Si Jesukristo mao ang Kahayag ug ang Kinabuhi sa Kalibotan
Bisan unsa pa ang atong mga kabalaka, mga hagit, ug mga kalisod sa atong mga kinabuhi, ang tubag kanunay mao si Jesukristo.
Sa akong nasod nga natawhan sa South Africa, naandan na sa mga ginikanan nga hatagan ang ilang mga anak og mga ngalan nga adunay espesyal nga kahulogan. Ang akong ngalan mao si Thabo. Kini nagpasabot nga “kalipay.” Ang ikaduhang ngalan sa akong minahal nga asawa kay Gadifele. Kini nagpasabot nga “mahangtoron o walay kataposan.” Kon sumpayon, ang among mga ngalan nagkahulogan og “mahangtorong kalipay.” Pagkadako sa gilaoman!
Apan sa wala madugay human sa among kaminyoon, ang usa ka diskusyon usa niana ka gabii ang wala damha nga nahimong among unang seryosong panagbangi. Dali kadtong nahimo nga panaglalis, ug nausab kami gikan sa usa ka madasigon, malipayong magtiayon ngadto sa walay pagtingganay pinaagi sa inisipan nga hilom nga pagkawala sa kalipay.
Daghan kanato ang nakasinati og ingon niana nga mga higayon nga ang usa ka pagsultihanay o diskusyon uban sa kapikas, anak, miyembro sa pamilya, higala, kauban sa trabaho, o silingan wala matapos sa gilaoman nga paagi. Sa ingon niana nga mga gutlo, ang nagsugod nga usa ka yano nga pagbinayloay mahimong magbilin kanato og mga pagbati sa kasuko, kasagmuyo, kapakyasan, o bisan gani pagmahay.
Samtang namalandong bahin sa unsay buhaton, ang mga pulong nga gisulti ni Jesukristo sa dihang nagpakita Siya sa mga katawhan ni Nephi diha sa Basahon ni Mormon misantop sa akong hunahuna. Nagtudlo siya:
“Kay sa pagkatinuod, sa pagkatinuod sultihan ko kamo, siya nga may espiritu sa panagbingkil dili gikan kanako, apan gikan sa yawa, kinsa mao ang amahan sa panagbingkil, ug siya ang nag-aghat sa mga kasingkasing sa mga tawo sa panagbangi uban ang kasuko, sa usag usa.
“Tan-awa, dili kini mao ang akong doktrina, nga hulhogan ang mga kasingkasing sa mga tawo sa kasuko, batok sa usag usa; apan mao kini ang akong doktrina, nga ang ingon niana nga mga butang pagahunongon” (3 Nephi 11:29–30).
Si Jesukristo mao ang Kahayag ug ang Kinabuhi sa Kalibotan
Kini nga mga pulong gikan sa mga kasulatan nakalamdag sa akong hunahuna ug nakatabang kanako nga mahibalo unsaon pagsulbad ang hagit nga akong giatubang. Kini nga paglamdag nagagikan sa Manluluwas. Sa 3 Nephi 11:11, ang Manluluwas miingon, “Ako ang kahayag ug ang kinabuhi sa kalibotan.” Pinaagi sa Iyang Espiritu, Iyang gilamdagan ang atong mga hunahuna (tan-awa sa Doktrina ug mga Pakigsaad 6:15). Ang Iyang kahayag gipadayag usab pinaagi sa Iyang hingpit nga kinabuhi ug mga pagtulun-an. Siya mipahayag, “Ako ang kahayag; nagpakita ako og panig-ingnan alang kaninyo.” (3 Nephi 18:16), ug ang Iyang mga pulong mao ang “kahayag sa [atong] agianan” (Mga Salmo 119:105).
Sa Unsang Paagi Kita Makadawat og Dugang Kahayag sa Manluluwas sa Atong Kinabuhi?
Daghan kanato ang posibling maghunahuna kon sa unsang paagi kita makadawat og dugang kahayag sa Manluluwas samtang kita mag-atubang sa adlaw-adlaw nga mga hagit ug mga pakigbisog sa atong mga kinabuhi. Tingali mabalaka kita kon makabarog ba pinaagi sa kinaugalingong paningkamot; makatuman ba sa mga gipangayo kanato sa eskwelahan o sa trabaho; mga pagbati sa kakulangan, kahadlok ug pagduhaduha; unsaon pag-atubang sa pagkawala sa usa ka minahal; o basta lang mahibalo kon unsay buhaton sa atong kinabuhi. Bisan unsa pa ang atong mga kabalaka, mga hagit, ug mga kalisod sa atong mga kinabuhi, ang tubag kanunay mao si Jesukristo.
Si Jesukristo makahatag og kahayag sa atong mga gutlo sa kangitngit ug mopahiuli sa paglaom kon mawala ang paglaom. Nasayod Siya kon diin kita gikan, kon asa kita karon, ug kon asa kita angay nga moadto. Pinaagi Kaniya, ang karon mahimong usa ka bag-ong adlaw ug ang ugma mahimong mas maayo nga adlaw.
Ania ang pipila ka butang nga atong mahimo aron madugangan ang kahayag sa Manluluwas sa atong kinabuhi.
Una, Palamboon ang Atong Pagtuo ni Ginoong Jesukristo
Ang pagbaton og pagtuo ni Jesukristo nagpasabot mosalig nga nakasabot Siya sa atong adlaw-adlaw nga mga kalisod ug nahibalo unsaon pagtabang kanato nga makabuntog niini kay Iyang nasinati ang tanan natong kasakit, mga balatian, ug mga kahuyang (tan-awa sa Alma 7:11–12). Kinahanglan kitang mosalig nga Siya andam kanunay nga motabang kanato samtang kita mahinumdom sa “pagtan-aw ngadto [Kaniya] sa matag hunahuna” ug “ayaw pagduhaduha, ayaw kahadlok” (Doktrina ug mga Pakigsaad 6:36).
Sa Oktubre 2024 nga kinatibuk-ang komperensiya, si Presidente Dieter F. Uchtdorf nagtudlo: “Ang lig-on nga pagtuo diha ni Jesukristo dili basta lang mahitabo. Dili, dinhi niining mortal nga kalibotan, ang mga tunok ug mga sampinit sa pagduhaduha dungan nga motubo. Ang himsog, mabungahon nga kahoy sa pagtuo nagkinahanglan og tinuyo nga paningkamot” (“Alimahan ang mga Gamot, ug ang mga Sanga Motubo,” Liahona, Nob. 2024, 102).
Si Presidente Dallin H. Oaks sa iyang pakigpulong sa mga estudyante sa BYU nagtudlo nga ang “lig-on nga pagtuo nagkinahanglan og labaw pa kay sa lig-on nga tinguha. Kini nagpasabot sa adlaw-adlaw nga pagpaningkamot, usa ka lakang sa matag higayon, inubanan sa pag-ampo ug pagtuon sa kasulatan” (“Coming Closer to Jesus Christ” [Brigham Young University devotional, Feb. 10, 2026], 2, speeches.byu.edu).
Ikaduha, Magtuon sa mga Kasulatan Kada Adlaw, Ilabi na sa Basahon ni Mormon
Diha sa Isangyaw ang Akong Ebanghelyo, atong makat-onan, “Samtang ang mga tawo mobasa ug mag-ampo mahitungod sa Basahon ni Mormon, mas makaila sila og maayo sa Manluluwas ug makasinati sa Iyang gugma” (Isangyaw ang Akong Ebanghelyo: Usa ka Giya sa Pagpakigbahin sa Ebanghelyo ni Jesukristo [2023], 132).
Walay usa ra ka saktong paagi sa pagtuon sa mga kasulatan. Mahimong pilion nato nga magbasa subay sa kronolohiya, magtuon sumala sa hilisgotan, motutok sa usa ka partikular nga pangutana, o magsugod sa usa ka tudling o bersikulo nga nakadani sa atong pagtagad. Mahimo usab kitang mopili og panahon nga labing haom sa atong mga kahimtang. Sa kataposan, ang pamaagi, tukmang panahon, ug gitas-on sa atong pagtuon sa kasulatan dili kaayo importante kay sa pagkamakanunayon ug pagkasinsero sa atong paningkamot.
Samtang nagserbisyo isip mga lider sa misyon sa among nasod sa South Africa, usa sa among mga misyonaryo mipakigbahin og istorya bahin sa usa ka lalaki nga ilang gitudloan kinsa, human makabasa sa Basahon ni Mormon, mikuha og pala, nagkalot og lungag sa iyang tanaman, gihurot og bubo ang bag-ong pinalit nga dakong lata sa kape ngadto niini, ug gilubong kini. Ang lalaki nalamdagan sa Espiritu bahin sa mga pagbag-o nga kinahanglan niyang buhaton ug gibuhat niya kini. Kita usab makadawat og kalamdagan samtang kita magtuon sa atong mga kasulatan.
Ikatulo, Mag-anad sa Paghinulsol Kada adlaw
Ang paghinulsol nagpasabot sa pagbag-o sa hunahuna ug pagtumong sa atong kasingkasing ngadto sa Dios. Pamalandongan nato ang mga pagbag-o nga kinahanglan natong buhaton sa atong kinabuhi, ug mahimong maglakip kini sa atong paggamit sa atong oras, sa mga butang nga atong gitan-aw o gipaminaw, ug sa pinulongan ug tono nga atong gamiton samtang kita makigsulti sa uban. Tingali puwede natong sugdan pinaagi sa pagpangutana sa atong kaugalingon kon unsa ang kinahanglan natong usbon sa atong kinabuhi. Importante ang paghinumdom nga dili kinahanglan nga kita mag-inusara sa pagsagubang niini. Ang Manluluwas kanunayng andam nga motabang tungod kay nakita Niya ang kataposan gikan sa sinugdanan ug hingpit nga nakasabot atong mga kahuyang; Siya kanunay nga andam sa “pagtabang sa iyang mga katawhan sumala sa ilang mga kahuyang” (Alma 7:12).
Si Sister Tamara W. Runia nagtudlo nga “ang pagdapit sa paghinulsol usa ka pagpahayag sa gugma sa Dios. Ang [pagdawat] niana nga pagdapit usa ka pagpahayag sa atong gugma.” (“Ang Imong Paghinulsol Dili Makapabug-at ni Jesukristo; Kini Makapabati Niya og Kamaya,” Liahona, Mayo 2025, 91).
Mopamatuod ko nga karong adlawa mahimong usa ka bag-ong adlaw ug ang ugma mahimong mas maayong adlaw alang sa tanan nga moduol ni Jesukristo ug modawat sa Iyang kahayag sa ilang kinabuhi. Siya mahigugmaong midapit, “Duol kamo kanako, … ug papahulayon ko kamo” (Mateo 11:28). Sa ngalan ni Jesukristo, amen.