nailhan. … Apan ako usab manghinaot nga inyong tan-awon og maayo ang inyong [kaugalingong] kasingkasing kon kini aduna bay ginagmay nga garbo o kasina nga makapugong ninyo sa pagkahimong tigpasiugda og kalinaw.”
Akong ihatag ang samang imbitasyon kanatong tanan karon.
Lima ka Baroganan sa Pagbarog alang sa Kamatuoran Inubanan sa Gugma
Pipila ka tuig ang milabay nakadawat ko og buluhaton sa pagpamulong didto sa Ensign College. Si Presidente Oaks ang nag-unang mamumulong sa debosyonal, ug gihangyo ko niya nga ako mamulong uban kaniya bahin sa pipila ka mahagiton nga mga hilisgotan sa doktrina sa panahon karon. Usa kini ka malisod nga buluhaton. Gisugyot usab niya nga dili kami mogamit og pormal nga sinulat nga pakigpulong. Karon, nasayod ko nga mosunod kita sa propeta, apan nagduha-duha kong mitubag, nga para sa Simbahan, tingali kinahanglan namong isulat bisan lang ang akong isulti. Miuyon siya, ug ang debosyonal giulohan og “Pagbarog nga Lig-on Inubanan sa Gugma sa Pagmantala sa Kamatuoran.” Sa pakigpulong, gipakigbahin ni Presidente Oaks ang lima ka baroganan nga akong gibati nga ipasabot karon.
Baroganan 1: Likayi ang mga Sitwasyon nga Mosangpot sa Grabeng Panaglalis.
Una, likayi ang mga sitwasyon nga mosangpot sa grabeng panaglalis. Si Elder Neil L. Andersen mipahayag, “Adunay mga panahon nga ang pagbuhat og kadaitan nagpasabot nga pugngan nato ang tinguha sa pagtubag ug hinuon uban sa kaligdong, magpabilin nga hilom.”
Hunahunaa ang literaryong paghulagway ni Dostoevsky kang Kristo ug sa Dakong Imbestigador. Human siya gikondenar sa makadaghan, ang Manluluwas nagpaubos lang sa nag-akusar Kaniya nga wala nay dugang tubag. Sa mas gamay nga paagi, bag-o lang nako kining gibati sa dihang ang usa ka grupo sa mga lider sa akademiko sa nasod agresibong misaway sa [kalabotan] sa pagtuo [alang] sa mas taas nga edukasyon. Nakamatikod sa nagkagrabe nga tensyon nianang higayona, gipili nako niadtong higayona nga ihunong usa ang diskusyon bisan pa sa akong dakong pagsupak sa ilang gisulti.
Usahay tungod sa mga gutlo nga makapainit sa hunahuna, mas lisod masabtan kon unsa gayod ang hinungdan sa mga pagprotesta sa usa ka tawo. Si Presidente Nelson mitudlo: “Kon ang mga higala ug pamilya mopalayo gikan sa Simbahan, ipadayon ang paghigugma kanila. … Ayaw itugot nga kamo mahisalaag pinaagi niadtong kansang mga pagduhaduha [gisugnoran] sa mga butang nga dili ninyo makita sa ilang mga kinabuhi.” Naghunahuna ko sa istorya ni Sister Anette Dennis bahin sa usa ka iro nga nasamdan nga pinaagi sa kinaiya nga dili maoy iyang naandan, nagdumili sa pagtubag sa iyang tag-iya. Usahay ang atong nasabtan nga pagdumot sa tinuod mao diay ang tinago nga kasakit o pagmahay sa usa ka tawo.
Wala ko kini makita sa akong higala nga kaniadto matinud-anon sa espirituwal nga paagi apan karon miatake na sa Simbahan. Ang akong kasagmuyo miabot dili lang tungod sa iyang kalagot apan tungod kay nasayod ko nga nahibalo siya unsay sakto. Subo lang, imbes nga mosabot sa tensyon sa higayon o nga basin nasakitan siya tungod sa ubang mga rason, mibalos ko pinaagi sa masuk-anon nga tubag. Tingali nakadaog ko sa debate nianang higayona, apan nawala nako ang Espiritu ug napakyas ko sa pagtabang sa akong naglisod nga higala. Nianang adlawa mibarog ko alang sa kamatuoran, apan gibuhat ko kini nga walay gugma o walay gugmang putli.
Baroganan 2: Pangita og Komon nga Baroganan
Ang ikaduhang paagi sa pagbarog alang sa kamatuoran inubanan sa gugma mao nga unahon ang pagpangita og butang nga inyong gikauyonan. Ang usa ka presidente sa stake nagdala kanako og taas nga lista sa mga bisitahanan alang sa pagpangalagad. Gisugyot nako nga mopili siyag usa ra ka balay, tungod sa among limitasyon sa eskedyul. Sa teknikal nga paagi, iyang gituman ang hangyo. Apan sa among pag-abot sa balay, adunay lima ka managlahing indibidwal nga naghulat sa sulod, ang matag usa adunay hingpit nga lainlaing kabalaka. Nangutana ko, “Aw, asa man mo gustong magsugod?” Samtang naminaw ko sa ilang mga istorya, gusto na unta ko nga mosagbat, apan ang Espiritu padayon nga nag-aghat nako nga maghulat. Human sa halos duha ka oras nga pagpaminaw, moadto na unta sa among sunod nga miting, mas nasabtan nako ang ilang mga panlimbasog ug nakita ang ilang kinasingkasing nga mga pagpanglimbasog. Ug sa dihang gidapit nako sila nga motambong sa komperensiya sa stake, ang matag usa misugot.
Ang pagpugong sa awhag nga motubag diha-diha dayon nakamugna og komon nga baroganan, nga sa kaulahian nakatugot nako nga makatudlo pinaagi sa gugma. Sama sa Manluluwas, “nahigugma kita kaniya, kay ang Dios man ang unang naghigugma kanato.”
Baroganan 3: Pagkahimong usa ka Kahayag
Ang ikatulong baroganan mao ang pagkahimong usa ka kahayag. Si Presidente Nelson mitudlo: “Ipakita sa inyong maduhaduhaon nga mga higala kon unsa kadako ang inyong paghigugma sa Ginoo ug sa Iyang ebanghelyo. Isorpresa ang ilang maduhaduhaon nga mga kasingkasing gamit ang inyong matuohon nga kasingkasing!” Ang labing maayong paagi aron matabangan ang uban nga magpabilin sa ilang mga pakigsaad mao ang pagtuman sa imong mga pakigsaad. Sama sa gipahinumdom kanato ni Sister Tamara Runia, “Moadto kamo sa kahoy [sa kinabuhi], … padayon sa pag-awhag niadtong inyong gihigugma … nga ang pagkaon sa bunga usa ka malipayon nga butang!”
Gipakigbahin nako ganiha ang istorya sa usa ka tensiyonado nga palibot uban sa mga lider sa akademiko. Tingali kabahin niini tungod kay gipili nako nga dili moapil nianang higayona, dayon usa ka chancellor sa unibersidad ang nangayo og tambag sa paghimo og kurso bahin sa kinaiya didto sa usa sa labing bantogan nga mga institusyon sa akademiko sa nasod. Ang pagpakita og kahayag makaabli og mas daghang pultahan kaysa bisan unsang mahait nga argumento.
Baroganan 4: Barogan ang Kamatuoran Bisan sa Atong Pagtabang sa Uban
Karon, ang ikaupat nga baroganan mao ang pagbarog sa kamatuoran bisan sa atong pagtabang sa uban. Niadtong Abril, si Presidente Oaks mipahayag nga ang pagpakita og gugma ngadto sa uban “wala magpasabot nga isalikway ang atong mga mithi. Ang mga pakigsaad nga atong gihimo dili kalikayan nga mopahimutang kanato isip matinud-anon nga mga partisipante sa mahangtoron nga panglimbasog tali sa kamatuoran ug sayop.”
Si Elder Jeffrey R. Holland sa samang paagi mipahinumdom nato, “Klaro nga nakasabot si Jesus kon unsa ang nakalimtan sa kadaghanan sa atong moderno nga kultura nga dunay importante nga kalainan tali sa sugo sa pagpasaylo sa sala (diin anaa Kaniya ang walay kataposan nga kapasidad sa pagbuhat) ug pagpasidaan batok sa pag-uyon niini (diin wala gayod Niya buhata bisan makausa).”
Si Presidente Holland mipayano pa og dugang sa dihang siya miingon, “Sa akong nahinumdoman, si Kristo wala gayod bisan kausa motago sa Iyang gugma ngadto ni bisan kinsa, apan Siya wala gayod usab bisan kausa mosulti ni bisan kinsa nga, ‘Tungod kay gihigugma ko ikaw, wala na kinahanglana ang imong pagsunod sa akong mga sugo.’”
Ang uban nangatarongan nga ang paghigugma sa atong silingan (ang ikaduhang sugo) usahay dili mabantayan nga molabaw o mas mauna pa kay sa paghigugma sa Dios (ang unang sugo). Apan si Presidente D. Todd Christofferson nagtudlo: “Ang pag-una sa unang sugo dili makapakunhod o makalimit sa atong abilidad sa pagtuman sa ikaduha nga sugo. Sa sukwahi, kini makapalambo ug makapalig-on. … Ang atong gugma sa Dios makadugang sa atong abilidad sa paghigugma sa uban sa mas tukma ug mas hingpit nga paagi tungod kay kita sa labing tinuod nakig-uban sa Dios sa pag-amuma sa Iyang mga anak.”
Kon maningkamot kita sa paghigugma sa uban pinaagi sa pagpamenos sa mga balaod sa Dios, atong gibulag ang atong kaugalingon gikan sa usa ka tawo nga labing nahigugma kanila. Ang Manluluwas nagpakita og gugma sa babaye nga nadakpan sa pagpanapaw. Apan gisugo usab niya siya nga “lakaw ug ayaw na pagpakasala.”
Baroganan 5: Magpabiling Mosalig ni Jesukristo.
Si Presidente Nelson mipasidaan nga ang “mga mensahe [sa kaaway] kusog, isog, ug mapagarbohon,” samtang ang Langitnong Amahan makigsulti “sa yano, hilom, ug uban sa katingalahang katin-awan nga dili nato masaypan sa pagsabot.” Hingpit kining gipakita ni Kristo alang kanato.
Ang ikalimang baroganan mao ang pagpabilin nga matinud-anon diha ni Jesukristo. Pangutan-a ang inyong kaugalingon kon kamo ba nagdala niining Kristohanon nga mga hiyas sa pagpaningkamot sa pagbarog alang sa kamatuoran inubanan sa gugma: “Ug ang gugmang putli mainantoson, ug mabination, ug dili masinahon, ug dili manghambog, dili mangita alang sa iyang kaugalingon, dili dali nga masuko, dili maghunahuna og daotan, ug dili magmaya sa pagkadaotan apan magmaya sa … kamatuoran.”
Panapos
Alang sa mga tinun-an ni Jesukristo, ang kamatuoran ug ang gugma magkauban kanunay. Nagtuo ko nga ang pagtudlo sa kamatuoran inubanan sa gugma mao ang mahinungdanong timaan sa mga disipulo ni Kristo sa kataposang mga adlaw. Alang sa uban kini magkinahanglan og mas dakong kombiksyon. Alang sa uban, kini magkinahanglan og mas dakong gugmang putli. Nasayod ko nga ang Ginoo motabang kanato samtang maningkamot kita sa pagtudlo sa kamatuoran inubanan sa gugma. Sa ngalan ni Jesukristo, amen.